1 Basa boe ma Yakob laꞌok nakandooo neni dulu neu. 2 Faik esa, ana mete-nita oe matak esa deka no nggorok esa. Bibi lombo bubuak telu, deka-deka numa naa, rahani fo rae rinu oe numa naa. Tehuu hambu batu moꞌok esa tatana nala oe matak naa. 3 Sira siꞌen, mete ma basa bibi hiek ma bibi lombor rakabubua ena, na, dei fo mana lolo keko heni batu naa, fo ndui oe fee bandar raa rinu. Rinu basa, ara tatana falik oe matak naa bali.

4 Boe ma Yakob neu natane mana lolor raa nae, “Wee! Ei numa bee mai?”

Ara raselu rae, “Air ia, numa nggorok Haran ia mai.”

5 Boe ma Yakob natane seluk bali nae, “Ei malela au toꞌong Laban, do? Laban naa, Nahor anan.”

Ara raselu rae, “Ai malelan.”

6 Boe ma Yakob natane nakandoo bali nae, “Ana bei sodak, do?”

Ara raselu rae, “Tou lasik bei sodak. Hena mete. Naa, ana inan, nade Rahel, ana foo neni bibi hien ma bibi lombon nara mai rinu oe nai ia. O mahani leo.”

7 Basa boe ma Yakob kokolak seluk bali nae, “Hatematak ia ledo bei nai lain. De malole lenak bandar bee fo rakubua nai ia ena, na, ei fee sara rinu leo. Basa dei fo ei foo meni sara reni mook reu, fo raꞌa naꞌu bali.”

8 Tehuu ara rasabara rae, “Awii, ta bisa talo naa! Ita muste tahani basa mana lolor reni basa bandan nara fo rakabua nai ia dei, dei fo ita keko heok batu naa, fo fee bandar rinu.” 9 Yakob bei kola-kola no hatahorir raa, te Rahel losa no aman bibi hien ma bibi lombon nara. Ana ndia nasiꞌe foo bandar raa.

10 Neu Yakob mete-nita Rahel no bibi hien ma bibi lombon nara, boe ma neu keko heok oe matak naa tatanan. De ana hani toꞌon bandan nara. 11 Basa boe ma neu holu nala Rahel, de ana idun ma ana buꞌi. 12 Ana tui Rahel nae, “Fadi! Au ia, o papam fadin Ribka anan.” Boe ma Rahel nalaik fali neu ngga, fo neu nafada aman.

13 Neu Laban namanene Rahel tutuin laꞌe-neu Yakob, ndia fadin Ribka anan, boe ma ana nalaik neu sorun. Neu natonggon, Laban holu nalan de idun, basa boe ma noo Yakob neni ndia uman neu. Boe ma Yakob tui basa-basan neu Laban. 14a De Laban kokolak nae, “Memak tebe! Ita dua ngga nufaneluk kara!”

14b Neu Yakob leo no sara bulak esa ena, 15 Laban kokolak noon nae, “Talo ia, Ako! Au ta nau o maue-osa mudak fee au, nahuu ita dua ngga nufaneluk. O moke seseba-babaek baꞌu hata?”

16 Laban naa, naena ana inak dua. Kaꞌak nade Lea. Fadik nade Rahel. 17 Lea matan mana mamalek.*Dedeꞌa Ibrani nai ia, ta manggaledok Tehuu Rahel matan manaꞌa hiek sudi selik kana, ma ao-inan neulauk. 18 Yakob sue Rahel. De ana naselu Laban nae, “Au aue-osa fee toꞌo teuk hitu, sadi toꞌo fee au sao ala Rahel.”

19 Boe ma Laban naselu nae, “Au akaheik! Malole lenak au fee Rahel sao no o, fo au nufanelu heli-heling! Ana hae sao no hatahori laen. De talo kada ia fo maue-osa fee au leo.” 20 Boe ma Yakob naue-osa teuk hitu, mita fo ana hambu Rahel. Tehuu ana sue nalan seli neu Rahel. Dadi teuk hitu naa, ana namedan sama leo kada faik hida a.

