1-2 Yesus kokolak basa talo naa, boe ma Ana nasare mbali lalai neu, de hule-haradoi nae:

“Ama Bonggik, ee. Au faing losa ena, fo Amak nakadedemak Au. Au ia, Amak Anan. Amak fee Au haak ena fo koladu basa hatahorir marai dae-bafok ia. Amak fee haak naa, mita fo Au fee masodak tetebes ta mana ketuk soa-neu basa hatahorir fo Amak loo liman ena, fo dadi reu Au hatahoring. Dadi hatematak ia, Au oke fo Amak nakadedemak Au, mita fo hatahorir mete-rita Amak ta neni babanggan. 3 Dalan fo hambu masodak tetebes ta mana ketuk naa, talo ia: hatahorir muste ralela Amak no tetuk, ndia Manetualain fo tetebes. Ta hambu laen bali. Ara oo muste ralela Au no tetuk boe, ndia Yesus Karistus, fo Amak nadenun neni dae-bafok ia mai ena. 4 Au atudu Amak ta neni babanggan nai dae-bafok ia ena. Au tao abasa ues naa ena, fo Amak feen neu Au ena. 5 Fai bakahulun, neu Ita bei ta takadadadik dae-bafok ia, Au sama-sama ua Amak. Faik naa, Au ta neni babanggan oo sama leo Amak ta neni babanggan boe. Hatematak ia Au ae fali uni Amak uu. Dadi Au oke fo Amak nakadedemak Au, mita fo Au ta neni babanggan fali leo fai bakahulun.”

6 Yesus hule-haradoi tamba nae, “Amak fee hatahorir marai dae-bafok ia ena, fo dadi reu Au hatahoring nggara. Au anori sara ena, fo ara ralela Amak. Ara dadi reu Amak enan, de Amak oo loo lima sara fo dadi reu Au enang boe. Ma ara tao tungga Amak Dedeꞌa-kokolan. 7 Hatematak ia ara ralela ena rae, basa dedeꞌak kara fo Amak loo lima sara neu Au naa ena, okan nai Amak. 8 Au anori sara ena, basa Dedeꞌa-kokolak fo Amak nafada nita sara neu Au. Ara oo simbok Dedeꞌa-kokolak kara raa boe. Ara oo bubuluk rae, Au numa Amak mai boe. Ma ara ramahere rae, Amak ndia nadenu Au uni dae-bafok ia mai.

9 Au hule-haradoi fee sara. Au ta hule-haradoi fee basa hatahorir marai dae-bafok ia. Tehuu Au hule-haradoi fee kada hatahori fo Amak loo lima sara neu Au, huu sira raa, Amak enan nara. 10 Basa hata fo dadi neu Au enang oo dadi reu Amak enan ena boe. Ma basa hata fo dadi reu Amak enan oo dadi reu Au enang ena boe. Ma Au hatahoring nggara raa, ndia rakadedemak Au. 11 Au ta leo ahuu nai dae-bafok ia ena bali, nahuu ta dook ka te Au ae fali uni Au Amang uu. Tehuu hatahori iar muste leo rahuu nai dae-bafok ia. Amak naa, malalaok tebe-tebe. Dadi Au oke fo Amak nanea sara, pake Amak koasan fo Amak feen neu Au ena. Au oo oke fo ara rakaesa dadi neu esa, sama leo Au akaesa ua Amak dadi neu esa boe. 12 Neu Au bei sama-sama ua sara nai dae-bafok ia, Au lopo-linu sara, nahuu ara dadi reu Amak enan ena. Au anea atalolole sara, mita fo ara rakaesa rakandoo ro Amak. Ta hambu esa mopon boe. Kada Yudas mesa kana ndia lenggo feꞌe, tungga hata fo Manetuaain Susura Malalaon surak memak kana ena numa lele uluk mai.[a]

