Markus

Yohanis Mana Sarani buka dalak fee Lamatuak Yesus

(Mateos 3:1-12; Lukas 3:1-18; Yohanis 1:19-28)

1 Ia tutui malole, fo Manetualain Anan*Nai susura makasososan ketuk kara ta surak rae, “Manetualain Anan”. tutuin. Ndia naden Yesus Karistus. Manetualain dudu elan numa lele uluk mai ena. Ndia tutuin mulai talo ia: 2 Yesus bei ta mulai Ndia ue-osan, te Manetualain nadenu hatahori esa, nade Yohanis, fo nakahuluk buka dalak soa-neu Yesus mamain. Lele uluk Manetualain pake Ndia mana toꞌu dedeꞌan esa ena, nade baꞌi Yesaya. Ana surak memak kana ena nae:

“Nenene, ee! Au adenu Au hatahoring esa fo neu buka dalak fee O.✡

3 Hatahori naa neu ko neni mamana nees neu, de ana bolu nae,

‘Basa hatahorir lalaꞌen tao malole dalak kara, fo simbok Lamatuak mamain!

Ma fua matetu dokek kara fo simbok kana.’ ”✡

4-6 Hatahorir roke rateme Yohanis rae Mana Saranik. Ana leo nai mamana nees. Bualoꞌa-papaken, ara taon numa banda onta bulun mai. Kalekeen numa banda roun mai. Nanaꞌa-nininun ndia lamak ma fani oe. [Yohanis leleo-lalaꞌon ia, sama leo baꞌi Elia lele uluk.]✡2 Mane-manek kara 1:8

Lelek naa, hatahorir ruma kota Yerusalem ma profensi Yudea isin nara mai ratonggo ro Yohanis numa ndia mamanan naa. Ara mai fo rae rita Yohanis ma sangga ramanene Yohanis nenorin. Yohanis nafada sara nae, “Ei muste manaku ma laꞌo ela basa ei sala-singgom mara lalaꞌen, fo ela Manetualain koka heni ei sala-singgom mara. Boe ma ei muste sarani dei, fo dadi neu tanda nae ei malole fali mia Manetualain ena.”

Ramanene talo naa, boe ma ara manaku sala-singgon nara, de ana sarani sara numa lee Yarden.

7 Ana nafada nae, “Neu ko Hatahori moꞌo-inahuuk esa lena heni au bali nae mai. Leo mae dadi uu kada ndia ana neondan oo, au ta andaa boe.†Dedeꞌa Yunani huuk nae, “Aloe au aong fo sefi kada tali sopatun oo, au ta andaa boe.” Sosoa-ndandaan nae, Yohanis kada hatahori kadiꞌik, de mae dadi neu Lamatuak Yesus hatahori neondan oo, ndia ta nandaa boe. 8 Au sarani ei pake kada oe, tehuu neu ko Ana tao lena heni au, ma Ana tao nasofe ei dalem mara no Manetualain Dula-dale Malalaon.”

Yohanis sarani Lamatuak Yesus

(Mateos 3:13-17; Lukas 3:21-22)

9 Neu faik naa, Yesus numa nggoro Nasaret manai profensi Galilea mai, mai natonggo no Yohanis. Boe ma Yohanis sarani Yesus numa lee Yarden. 10 Yesus bei fo kalua numa oe dale mai, medak neu ma nita lalai natahuka, boe ma Manetualain Dula-dalen sama leo mbui lunda sina konda neni Yesus neu. 11 Boe ma Manetualain nahara numa lalai mai nae,

“O ia, Au Ana susueng.

O soa tao mamahoko Au.”✡

Nitur malanggan soba-dou Lamatuak Yesus numa mamana nees

(Mateos 4:1-11; Lukas 4:1-13)

12 Basa boe ma Manetualain Dula-dalen nuni Yesus neni mamana nees esa neu. 13 Nai mamanak naa, hambu kada banda fuir. Yesus leo numa naa doon faik haa hulu. Numa mamanak naa, nitur malanggan neu soba-dou Yesus fo tunggan, tehuu ta nala sana. Basa boe ma Manetualain atan nara ruma nusa tetuk do inggu temak mai fo reu ralalaun.

