Mateos 4

Nitur malanggan soba-dou Lamatuak Yesus

(Lukas 4:1-13; Markus 1:12-13)

1 Basa boe ma Manetualain Dula-dalen nuni noo Yesus neni mamana nees neu, mita fo nitur malangga ina-huun soba-doun.✡Ibrani 2:18; 4:15 2 Numa naa Ana puasa hatu-leledon faik haa hulu dalen, de Ana ndoe nalan seli. 3 Neu Ana ndoe nalan seli talo naa, boe ma nitur malangga ina-huun mai soba-doun nae, “O ia, tebe-tebe Manetualain Anan, do? Mete ma tebe, na, parenda batur ia dadi reu nanaꞌak leo.”

4 Tehuu Yesus naselu nae, “Sama leo neni surak nai Manetualain Susura Malalaon dale nae:

‘Hatahori dae-bafok ta rasoda numa kada nanaꞌak mai.

Tehuu ara oo muste nenene Manetualain Dedeꞌa-kokolan boe,

ma tao tungga Ndia hihii-nanaun.’ ”✡

5 Boe ma nitu naa nuni noo Yesus neni kota Yerusalem neu, ndia Lamatuak kota malalaon. De ana noo Yesus hene reni mamanak fo demak mateꞌen manai Uma Huhule-haradoi Ina-huuk reu. 6 Boe ma nitu naa nae, “Mete ma tebe-tebe Manetualain Anan O, na, soba O boke dae muu leo. Sama leo neni surak nai Manetualain Susura Malalaon nae,

‘Neu ko Manetualain parenda Ndia atan nara ruma nusa tetuk do inggu temak mai,

fo ranea O.’

Nai Manetualain Susura Malalaon oo neni surak boe nae,

‘Neu ko ara ratanee rala O renik liman nara,

mita fo O ta koi laꞌe batu ma O ao-inam oo ta nambeta boe.’ ”✡

7 Tehuu Yesus naselu nae, “Hambu neni surak boe nai Manetualain Susura Malalaon dale nae,

‘Manetualain naa, ndia naena haak fo parenda o.

Huu naa de o boso soba-doun.’ ”✡

8 Boe ma nitu naa nuni noo Yesus neni letek fo demak mateꞌen esa poin neu. De ana natudu basa nusak kara marai dae-bafok roo basa ta hohoꞌan nara. 9 Natudu basa naar lalaꞌen, boe ma nitu naa nafada nae, “Sadi O sendek luu-langgam fo makaluku-makatele neu au, neu ko basa iar lalaꞌen au fee sara reu O.”

10 Tehuu Yesus ranggan nae, “Weeh, nitu! O malai heok ia leo! Huu Manetualain Susura Malalaon nae,

‘O muste makaluku-makatele neu Manetualain,

ma o muste maue-osa soa-neu kada Ndia mesa kana.’ ”✡

11 Nitu namanene nala naa, boe ma ana laꞌo ela Yesus. Boe ma Manetualain atan nara ruma nusa tetuk do inggu temak mai fo raono-lalau neun.

Lamatuak Yesus mulai fee nenorik numa Galilea

(Markus 1:14-15; Lukas 4:14-15)

12 Lelek naa, manek Herodes sese Yohanis Mana Saranik neni bui dale neu. Neu Yesus namanene talo naa, boe ma Ana fali neni Galilea neu.✡Mateos 14:3; Markus 6:17; Lukas 3:19-20 13 Ana neni Ndia nggoro-tadun Nasaret neu, basa de Ana laꞌo nakandoo neu leo numa nggorok Kapernaum. Nggorok naa, nai dano Galilea tatain, nai Sebulon no Naftali daen.✡Yohanis 2:12 14 No dalak naa, Ana tao tungga hata fo Manetualain mana toꞌu dedeꞌan Yesaya surak memak kana ena nae,

15 “Nai Sebulon daen ma Naftali daen,

mana deka no dano Galilea, nai lee Yarden boboan seri,

hatahori ta Yahudir oo leo rai naa boe.

16 Ara leo-laꞌo nai makiu-makahatuk dale,

tehuu hatematak ia ara mete-rita Manggaledok ena.

Ma Manggaledok naa nasaꞌa ena

soa-neu basa hatahorir fo bei ta ralela Manetualain.”✡

17 Numa lelek naa mai oo, Yesus mulai nanori hatahorir boe nae, “Ei muste masadea laꞌo ela ei sala-singgom mara, fo leo-laꞌo no lolo-laok leo! Hatematak ia basa hatahorir bisa maso dadi reu Manetualain hatahorin ena.”✡Mateos 3:2

Lamatuak Yesus nanggou hatahori mana puꞌa-dala haa fo tunggan

(Markus 1:16-20; Lukas 5:1-11)

18 Faik esa, Yesus laꞌok nesik dano Galilea tatain. Ana natonggo no hatahori dua kaꞌa-fadik kara. Esa nade Simon, tehuu hatahorir rasiꞌe roken rae, Petrus. Ma fadin nade Anderias. Ara dala iꞌak numa dano, nahuu dua sara mana puꞌa-dala. 19 Boe ma Yesus nanggou sara nae, “Woi, mai fo tungga Au leo! Ei masiꞌe sangga iꞌak, tehuu hatematak ia Au anori ei fo dadi miu mana sangga samanek.” 20 Dua sara ramanene rala naa, boe ma ara laꞌo ela sira dalan, de reu tungga tutik ka ro Yesus.

21 Basa naa, Yesus laꞌok nala faa bali, boe ma mete-nita Sabadeus anan nara. Kaꞌak nade Yakobis, ma fadik nade Yohanis. Dua sara rafafaꞌu ralole puꞌak nai ofak dale sama-sama ro sira aman. Boe ma Yesus nanggou dua sara fo tunggan. 22 Dua sara ramanene rala naa, boe ma ara laꞌo ela sira ofan ma aman, fo tungga tutik ka roon.

Lamatuak Yesus nanori hatahorir, ma tao nahai hatahori kamahedik kara

(Lukas 6:17-19)

23 Basa naa, Yesus asa laꞌok ndule profensi Galilea, fo fee nenorik nai hatahori Yahudi uma huhule-haradoin nara dale. Ana fee nenorik laꞌe-neu Manetualain Hara Lii Malolen, ma nafada dalan talo bee fo hatahorir bisa tungga Manetualain parendan. Ana oo, tao nahai basa hatahorir ruma sira hedi mata-matan nara mai boe.✡Mateos 9:35; Markus 1:39 24 Ta dook ka boe ma tutuik laꞌe-neu Yesus tataon naa, natanggela ndule basan losa profensi Siria. De hatahorir roo sira hatahori kamahedin nara fo hedis mata-matak kara reni Yesus reu. Ara oo reni hatahori fo nitu saꞌek, mulu bibik ma keko-luꞌuk boe. Boe ma Ana tao nahai basa sara. 25 Faik naa, hatahori noꞌun seli mai, de tunggan. Ara ruma profensi Galilea mai, ma ruma nusa kota salahunuk fo rasiꞌe roken rae, Dekapolis. Hambu laen bali, na, ruma kota Yerusalem mai, ruma profensi Yudea mai, ma ruma lee Yarden boboan seri mai.

<- Mateos 3 Mateos 5 ->