Link to home pageLanguagesLink to all Bible versions on this site
11
Manetualain kasian neu hatahori Israꞌel asa
1 Dadi au ae atane talo ia: fama te ei duꞌa mae, “No hatahori Israꞌel ta nau nenene neu Manetualain, huu naa de Ana timba heni sara.” Talo naa, do? Taa! Au oo numa sira mai boe! Au ia, numa leo Benyamin mai. Benyamin aman, Yakob. Ndia baꞌin, Isak. Isak aman, Abraham, fo mana dadi neu basa hatahori Israꞌel asa baꞌin.✡Felipi 3:5 2 Manetualain ta timba nita heni Ndia hatahorin nara. Sira iar, ndia Ana nalela sara numa lele uluk mai. Ei bei masaneda do taa, neu hata fo neni surak nai Manetualain Susura Malalaon laꞌe-neu baꞌi Elia? Ana unggu-remu neu Manetualain laꞌe-neu hatahori Israꞌel, ma ana noke fo Manetualain huku-doki sara 3 nae,
“Lamatuak! Hatahori iar rakanisa mana toꞌu dedeꞌak kara,
fo Lamatuak nadenu sara mai.
Ara oo ofe rakalulutu mei tunu-hotuk boe,
numa mamana hatahorir rakaluku-rakatele neu Lamatuak.
Numa basa Lamatuak mana toꞌu dedeꞌan nara lalaꞌen mai,
ela kada au mesa ngga bei masodak.
Tehuu ara oo sangga dalak bali,
fo rae rakanisa au boe!”✡1 Mane-manek kara 19:10; 14

4 Tehuu Lamatuak naselu nae, “O kokolam naa, sala! Au bei bingga ela hatahori 7.000 fo mana rakaluku-rakatele neu Au. Hatahori iar rakatataka rahere, ma ta songgo Baꞌal!”✡1 Mane-manek kara 19:18

5-6 Leo naak oo hatematak ia boe. Ta basa hatahori Yahudir rasadea neu Manetualain. Bei ela baꞌuk ka ruma ai mai fo Manetualain here nala sara ena fo nae tao nasoi-nasoda sara, nahuu Ana nae natudu dale susuen neu ai, ta huu ai tao hata fo neulauk! Mete ma Ana muste here nala ai, nahuu ai tao hata fo neulauk, naa sosoa-ndandaan nae, Ana ta bisa naketu fo natudu, do, ta natudu Ndia dale susuen neu ai. Mete ma talo naa, ndia naden ta ‘natudu Ndia dale susuen’ bali.✡Tui Seluk laꞌe-neu Dala Masodak 7:7-8 7 Dadi mateꞌen talo ia: hatahori Yahudi noꞌuk ka sangga-sangga fo Manetualain natudu Ndia dale susuen neu sara, mita fo ara oo bisa malole roon boe. Tehuu ta hambu sana, nahuu sira dalen nara ratea ma ta nau nenene neu Ndia. Tehuu hambu ketuk malole roon. Sira iar, ndia Manetualain here nala memak kasa ena. 8 Nai Manetualain Susura Malalaon neni surak laꞌe-neu hatahori langga batuk kara raa nae,

“Manetualain fee sara,
matak fo ta bisa mete-rita,
ndiꞌi dook fo ta bisa namanene,
ma ute keak fo ta bisa duduꞌa.
De ara ta ralela hata fo ndoos,
losa faik ia boe.”✡Tui Seluk laꞌe-neu Dala Masodak 29:4; Yesaya 29:10

9 Mane Dauk oo surak laꞌe-neu hatahori nusa Yahudi nai Susura Malalaok dale boe nae,

“Ela sara feta-dote rai sira mesa kasa mein,
naa fo ara duꞌa rae, basa naar neulauk ena.
Tehuu sira fetan nara ndia ike rasafali sara.
Ma sira mesa kasa suꞌin ndia tao rala sara rakatunu.
10 Elan numa naa fo matan nara dadi makiuk,
fo ta mete-rita hata esa boe na!
Elan numa naa fo ara lemba berak rakandoo,
fo nggotin nara boe ruku!”✡Sosoda Kokoa-kikiok kara 69:23-24
Manetualain oo nau tao nasoi-nasoda hatahori ta Yahudir boe
11 Dadi au ae atane talo ia: tao hata de hatahori Yahudir rakatunu? Ara tuda ena, do? Taa! Tehuu ara ta nau nenene neu Manetualain, ma ta ramahere neu Karistus, naa soi dalak soa-neu hatahori ta Yahudir fo bisa hambu masoi-masodak numa sala-singgon nara mai. Manetualain tao talo naa, huu Ana nau fo hatahori Yahudir mbiri, fo ara tungga falik Ndia bali. 12 Manggaledok ena nae, hatahori Yahudir lena-langga hata fo ndoos. Huu naa de hatahori laen nara maruma dae-bafok katematuan mai bisa rameda rala Manetualain dale susuen. Dadi hatahori Yahudir, hambu rurunggi moꞌok. Tehuu naa tao nala hatahori ta Yahudir hambu nanala moꞌok. Neu faik esa fo basa hatahori Yahudir malole fali ro Manetualain, naa lolen lenak bali!

