Felipi

Ai haitua susurak ia fee basa hatahorir fo mana ramahere neu Yesus Karistus marai kota Felipi. Ma ai nau fo basa malangga saranik kara, ma mana sou malangga saranik uen nara oo, bubuluk no malole susurak ia isin boe.

2 Manetualain naa, ita Aman. Ma Yesus Karistus naa, ita Lamatuan. De ai moke-hule fo Ara ratudu dale susuen nara reu ei, mita fo ei bisa leo-laꞌo no mole-damek ma lino-lendek.

3 Leo mae au ta mete-ita ei dook ka ena, tehuu au ta lilii ei! Tungga-tungga au asaneda ei, au oke makasi neu Manetualain, nahuu ei mamahere makandoo neun. 4 Tungga-tungga au hule-haradoi soa-neu ei, au daleng namahoko, 5 nahuu numa fai makasososan ei simbo Lamatuak Hara Lii Malolen, ei makalalaꞌok makandoo Ndia uen sama-sama mia au. 6 Naa, natudu nae, Manetualain mulai oꞌofe-fafae ei dalem mara ena. Ma au bubuluk tebe-tebe ae, Ana nakalalaꞌok nakandoo Ndia ue-osa malolen naa, losa dadi matetu-mandaik neu faik fo Yesus Karistus fali mai.

7 Memak, nandaa au sue ei, nahuu au daleng nakaesa no ei numa fai bakahulun mai ena. Fai maneuk kara ei maue-osa sama-sama mia au, neu au afada hatahorir laꞌe-neu Lamatuak Hara Lii Malolen, ma neu au bala hatahorir fo mana laban Hara Lii Malole naa. Leo mae au maso bui oo, tehuu ei ta malai makaheok ela au boe. 8 Manetualain ndia bubuluk nae, au daleng hii nalan seli neu ei. Au susueng neu ei naa, sama leo Yesus Karistus susuen.

9-10 Dadi au hule-haradoi fee ei talo ia: au oke-hule fo ei susuen esa no esa boe tamba nakandoo, losa ana sasi-sasi. Au oo oke-hule fo Manetualain fee ei malela tebe-tebe dedeꞌak bee ndia malole, mita fo ei masodam mara dadi lolo-laok boe. Boe ma neu ko, neu faik fo Karistus naketu-naladi dedeꞌak soa-neu basa hatahorir, na, Ana nafada nae, ei ta maena salak hata esa boe na, 11 nahuu Ana ndia tao nala ei dalem mara lolo-laok fo bisa leo-laꞌo no ndoos. Ma ei leo-laꞌo ndoos talo naa, na, hatahori laen nara rakadedemak Manetualain ma koa-kio neun.

12 Toranoo susue nggara ein! Au nau ei bubuluk mae, hambu hatahori rakasususak au, losa ara sese au uni bui uu. Tehuu Lamatuak Hara Lii Malolen natanggela nakandoo, 13 losa soldadu mana manea uma manek, ma basa hatahori laen nara oo bubuluk rae, au maso bui nahuu au tungga Yesus Karistus boe.✡Nedenuk kara Tutuin 28:30 14 Boe ma Manetualain hatahorin nara marai ia mete-rita rae, Manetualain tao talo naa, neu au nai bui ia dale. Huu naa de ara boe rambarani, losa ara ta ramataꞌu bali ena. Basa boe ma ara kokolak no ledo-ledo Manetualain Dedeꞌa-kokolan nai bee a mesan.

15-17 Nai ia, hambu hatahori matak dua, mana manggate fee nenorik laꞌe-neu Karistus. Sira, mana maue-osa no dale ndoos, ma mana maue-osa no dale peko-pakik. Mana maue-osa no dale ndoos, dalen nara malole ro au. Ara bubuluk tebe-tebe rae, au lemba-asaa au susa-sonang ia, nahuu au akalalaꞌok au ue-osang, ma ta akaheok faa boe na.