21 Seli teuk kahituk kara raa, boe ma Yakob fee nesenedak neu Laban nae, “Toꞌo! Au aue-osa fee toꞌo teuk hitu ia ena, de hatematak ia fee au sao ua Rahel leo.”

22 Boe ma Laban tao feta kabin, de noke basa hatahorir marai nusak naa. 23-27 Leꞌodaen naa, Laban ta fee Rahel, tehuu ana nadenu Lea maso neni Yakob laan neu. De Yakob sunggu-soro noon. Neu beꞌe-main, dei de Yakob bubuluk nae, ndia sunggu-soro no Lea. Boe ma Yakob neu nasabara no Laban nae, “Tao hata de toꞌo tao kekedik neu au? Au aue-osa fafandek lima-eing teuk hitu dalen fo hambu Rahel. Tehuu tao hata de toꞌo nggati no Lea?”

Boe ma Laban naselu nae, “O boso mamanasa talo naa! Tungga ai dala-hadan nai ia, fadik ta bole sao nakahuluk kaꞌak. De malole lenak talo kada ia! O mahani losa feta kabin fai hitu ia basa dei. Dei fo o hambu Rahel, sadi o maue-osa fee au teuk hitu bali.” Boe ma Laban fee ndia ata inan, nade Silpa fo dadi neu Lea atan.

28 Yakob nakaheik. Huu naa de neu feta faik hitu naa basa, boe ma Laban fee Rahel sao nala Yakob. 29 Basa de Laban fee ndia ata inan esa bali, nade Bilha, fo dadi neu Rahel atan. 30 Basa boe ma Yakob sunggu-soro no Rahel. Ana sue Rahel lena heni Lea. De ana naue-osa tamba teuk hitu bali fee ari-aman.

31 Tehuu MANETUALAIN bubuluk Yakob sue Rahel lena heni Lea. Boe ma Ana fee luas fo Lea hambu anak, tehuu Rahel beik. 32 De Lea nairu, boe ma ana bonggi ana touk esa. Ana foi kanak naa, nade Ruben (fo sosoa-ndandaan ‘mete neu, hambu anak’),†Nai dedeꞌa Ibrani, Ruben sosoa-ndandaan ‘mete neu, hambu anak’. Ma dedeꞌa deꞌek naa liin sangga sama leo dedeꞌa deꞌek esa sosoa-ndandaan nae ‘ana mete-nita au sususang ena’. nahuu ana nae, “MANETUALAIN memak mete-nita au sususang ena. Huu naa de hatematak ia, au saong oo nau mete au boe.”

33 Basa boe ma Lea nairu bali, de ana hambu ana touk esa. Ana foi kanak naa nade Simeon (fo sosoa-ndandaan fama te ‘hatahori namanene ena’), nahuu ana nae, “MANETUALAIN namanene ena nae, au saong ta tao matak neu au. Huu naa de Ana fee tamba anak esa bali neu au.”

34 Basa de, Lea nairu bali, boe ma ana bonggi ana touk esa bali. Ana foi kanak naa nade Lewi,‡‘Lewi’ sosoa-ndandaan fama te ‘neni paꞌak’, do ‘holu deka-deka’. nahuu ana nae, “No anak ia au dedeꞌang basan ena. Neu ko au saong ta bila no au, nahuu au bonggi feen ana touk telu ena.”

35 Basa boe ma Lea nairu bali, de ana hambu ana touk esa. Ana foi kanak naa, nade Yahuda (fo sosoa-ndandaan fama te ‘kokoa-kikiok’), nahuu ana nae, “Oek ia, au nau koa-kio MANETUALAIN!” Basa de Lea ta bonggi leo.

<- Tutui Makasososak 28Tutui Makasososak 30 ->