Mateos 18

Lamatuak Yesus ana nunin nara ratatane aok rae, see ndia moꞌon lenak

(Markus 9:33-37; Lukas 9:46-48)

1 Faik naa, Yesus ana nunin nara reni Yesus reu fo ratanen rae, “Papa! See ndia moꞌon lenak numa basa Manetualain hatahorin mai?”✡Lukas 22:24

2 Boe ma Yesus nanggou nala kakana ana esa, de nambaririik kana neu sira taladan. 3 De Ana nae, “Nenene matalolole! Hatahori mana nae maso dadi neu Manetualain hatahorin, ana muste nggati dala duduꞌan fo dadi sama leo kakana ana fo ta nalela nekededema aok.✡Markus 10:15; Lukas 18:17 4 Huu hatahori fo dale nekeloloen sama leo kakana ana ia, ana ndia dadi neu hatahori moꞌo-inahuuk lenak nai Manetualain matan. 5 Ma hatahori mana simbok nala hatahori kadiꞌik sama leo kakanak ia, nahuu ana namahere neu Au, na, hatahori naa simbok nala Au ena.”

Lamatuak Yesus fee nesenedak laꞌe-neu hatahori mana edo-podek fo hatahori laen tao salak

(Markus 9:42-48; Lukas 17:1-2)

6 Basa boe ma Yesus nafada neu sara bali nae, “Mete ma hambu hatahori tao nala kakana ana esa tungga eno-dala kasalak, losa ana ta namahere Au bali, na, besa-besa, ee! Malole lenak fuli batu moꞌok esa,*Susura dedeꞌa Yunani surak nae, ‘batu lelenduk’ fo ara pake mol hade-nggandum. neu hatahori naa boliin fo feen tena neni tasi demak dale neu. 7 Dae-bafok ia, memak mamana sosoek, nahuu hambu matak noꞌuk ka bisa tao nala hatahori tuda neni kilu-salak dale neu. Tehuu hatahori mana hambu sosoek lenak naa, ndia hatahori mana edo-podek fo hatahori laen tao salak.

8 Mete ma o tao salak munik o limam, do, o eim, na, tete henin leo! Malole lenak o maso nusa tetuk do inggu temak muu, muni kada lima seserik, do ei seserik lena heni ara nggari o muni aꞌi mbila ta kala matek muu, muni o limam ma eim dua sara.✡Mateos 5:30 9 Mete ma o tao salak munik o matam, na, edo henin leo! Malole lenak o maso nusa tetuk do inggu temak muu, muni kada mata seserik lena heni ara nggari o muni aꞌi mbila ta kala matek muu, muni o matam dua sara.”✡Mateos 5:29

Lamatuak Yesus fee lololek laꞌe-neu bibi lombo kala mopok esa

(Lukas 15:3-7)

10 Yesus kokolak bali nae, “Besa-besa, ee! Boso losak ei makadadaek kakana ana talo ia. Huu Manetualain atan nara ruma nusa tetuk do inggu temak mai, ndia ranea sara. Ma atar raa bisa maso faik bee a mesan, fo reu rafada Manetualain laꞌe-neu hatahorir ia dedeꞌan nara.

11-13 Ei duꞌa matalolole, te Au ae fee lololek talo ia: hambu hatahori esa naena bibi lombo natun esa. Faik esa boe ma hambu bibi lombo esa laꞌok sala dalan. Tungga ei duduꞌam, mana lolo naa muste tao hata? Neu ko ana laꞌo ela ndia bibi lombo kasio hulu sion nara reu letek lain, fo neu sangga bibi lombo kisek kala mopok naa.✡Lukas 19:10

Mete ma ana hambu falik kana, neu ko ana namahoko nalan seli mete-nita bibi lombo kisek naa, lena heni ana mete-nita ndia bibi lombon kasio hulu sio ta kala mopok. [Leo naak oo Au, Hatahori Dae-bafo Isi-isik ia, mai fo tao asoi-asoda hatahori mana laꞌok sala numa eno-dala ndoos mai boe.]† 14 Leo mae kada kakana ana esa ndia mopon oo, Au Amang manai nusa tetuk do inggu temak ta namahoko boe.”

Lamatuak Yesus nafada dalan talo bee fo ita malole tasafali to hatahori mana nasala neu ita

15 Yesus kokolak bali nae, “Mete ma o toranoo kamaherem nasala no o, na, muste muu matonggo muan. Mete ma kada ei dua ngga, dei fo mafada ndia salan. Mete ma ana nenene o kokolam, na, ei dua ngga malole masafali naa ena.✡ 16 Tehuu mete ma ana ta nau nenene o, na, muu moke mala o nonoom hatahori esa do dua fo reu sama-sama ro o. Basa de ei miu matonggo mia hatahori naa, fo kokolak seluk mian bali. Huu nai Manetualain Susura Malalaon neni surak nae, ‘Nai dedeꞌak esa dale, muste hambu sakasii dua do telu kokolan nara sama, dei fo bisa simbok sira kokolan nara raa.’✡ 17 Tehuu mete ma ana bei ta nau nenene ei, na, miu mafada saranik kara. Ma mete ma ana ta nau simbok no malole saranik kara kokolan, na, taon ndia sama leo hatahori ta mana nalela Manetualain. Mete ma taa, na, taon leo hatahori manggarauk sama leo mana susu bear.