Tehuu mana maue-osa no dale peko-pakik, sira dalen nara mbiri esa no esa, ma sangga nadek. Ara tao rabingga-baꞌek hatahori kamaherek kara, sadi hambu ketuk fo tungga sara. Ara sangga dalak fo rakadedemak aon nara rae, sira ta hohoꞌak lena heni au. Ara duꞌa rae, mete ma hatahori tungga sara, na, neu ko naa tao tamba nambera au susa-sonang nai bui dale.

18 Tehuu ta hata-hata! Au ta tao matak, mitak mae hatahori fee nenorik no dale ndoos, do taa. Nenenin lenak, ara fee nenorik laꞌe-neu Karistus! Naa, ndia tao au daleng namahoko.

Ma au amahoko tebe-tebe, 19 nahuu au bubuluk ae, ei hule-haradoi fee au, ma Yesus Karistus Dula-dalen tulu-fali au. Huu naa de au bubuluk mateꞌen te kada lino-lendek! 20 Leo mae au asoda do, mate oo ta hata-hata boe. Sadi Manetualain pake au fo akadedemak Lamatuak Yesus naden, ma fee nenorik no ledo-ledo laꞌe-neu Ndia, losa ta hambu hata esa boe na nakamamaek au. Basa iar lalaꞌen ndia au amahena akandoo numa fai uluk mai losa hatematak ia.

21-23 Au duduꞌa talo ia: Mete ma au asoda, na, elan fo au asoda akaesa ua Karistus, ma akalalaꞌok akandoo Ndia ue-osan. Naa, malole. Tehuu mete ma au mate, na, au hambu nanalak lenak bali. Huu au bisa laꞌo ela dae-bafok ia, ma au asoda fali numa mamates mai fo leo sama-sama ua Karistus nai nusa tetuk do inggu temak. Huu naa de au daleng napangge, ma au ta bubuluk bee ndia neulaun lenak! 24 Dadi talo ia leo! Huu ei bei toꞌa au nai ia, de malole lenak au leo sama-sama ua ei nai dae-bafok ia leo. 25 Au amahere au teu faing bei naruk fo bisa leo sama-sama ua ei. Lamatuak nau au atetea ei dalem mara, ma ei tamba mamahere neu Ndia no dale nemehokok. 26 De neu ko ei bisa makadedemak Yesus Karistus naden, nahuu Ana soi dalak ena fo au bisa fali uu tiro-dangga ei bali.

27-28 Leo mae talo bee oo, tehuu ei leleo-lalaꞌom muste ndoos, huu eir ia, Lamatuak hatahorin nara boe. Dadi ei muste leo-laꞌo ndaa no dala-hadak, ma tao tungga hata fo Karistus Hara Lii Malolen nafada neu ei. Neu ko mete ma au dadi fali uu tiro-dangga ei, do, kada amanene numa hatahorir mai rae, ei leo-laꞌo no malole, na, au bisa amahoko. Au bisa bubuluk ae, ei leo-laꞌo no dalek esa, nahuu ei makaesa mia Dula-dalek esak ka. Ma au bisa bubuluk ae, ei maote tebe-tebe fo makalalaꞌok Lamatuak Yesus Hara Lii Malolen sama-sama, mita fo hatahori laen nara oo ramahere tungga boe. Ma ei oo ta mamataꞌu, leo mae hambu hatahorir laban ei boe. Naa, dadi tanda soa-neu ei musum mara nae, Manetualain nau nggari heni sara reni aꞌi mbila ta kala matek reu. Tehuu Ana tao nasoi-nasoda ei, fo neu ko ei masoda mian seku neu. 29 No Manetualain dale mololen seli, huu naa de Ana nasosoi dalak ena, fo ei bisa mamahere neu Karistus, ma dadi miu Ndia hatahorin nara. Ta kada mamahere a leo, tehuu Ana oo fee luas fo ei hambu mala susa-sonak boe, nahuu ei tunggan. 30 Au amanene hatahori ketuk marai naa laban ei, nahuu ei makalalaꞌok Karistus Hara Lii Malolen. Masanenedak te fai maneuk kara oo, ara laban au leo naak boe. Ma hatematak ia oo, ara bei talo naa boe.✡Nedenuk kara Tutuin 16:19-40

Felipi 2 ->