13 Au nau afada neu ei hatahori ta Yahudir talo ia: Manetualain nadenu au ena fo laꞌok uu afada ei laꞌe-neu Ndia Hara Lii Malolen. Huu naa de au ambariik ahere fo akalalaꞌok ue-osa fo neulaun seli ia. 14 Mete ma au akalalaꞌok ue-osa ia no neulauk, boso losak tao ala au hatahori Yahudi heli-heling nggara mbiri, losa ketuk hambu masoi-masodak ruma sira sala-singgon nara mai. 15 Neu faik Manetualain timba heni Ndia hatahori Yahudi heli-helin, na, naa soi dalak fo hatahori laen nara hambu lelak fo bisa maso dadi reu Manetualain hatahorin. Tehuu neu ko leo ara mole-dame falik ro Manetualain, naa lolen seli. Naa sama leo ara rasoda fali ruma mamaten nara mai!

16 Haꞌi netuduk numa hatahori rae rumu roti mai. Mete ma ana haꞌi nala tarigu faa, fo loo liman neu Manetualain, neu ko basa rotir raa lalaꞌen oo dadi reu Ndia enan fo malalaok boe. Mete ma hatahori loo lima ai huuk okan esa dadi neu mbule uluk soa-neu Manetualain, neu ko ai huuk naa katematuan oo dadi neu Ndia enan fo malalaok boe.

17 Au ae akasasamak hatahori nusa Yahudi no ai huuk setun esa fo mana mori nai osi dale. Manetualain beta heni ai huuk naa ndanan ketuk ena. Tehuu ei hatahori ta Yahudir, sama leo ai setun fuir. Boe ma Manetualain beta nala ei ndanan ketuk ena fo nakadite sara reu ai huuk manai osi dale naa. No dalak naa, ndanak numa ai huuk manai osi deak mai bisa mori nasamusa, nahuu ndanak naa simbok basa-basan numa ai huuk manai osi dale mai. Naa, sama leo ei fo hatahori ta Yahudir oo simbok mala Manetualain dale susuen boe fo Ana nae feen soa-neu hatahori Yahudin nara. 18 Tehuu besa-besa, ee! Boso koa aom, duꞌa mae, ei numa deak mai naa, neulaun lena heni ndanak kara fo Manetualain beta heni sara raa ena! Mete ma o mae soꞌuk aom, boso lilii-ndondou, te o kada ndanak esa a! O ta ndia tao matea ai huuk naa. Te okan ndia tao nala ai huuk naa natea na!

19 Fama te o nau kokolak mae, “Manetualain beta heni ndanak esa numa ai huuk mana mori nai Ndia osin dale mai, fo Ana bisa nakadite falik au uu naa, fo nggati falik ndana raak naa.” 20 Naa, ndaa. Tehuu boso lilii-ndondou mae, Manetualain beta heni ndanak kara raa ena, nahuu ara ta ramahere neu Karistus. De o nggati sara, nahuu o mamahere neu Karistus. Dadi boso koa ao! Malole lenak o besa-besa, ma boso leli-belak kana! 21 Te hatahori Yahudir, sama leo ndana huun tetebes mana nasamusak nakahuluk na. Tehuu Manetualain ta ela sara rakatataka rala dook ka reu naa. Dadi mete ma o ta mamahere neu Ndia seku neu, boso mamahena mae, Ana ela o makatataka muu naa!

22 Dadi ei muste duduꞌa matalolole dei. Manetualain dalen mansuek. Tehuu Ana oo bubuluk fee huku-doki berak boe. Neu ko Ana fee hukun neu hatahori mana tudak ena, fo mana ta malole noon. Tehuu soa-neu ei hatahori ta Yahudir, Manetualain natudu Ndia dale susuen, sadi ei makaesa mian seku neu, ma elan fo Ana tao hata neulauk soa-neu ei. Tehuu mete ma ei ta ela sana tao talo naa, Ana oo nau beta heni ei numa Ndia ai huun mai boe. 23 Leo naak oo, no hatahori Yahudir boe. Mete ma ara sale dalen do tuke tein nara fo mulai ramahere neu Karistus, na, neu ko Manetualain nau nakadite falik kasa reu ai huuk tetebes naa. Te Ana naena koasa fo tao talo naa na! 24 Ei fo hatahori ta Yahudir, sama leo ndanak numa setun fuir mai, fo bakahulun mana mori mbembelak nai osi deak. Tehuu Manetualain here nala ei fo nakadite ei miu ai huu setun neulauk fo Ana selen nai Ndia osin dale, elan fo ai huu fuir mesa kasa laen, ma ai huu osir mesa kasa laen. Mete ma hatahori ta Yahudir mesa kasa bisa dadi talo naa, hata-bali hatahori Yahudir. Naa, bisa dadi lena-lenak bali, mete ma Manetualain nakadite falik kasa reu sira ai huu makasososan.