18 Masaneda matalolole Au kokolang, ee! Hata fo ei kaꞌi-oren nai dae-bafok ia, naa Manetualain kaꞌi-oren nai nusa tetuk do inggu temak ena. Ma hata fo ei makaheik kana nai dae-bafok ia, naa Manetualain nakaheik kana nai nusa tetuk do inggu temak ena.✡Mateos 16:19; Yohanis 20:23

19 Ma Au afada seluk ae, mete ma hambu hatahori dua ruma ei mai, hule-haradoi no dalek esa, neu ko Au Amang manai nusa tetuk do inggu temak, baꞌe fee hata fo ara rokek. 20 Mete ma hambu hatahori dua do telu rakabua fo hule-haradoi sama-sama, nahuu sira iar, Au hatahoring, na, Au oo nai sira taladan boe.”

Lamatuak Yesus fee lololek laꞌe-neu penggawe ta mana fee ambon neu ndia nonoon

21 Basa boe ma Petrus mai natane Yesus nae, “Papa, au ae atane faa dei. Mete ma au toranoo kamahereng nasala laꞌi-laꞌik kana mbali au, na, au muste fee ambon mbalin laꞌe hida? Losa laꞌe hitu, do?”

22 Boe ma Yesus naselu nae, “Taa! O muste fee ambon neun losa laꞌe 7 laꞌe 70,‡Dedeꞌa Yunani nai ia, sosoa-ndandaan bisa nae, “laꞌe 7 laꞌe 70”. Bisa, “laꞌe 77”. losa o ta bisa reke mala sara bali.✡Lukas 17:3-4 23 Ei muste tao tungga talo naa, nahuu Manetualain naa sama leo manek esa fo reke no lutuk ndia penggawen nara hutan. 24 Neu ana mulai reke, boe ma ana nadenu ndia hatahorin fo neu noke nala penggawe esa mana nahuta doik neun, losa rifu-natuk kara.§Susura Malalaok dedeꞌa Yunani nai ia surak nae, “τάλαντον (talanton) 10.000”. Talanton esa belin, ndia hatahori mana maue-osa esa nggadin teuk 15 losa 20. Susura Malalaok dedeꞌa Indonesia nai ia nae, ‘talenta’. 25 Tehuu penggawe naa, ta bisa bae ndia hutan nara raa. Dadi manek parenda nae, ‘Miu seꞌo heni hatahori ia no basa sao-anan nara, fo ara dadi reu ata-dator. Ma seꞌo heni hata-heton lalaꞌen fo bae neu ndia hutan nara.’

26 Penggawe naa namanene nala naa, boe ma ana sendek luu-langgan neu manek matan fo kokoen nae, ‘Awii! Papa, ee! Papa manek tulun fee au fai lelak faa dei! Neu ko au bae falik au hutang nggara lalaꞌen.’ 27 Manek namanene nala naa, boe ma dalen tuda kasian neun. De ana koka heni memak penggawe naa hutan lalaꞌen. Boe ma ana nakamboꞌik penggawe naa.

28 Tehuu neu penggawe naa laꞌo dea neu, ana natonggo no nonoon esa, mana nahuta doik baꞌu anak ka mbalin.*Susura Malalaok dedeꞌa Yunani nai ia surak nae, “δηνάριον (dēnarion) 100”. Dēnarion esa belin, ndia, hatahori mana maue-osa esa nggadin faik esak ka. Dadi mete ma takasasamak kana to τάλαντον (talanton) 10.000 nai lain (lanek ka-24), na, hutak ia kadiꞌi anan seli. Boe ma ana humu nala nonoon, de hese neu boliin ma mbokan nae, ‘Heeh! Bae o hutam hatematak ia boe!’

29 Nonoon namanene nala naa, boe ma ana sendek luu-langgan fo kokoen nae, ‘Awii! Tia-lai, ee! Tulun fee au fai lelak faa dei! Neu ko au bae falik au hutang nggara neu o.’

30 Tehuu penggawe naa nae, ‘Ta bisa! Nau ta nau, o muste bae hatematak ia!’ Boe ma ana sese nonoon neni bui neu, losa ana bae nabasa hutan nara raa. 31 Neu manek penggawen laen nara mete-rita hata mandadik naa ena, boe ma dalen nara sona. De reu tui manek.

32 Manek namanene nala naa, boe ma noke penggawe ta kalela hadak naa. Ana dedeun nae, ‘Weeh, hatahori manggarauk! Au koka heni o hutam mara lalaꞌen, nahuu o moke au kasian neu o. 33 Tehuu tao hata de o ta maena dale kasian soa-neu o nonoom, sama leo au kasian neu o naa?’ 34 Manek naa namanasa nalan seli losa nadenu sese hatahori naa neni bui neu, mita fo ara tuni-ndenin, losa ana bae nabasa hutan nara lalaꞌen.”

35 Yesus nateꞌe Ndia tutuin, boe ma kokolak nae, “Au Amang manai nusa tetuk do inggu temak oo reke no lutuk talo naa boe. Neu ko Ana hukun ei, mete ma ei ta lilii heni tebe-tebe neu ei toranoo hatahori kamaherem mara sala-singgon nara.”

<- Mateos 17 Mateos 19 ->