Dae-bafo Beuk 5

Susura neni luluk fo neni segel nisak

1 Boe ma au mete-ita seluk Ndia, mana nanggatuuk nai kadera man-parenda naa. Ana toꞌu lululuk esa nai lima konan. Lululuk naa, dea ma mata sofek no susura deꞌek. Ma ara segel risan ena nai mamanak hitu.✡

2 De au mete-ita ata ta hohoꞌak ndoos esa numa nusa tetuk do inggu temak mai. Ana natane no haran nahere nae, “See ndia naena haak fo bisa buka segel ma lees susurak naa?”

3 Ana natane talo naa, tehuu ara ta hambu hatahori esa boe na ndia naena haak fo bisa buka susura neni luluk naa ma lees isin. Nai nusa tetuk do inggu temak, ma nai dae-inak, ta hambu esa boe na ndia naena haak. Nai hatahori mates mamanan oo, ta hambu boe. 4 Mete-ita talo naa, boe ma au buꞌi akarereu, nahuu ta hambu hatahori esa boe na naena haak fo bisa buka susura neni luluk naa ma lees isin. 5 Basa boe ma esa numa mane leo kadua hulu haak kara raa mai, kokolak no au nae, “Weeh, kaꞌa! Boso buꞌi. Huu hambu mane Dauk tititi-nonosin esa ta neni babanggak, fo ara roken rae, ‘Singa numa leo Yahuda mai’. Ana rua-mbembesi nakalulutu basa manggarauk lalaꞌen ena. De Ana ndia naena haak fo bisa buka segel ma lees susurak naa isin.”✡Tutui Makasososak 49:9; Yesaya 11:1; 10

6 Amanene talo naa, boe ma au mete-ita Bibi Lombo Ana esa nambariik numa horis ta hohoꞌak kahaak kara raa talada heon, ma mane leo kadua hulu haak kara raa fo ranggatuuk eko-feo kadera man-parenda naa. Bibi Lombo Ana naa, nok bali neni hala nitak ena. Ndia susuran hitu, ma matan oo hitu boe. Ndia mata deꞌe hitun nara raa, sama leo Ndia Dula-dalen mana naena boboak hitu, Ana fee sara ndule basa dae-bafok ia ena.✡Yesaya 53:7; Sakaria 4:10 7 Basa de au mete-ita Bibi Lombo Ana naa, laꞌok neni Ndia mana manggatuuk nai kadera man-parenda naa neu, de ana haꞌi nala susura neni luluk naa numa lima konan mai.

8 Neu Bibi Lombo Ana naa haꞌi nalan, boe ma horis ta hohoꞌak kahaak kara raa, ma mane leo kadua hulu haak kara raa, sendek luu-langgan nara fo rakaluku-rakatele reu matan. Sira esa-esak toꞌu bua kaliik, nok bali sasando, ma manggo lilo mbilas esa. Manggo naa neni isik no rani neni hotuk fo tao masuk kaboo menik. Ai daa kaboo menik naa, ndia Manetualain hatahorin nara huhule-haradoin.✡Sosoda Kokoa-kikiok kara 141:2 9 Boe ma basa sara soda-helo sosoda beuk esa rae:

“Bibi Lombo Ana ia, ndia nandaa simbo susurak ia.

Bibi Lombo Ana ia, ndia naena haak fo bisa buka ndia segel.

Te ara hala risan ena.

Basa de Manetualain pake Bibi Lombo Ana daan,

fo tefa-soi nala hatahori dae-bafok numa basa leor ma hatahori nusak kara mai,

mita fo sira ketuk bisa dadi Manetualain hatahorin.

No dalak naa, hatahori dae-bafok numa basa dedeꞌak ma nusak mai,

bisa dadi reu Manetualain nufanelun.✡

10 Bibi Lombo Ana ia, nakabubua nala basa sara ena,

dadi reu mamana parenda-koasa esa.

Bibi Lombo Ana ia, here nala sara ena,

dadi reu Manetualain hatahori mana maue-osan nara.

Neu ko ara toꞌu parenda nai dae-bafok.

Neu ko ara raue-osa fee Manetualain nai dae-inak.”✡

11 Basa naa, au botik matang, de au amanene hara moꞌok esa. Ma au mete-ita horis ta hohoꞌak kahaak kara raa ma mane leo kadua hulu haak kara raa, tamba ro Manetualain atan nara ruma nusa tetuk do inggu temak mai. Atar raa noꞌun nara, losa kefi-kefik kara.✡Daniel 7:10 12 Basa sara soda-helo ro haran rahere rae,

“Ai makadedemak Bibi Lombo Ana fo neni hala nisak naa,

nahuu Ana ndia nandaa simbok ita kokoa-kikion!

Ndia koasan naa, moꞌon seli.

Ndia hata-heton nara raa, noꞌun seli.

Ndia duduꞌa-aꞌafin naa, tetar laꞌe esak kana.

Ndia barakain naa, ta neni babanggak ndoos.

Ai makadedemak naden.

Ai fee hada-horomatak neun.

Ai koa-kio neun.”

13 Basa naa, au amanene sosodak laen esa bali. Numa basa horis lalaꞌen, nai nusa tetuk do inggu temak, nai lalai, nai dae-inak, ma nai tasi dale, basa sara soꞌuk haran nara fo soda-helo. Numa hatahori mates mamanan mai oo, ara soda-helo tungga boe. Basa sara soda-helo rame-rame rae,

“Ai koa-kio neu Manetualain fo mana nanggatuuk nai kadera man-parenda ia.

Ai oo makadedemak Bibi Lombo Ana ia boe.

Ai fee hada-horomatak neu Sara.

Ai makaluku-makatele neu Sara.

Huu Ara toꞌu parenda taa-taa seku neu!

Ma Sira koasan ta mana basak!”

14 Basa boe ma horis ta hohoꞌak kahaak kara raa, raselu taa-taa rae, “Tebe naa! Tebe naa ena!” Boe ma mane leo kadua hulu haak kara raa sendek luu-langgan nara bali fo rakaluku-rakatele neu Manetualain ma Bibi Lombo Ana naa.

<- Dae-bafo Beuk 4 Dae-bafo Beuk 6 ->