1 Basa naa, medak neu ma au mete-ita tanda ta hohoꞌak esa toda numa lalai mai, fo hatahori dae-bafok bei ta mete-nitan: hambu inak esa, ao-inan neni mbotik no ledo. Ana tabu ein neu bulan lain. Ana pake solangga manek neni heti nduuk salahunu dua. 2 Inak naa kairuk, ma ana kada buꞌi, huu taꞌin nambeta nae bonggi.
3 Medak neu ma, au mete-ita seluk tanda ta hohoꞌak laen esa toda numa lalai mai. Hambu mengge buta mbilas moꞌok esa. Langgan hitu, ma susuran salahunu. Ana pake solangga manek hitu nai langga kahitun nara.✡Daniel 7:74 Ana pake ikon fo sasaa namopo heni babaꞌek esa numa basa nduuk kara marai lalai mai. Elak kara kada babaꞌek dua. Basa de ana toko heni nduuk kara raa reni dae-bafok mai. Boe ma ana neu nambariik nasare inak naa, fo nahani losa ana bonggi. Huu ana nae kodo heni memak kakanak naa.✡Daniel 8:105 De inak bonggi nala Ana touk esa. Tehuu Manetualain atan esa numa nusa tetuk do inggu temak mai fonda nala Kakanak naa. Boe ma noo Kakanak naa neni Manetualain neu fo Ana parenda sama-sama no Manetualain nai nusa tetuk do inggu temak. Huu Kakanak naa, neu ko parenda basa hatahori nusa-nusak kara marai dae-inak no koasa ta neni babanggak meteꞌen.✡Yesaya 66:7; Sosoda Kokoa-kikiok kara 2:96 Tehuu inak naa nalai neni mamana nees esa neu fo Manetualain sadia memak feen ena. Neu ko ara fadulin nai naa losa teuk telu seserik (ndia faik 1.260).
Mikael natati laban mengge buta nai nusa tetuk do inggu temak
7 Basa boe ma netati moꞌok dadi numa nusa tetuk do inggu temak. Manetualain atan nara ro sira malanggan manade Mikael, ratati laban mengge buta naa no ana nunin nara.✡Daniel 10:13, 21; 12:1; Yudas 98 Boe ma Mikael asa rasenggi mengge buta naa no ana nunin nara. Basa de ara kaꞌi mengge buta naa no ana nunin nara, fo ta bole leo nai nusa tetuk do inggu temak bali. 9 Huu naa de ara husi heni sara ruma nusa tetuk do inggu temak mai, de piru heni sara reni dae-inak mai. Mengge buta naa, ndia nitur malanggan fo raseseik kana rae, ‘Nitu-mula’. Numa makasososan mai ana kada pepeko-leleko hatahori dae-bafok fo ara tao salak.✡Tutui Makasososak 3:1; Lukas 10:1810 Basa boe ma au amanene seluk hara maherek esa numa lalai mai nae,
“Fai bakahulun mengge buta naa nambariik nakandoo numa Manetualain matan.
Ndia naa, mana bafa lafok fo soa ndae salak neu ita toranoo kamaheren nara.
Ana soa nakasasaꞌek salak neu sara hatu-leledon.
Tehuu hatematak ia ana neni piru henik numa nusa tetuk do inggu temak mai ena.
Dadi hatematak ia basan matetu-mandaik.
Hatematak ia fain losa ena, fo Manetualain tao nasoi-nasoda hatahori dae-bafok.
Hatematak ia Manetualain toꞌu parenda no Ndia koasan ta neni babanggak.
Ma Ana soꞌuk nala Karistus ena,
ndia Hatahori fo Ana here nalak ena fo dadi Manek soa-neu basa hatahori nusa-nusak kara.✡Ayub 1:9-11; Sakaria 3:1
11 Ita toranoo kamaheren nara rasenggi mengge buta naa fo fai bakahulun ndae salak neu sara,
nahuu Bibi Lombo Ana daan titi henin ena fo koka heni sira sala-singgon nara.
Ara oo rasenggi mengge buta naa boe,
nahuu ara rambarani tui-bengga neu hatahorir laꞌe-neu Bibi Lombo Ana dale susuen neu sara.
Leo mae hatahorir ramanasa losa rae rakanisa sara oo,
tehuu ara ta rakaheok boe.
12 Dadi basa mana masodak lalaꞌen marai nusa tetuk do inggu temak, muste ramahoko!
Tehuu basa mana masodak lalaꞌen marai dae-inak muste ranea,
nahuu sosoek nae daka nala ei ena.
Nitur malanggan konda nai ei ena.
Ana namanasa nalan seli ena,
nahuu ana bubuluk nae, ndia fain fo tao manggarauk naa, nae basan ena!”
Mengge buta sangga nakandoo inak naa nai dae-inak
13 Neu faik fo mengge buta naa bubuluk nae, ndia neni nggari henik nai dae-inak ena, boe ma ana neu sangga fo nau nakasususak inak naa fo mana bonggi nala Kakanak naa. 14 Tehuu ara fee inak naa lidak dua sama leo mbui marambua moꞌok lidan, mita fo ana lambu neu keke nai mamana nees fo dook ka numa mengge buta naa mai. Numa naa ara fadulin losa teuk telu seserik.*Susura Malalaok dedeꞌa Yunani huuk surak nae, “tembo esa, tembo dua, ma tembo seserik esa”. Dedeꞌa deꞌek kara raa, sama ro marai Daniel 7: 25, 12:7. Ndia fain, sama no bulak 42, do, faik 1.260 nai babaꞌek 11: 2-3 manai lain.15 Mengge buta naa mete-nita talo naa, boe ma ana nasapura kalua heni oe sama leo faa, fo nae mbamba neni inak naa. 16 Tehuu dae-inak fali nala inak naa, no dalak dae natangga fo musi nabasa oe mana faa kalua numa mengge buta naa bafan mai, mita fo oe naa boso losa inak naa. 17 Basa boe ma mengge buta naa namanasa nalan seli neu inak naa. De ana kalua fo neu natati laban inak naa anan laen nara, sira hatahorir fo mana leo-laꞌo tungga Manetualain parendan, ma manaku rae, sira raa Yesus hatahorin. 18 Basa boe ma mengge buta naa neu nambariik neu tasi tatain. Ana henggu nisin.
<- Dae-bafo Beuk 11Dae-bafo Beuk 13 ->
~7~Susura Malalaok dedeꞌa Yunani huuk surak nae, “tembo esa, tembo dua, ma tembo seserik esa”. Dedeꞌa deꞌek kara raa, sama ro marai Daniel 7: 25, 12:7. Ndia fain, sama no bulak 42, do, faik 1.260 nai babaꞌek 11: 2-3 manai lain.