13 Hatematak ia Au sangga fali uni Amak uu. Au afada dedeꞌak bebeik kara iar, neu Au bei nai dae-bafok ia. No dalak naa, Au hatahoring nggara dalen nara bisa ramahoko rakandoo, sama leo Au daleng oo namahoko boe. 14 Au afada Amak Dedeꞌa-kokolan neu sara ena. Hatahori laen marai dae-bafok ia mburuk ro Au hatahoring nggara, nahuu Au hatahoring ta leo-laꞌo sama leo sira. Au oo leo naak boe, te Au ta sama ua hatahori laen manai dae-bafok ia. 15 Neu Au hule-haradoi, Au ta oke fo Amak feꞌa kalua heni sara ruma dae-bafok ia mai. Taa! Tehuu Au oke fo Amak nanea sara, fo ara dook ka numa manggarauk mai. 16 Ara ta sama leo hatahori laen manai dae-bafok ia, sama leo Au oo ta sama leo hatahori laen manai dae-bafok ia boe.

17 Ama Bonggik, pake hata fo ndoos, fo tao sira dalen nara malalaok. Huu Amak Dedeꞌa-kokolan nara, ndoos. 18 Amak ndia nadenu Au uni dae-bafok ia mai. De Au oo adenu sara talo naa boe, mita fo ara leo-laꞌo ratanggela nai hatahori dae-bafok kara taladan. 19 Anea Au aong fo malalaok nakandoo soa-neu Amak. No dalak naa, Au hatahoring nggara oo ranea aon nara fo malalaok rakandoo soa-neu Amak boe. Amak Dedeꞌa-kokolan fo ndoos, ndia tao nala sara loo lima ao katematuan nara reu Amak.”

20 Yesus hule-haradoi tamba nae, “Au hule-haradoi ta soa-neu kada sira marai hatematak ia. Tehuu Au oo hule-haradoi soa-neu hatahori fo neu ko namahere neu Au boe, nahuu hatahori iar kokolan.

21 Ama Bonggik, Au oke fo sira basa sara bisa rakaesa dadi reu esa, sama leo Ita oo takaesa dadi teu esa boe. Au oo nau fo sira rakaesa ro Ita dadi teu esa boe, mita fo hatahori laen nara marai dae-bafok ia bisa ramahere rae, Amak mesa kana ndia nadenu Au. 22 Amak natudu Au ta neni babanggan neu hatahorir ena. Boe ma Au akadedemak kasa ena, sama leo Au. No dalak naa, sira rakaesa dadi reu esa, sama leo Ita oo takaesa dadi teu esa boe. 23 Au akaesa ua sara. Amak oo nakaesa no Au boe. Ara muste rakaesa dadi reu esa talo naa, losa ara leo-laꞌo dalek esa tebe-tebe. Mete ma ara leo-laꞌo dalek esa talo naa, hatahori laen nara marai dae-bafok ia neu ko bubuluk rae, Amak ndia sue-lai sara, sama leo Amak sue-lai Au. No dalak naa, ara oo bubuluk boe rae, Amak ndia nadenu Au.

24 Ama Bonggik. Amak sue-lai memak Au ena, de makadedemak Au numa faik Ita bei ta takadadadik dae-bafok ia mai. Hatematak ia Au daleng hii nalan seli fo basa hatahorir fo Amak loo lima sara neu Au naa ena, sama-sama ro Au. Mita fo ara bisa mete-rita Au ta neni babanggan.

25 Ama Bonggik dalen ndoos. Tehuu hatahorir marai dae-bafok ia ta ralela Amak. Au ndia alela Amak. Ma Au hatahoring nggara oo bubuluk boe rae, Amak ndia nadenu Au uni dae-bafok ia mai. 26 Au afada sara ena, Amak naa, See. Ma neu ko Au afada sara talo naa akandoo, nahuu Au nau fo ara bisa rameda tebe-tebe Amak susuen. Au nau susuek fo ara ramedak naa, sama leo Amak susuen fo Amak feen neu Au. Mita fo Au akaesa akandoo ua sara.”

<- Yohanis 16Yohanis 18 ->