Lamatuak Yesus neni Galilea neu fo tui-bengga Manetualain Hara Lii Malolen

(Mateos 4:12-17; Lukas 4:14-15)

14 Faik naa fo ara tao Yohanis neni bui dale neu, boe ma Yesus neni profensi Galilea neu tui-bengga Manetualain Hara Lii Malolen nai naa. 15 Ana nafada nae,

“Nenene, ee! Hatematak ia Manetualain fain losa ena!

Hatematak ia basa hatahori bei fo bubuluk rae, Manetualain toꞌu parenda.

Huu naa de ei muste hahae numa ei pepeko-lelekom mai leo,

fo tungga falik Manetualain,

ma mamahere neu Ndia Hara Lii Malolen ia leo.”✡

Lamatuak Yesus nanggou mana puꞌa-dala fo tunggan

(Mateos 4:18-22; Lukas 5:1-11)

16 Faik esa, Yesus laꞌok tungga dano Galilea tatain. Ana nita hatahori esa, nade Simon no fadin nade Anderias. Dua sara dala iꞌak. Naa sira ue-osan tungga-tungga faik. 17 Yesus nanggou sara nae, “Woi! Mai fo tungga au leo! Ei masiꞌe sangga iꞌak, tehuu hatematak ia Au tao ei dadi miu mana sangga samanek.” 18 Dua sara ramanene rala naa, boe ma ara laꞌo ela dala naa, fo reu tungga Yesus tutik ka.

19 Basa de Yesus laꞌok nala faa bali, boe ma nita Sabadius anan nara. Kaꞌak nade Yakobis no fadin nade Yohanis. Dua sara rafafaꞌu ralole puꞌak nai ofak lain. 20 Yesus nanggou dua sara nae, “Wee! Mai fo tungga Au!” Boe ma dua sara laꞌo ela sira aman ma hatahori manaꞌa nggadin nara rai ofak lain. De ara reu tungga Yesus.

Lamatuak Yesus husi kalua heni nitu numa hatahori esa mai numa kota Kapernaum

(Lukas 4:31-37)

21 Basa boe ma Yesus no hatahori kahaak kara fo mana tungga Ndia naa, losa kota Kapernaum. Faik naa ndaa no hatahori Yahudir fai huhule-haradoin,‡Hatahori Yahudi fai huhule-haradoin, fai hahae aok, do, fai hahae tao ue-osa, ara rae, ‘Fai Sabat.’ boe ma Yesus maso neni uma huhule-haradoik dale neu, de fee nenorik numa naa. 22 Basa hatahori heran bali-bali neu ramanene Ndia kokolan, huu Ana bubuluk no tetuk nenorik naa isin. Naa, ta sama no hatahori Yahudi meser anggaman nara.✡Mateos 7:28-29

23 Faik naa, hambu hatahori fo nitu saꞌek esa. Ana oo neni uma huhule-haradoik dale neu, boe ma nitu manai hatahori naa dale bolu 24 nae, “Weeh! Yesus hatahori Nasaret! O mai tao hata mua ai nai ia! O mai sangga makalulutu ai, hetu? Ai malela O. O ia, Hatahori Malalaok fo lele uluk Manetualain helu-bartaa nae nadenun mai.”

25 Yesus mbokan nae, “Makatema o bafam! Kalua laꞌo ela hatahori naa!”

26 Boe ma nitu naa tao nala hatahori naa ao-inan leꞌa kede-kede. De ana kalua numa hatahori naa neu, ma nakau nahere. 27 Boe ma basa hatahori manai uma huhule-haradoik naa dale bafan nara bese mboo, de rakokola aok rae, “Awii! Ia hata ia? Ana parenda nitur, de ara kalua tungga Ndia hihiin. Ia nenori beuk, do? Tou lasik kokolan ta neni babanggak!”