Neu ko hatahori Yahudir malole fali ro Manetualain
25 Toranoo nggara ein marai Roma! Ei muste malela dedeꞌak ia fo fai bakahulun bei nemeninok. Mete ma ei malelan ena, na, neu ko ei ta bisa koa ao fo duꞌa mae, ei malelak kara. Hata fo bakahulun nemeninok naa talo ia: hatematak ia hatahori Yahudir dalen nara ratea, ma ta nau ramahere neu Karistus. Tehuu ara ta leo naak rakandoo. Mete ma basa hatahori ta Yahudir fo Manetualain here nala sara ena, ramahere neu Karistus ena, na, neu ko hatahori Yahudir oo ramahere neun boe. 26 De mete ma faik naa losa ena, neu ko Manetualain tao nasoi-nasoda basa hatahori Yahudir ruma sira sala-singgon nara mai. Naa, sama leo neni surak nai Susura Malalaok ena nae,
“Neu ko hambu Hatahori esa mai,
fo tao nasoi-nasoda ita numa sosoek mai.
Ana numa letek Sion, nai kota Yerusalem mai.
Ana ndia tao nala Yakob tititi-nonosin nara sale dalen do tuke tein nara.
Ara leo-laꞌo ta tao matak neu Au,
ma ara rasadea laꞌo ela Au eno-dala masoda tetebeng ena.✡Yesaya 59:20-21
27 Au nau koka heni sira sala-singgon.
Huu Au ndara fangga hehelu-bartaak ua sara talo naa ena.”✡Yermia 31:33-34

28 Tungga-tungga hatahori Yahudir ramanene Karistus Hara Lii Malolen, ara tao aon nara nok bali musu mana laban neun. No dalak naa, ara fee lelak soa-neu ei hatahori ta Yahudir! Leo mae talo naa oo, tehuu Manetualain bei sue-lai sara boe, nahuu Ana sue-lai sira bei-baꞌin nara, ma here nala sara dadi reu Ndia hatahorin nara ena. 29 Mete ma Manetualain fee basa buas esa ena, na, Ana ta leꞌa nala falik kana. Mete ma Ana nanggou nala hatahori ena nae, “Woi! Mai, tungga Au! Mai maso dadi muu Au hatahoring leo!” Ana ta husi heni sana bali.

30 Fai uluk ei fo hatahori ta Yahudir, ta nau nenene neu Manetualain. Tehuu hatematak ia ei ndia simbo mala Manetualain dale kasian, nahuu hatahori Yahudir ta nau nenene neun. 31 De sira iar, ndia hatematak ia ta tao tungga Manetualain hihii-nanaun. Huu naa de Manetualain bei nau natudu Ndia dale kasian soa-neu ei. Ma neu ko Ana oo nau kasian neu sara bali boe. 32 Hatematak ia Manetualain mete hatahori Yahudi sama no Ana mete hatahori ta Yahudi. Huu basa sara ta tao tungga Ndia hihii-nanaun, nok bali neni ronggak kara, ma ta bubuluk dala sasaik. Ana ela sara talo naa, fo bisa natudu Ndia dale kasian soa-neu basa hatahorir.

Manetualain naa, ta neni babanggak
33 Manetualain malelan seli!
Ma Ana oo pake Ndia malelan fo tao hata neulauk boe.
Ta hambu hatahori fo bisa nalelan no tebe-tebe.
Ta hambu hatahori mana bubuluk no tebe-tebe, laꞌe-neu Ana naketu-naladi dedeꞌak.
Ta hambu hatahori esa boe na ndia nalela,
tao hata de Manetualain tao matak esa.✡Yesaya 55:8
34 Ta hambu hatahori fo mana bubuluk no tetuk, ita Lamatuan duduꞌan.
Ta hambu esa boe na bisa fee nenori-nefadak neu Ndia.✡Yesaya 40:13
35 Ta hambu hatahori esa fo bisa fee mudak buas esa neu Manetualain,
ta hambu hatahori fo bisa nakasetik Manetualain fo bala falik kana!✡Ayub 41:11
36 Huu basa-basan raoka numa Manetualain mai!
Basan dadi, nahuu Ndia!
Basa hata fo ita taok,
ita taue-osa soa-neu Ndia.
Ita soꞌuk kokoa-kikiok soa-neu Ndia,
losa doon naa neu!
Tebe talo naa!✡1 Korentus 8:6

<- Roma 10Roma 12 ->