28 Boe ma hatahorir mulai tui-bengga mandadik naa ndule nggorok kara marai profensi Galilea.

Lamatuak Yesus tao nahai Petrus ari-inan no hatahori noꞌuk kara

(Mateos 8:14-17; Lukas 4:38-41)

29 Ara kalua numa uma huhule-haradoik naa dale mai, boe ma Yesus neni Simon no Anderias uman neu. Yakobis no Yohanis tungga sara boe. 30 Simon ari-inan sumai, de ana sunggu nai mamana susungguk lain. Neu Yesus no ana nunin nara bei fo maso reni uma naa reu, te hatahori mai rafadan rae, “Ina lasik hambu sumaik.”

31 Basa boe ma Yesus neu tiro ina lasik, de Ana toꞌu nala liman fo nadedein. Ina lasik hedin mopon tutik kana. Boe ma ana nambadeik, de neu nalalau sara.

32 Neu ledo dei fo nae tesa, hatahorir reni sira hatahori kamahedin nara ma sira hatahorin fo nitu saꞌek kara mai, fo hule Yesus tulu-fali sara. 33 Losa basa hatahori kota esa isin nara rakarumbu reu de sofe uma naa bebelan. 34 Hatahorir raa hedin nara mata-matak kara, tehuu Yesus tao nahai basa-basa sara. Ma Ana oo husi kalua heni nitu noꞌuk ka boe. Ana ta fee lelak nitur raa kokolak, te ara oo ralelan boe, na.

Lamatuak Yesus laꞌok ndule nggorok laen nara fo neu tui-bengga Manetualain Hara Lii Malolen

(Lukas 4:42-44)

35 Neu beꞌe-mai dulu silu fo bei makiuk, Yesus beꞌe ena de laꞌo numa uma naa neu. Ana neni mamana nees esa neu fo Ana hule-haradoi, kola-kola no Manetualain. 36 Neu Simon asa beꞌe, ta mete-rita Yesus de reu sanggan. 37 Ara ratonggo ro Yesus, de rafadan rae, “Papa, hatahori noꞌuk ka mai sangga Papa.”

38 Boe ma Ana naselu nae, “Naa oo malole boe. Tehuu malole lenak ita teni nggorok laen mana deka nai ia teu dei. Au oo nau tui-bengga Hara Lii Malole neu sara boe. Te naa Au ue-osan, na.”

39 Basa boe ma Ana laꞌo ndule basa profensi Galilea fo tui-bengga Manetualain Hara Lii Malolen nai sira uma huhule-haradoin nara dale. Ma Ana oo husi heni basa nitur numa hatahorir mai boe.✡Mateos 4:23; 9:35

Lamatuak Yesus tao nahai hatahori hedi kusta esa

(Mateos 8:1-4; Lukas 5:12-16)

40 Faik naa, hambu hatahori hedi kusta esa neni Yesus neu. Boe ma ana sendek luu-langgan de noke tulu-falik neu Yesus nae, “Papa, ee! Tulu-fali au dei! Au bubuluk Papa bisa tao mamopo au heding ia, mita fo hatahori boso nunute au bali. Sadi Papa nau.”

41 Basa boe ma Yesus dalen tuda kasian neu hatahori naa, de Ana loo liman fo nafaroe neun, ma nae, “Memak Au nau! O hai leo!” 42 Medak neu ma, hatahori naa hedin mopon tutik ka. De ana hai leo. 43 Boe ma Yesus nadenu hatahori naa fali neu ngga, ma Ana fee nesenedak neun 44 nae, “Masaneda matalolole, o hai ena, tehuu ta bole tui esa boe na! Ma o muste tungga baꞌi Musa parendan dei. De muni malangga anggama muu dei, fo ana parisa o ao-inam, fo mete-nita o hedin mopon tebe ena, do beik. Boe ma muste muni o fefeem tanda makasi, mita fo basa hatahori bubuluk rae, o hai tebe-tebe ena.”✡Malangga Anggamar Hohoro-lalanen 14:1-32

45 Tehuu hatahori naa kalua, boe ma ana tui ndule sudi nai bee. De hatahori noꞌuk ka sangga fo rae ratonggo ro Yesus, losa-losak Ana ta bisa natudu matan nai nggorok dale. Ana leo nai mamana nees nai kada nggorok dea. Tehuu hatahorir sudi lua ruma bee mai fo sangga ratonggo roon.

Markus 2 ->