1 Basa teuk salahunu haa, boe ma au fali uni kota Yerusalem uu, sama-sama ua Barnabas. Ma ai dua ngga oo, mia hatahori kamaherek ta Yahudi esa, nade Titus.[a] 2 Au uni naa uu, nahuu Manetualain ndia nadenu. Basa boe ma au tui fee lasi-lasi Karisten nara Hara Lii Malole fo au anorik neu hatahori ta Yahudir naa ena. Faik naa, au kokolak aong ua sara, mita fo ara parisa ratalolole hata fo au fee nenorik naa, ndaa do taa. Mete ma ara raketu rae, ta ndaa, na, hatahori bisa nae, au ue-tataong kada hie-hie!

3 Ara ramanene rala au kokolang talo naa, boe ma ara simbo no malole. Ara oo simbo rala Titus no malole boe. Leo mae ndia hatahori ta Yahudi, tehuu ara ta rakasetik kana sunat. 4 Tehuu faik naa, hambu toranook ketuk ta rakaheik, nahuu ara fee nenorik laen. Sira raa, Karisten pepeko-lelekok. Boe ma ara mai rakasetik ro neneek Yesus Karistus hatahori ta Yahudin, fo tungga basa hatahori Yahudi anggaman hohoro-lalanen lalaꞌen. Naa te Yesus Karistus nakamboꞌik ita ena, huu naa de ita ta neka-lili to hohoro-lalanek kara raa, sama leo ata-dator. 5 Leo mae rakasetik talo naa, tehuu ai ta nau simbok faa boe na. No dalak naa, ei bisa mamahere makandoo neu Hara Lii Malole fo au fee nenorik naa ena. Naa memak tetebes.

6 Lasi-lasik kara raa simbok no malole au nenoring naa, ma ara ta tia-tamba hata-hata bali. Huu Manetualain ta memete matak. De leo mae sira hatahori moꞌo-inahuuk, do kadiꞌik, naa nenenin taa.[b] 7 Nenenin lenak ndia: ara bubuluk rae, Manetualain here nala au ena, fo uni Hara Lii Malole fee hatahori ta Yahudi. Sama leo Ana oo nadenu Petrus fo neni Hara Lii Malole naa fee hatahori Yahudi boe. 8 Manetualain fee koasa neu Petrus ena, fo dadi neu nedenuk soa-neu hatahori Yahudi. Leo naak oo Ana fee koasa neu au fo dadi uu nedenuk soa-neu hatahori ta Yahudi boe. 9 Faik naa, hatahorir duꞌa ena rae, Yakobis, Petrus,*Susurak dedeꞌa Yunani nai lalanek ia pake nadek, Kefas. Naa, Petrus naden laen. ma Yohanis, malangga saranik. Neu telu sara bubuluk rae, Manetualain natudu dale susuen neu au ena fo akalalaꞌok Lamatuak ue-osan, boe ma ara rambariik mai ratoꞌu limak ro au ma Barnabas. Naa dadi neu tanda, ai basa ngga dalek esa. Ara rakaheik fo ai meni Hara Lii Malole fee hatahori ta Yahudi, ma sira ndia reni soa-neu hatahori Yahudi. 10 Ara ta roke hata-hata bali. Kada ara fee nesenedak neu ai fo boso lilii-ndondou tulu-fali hatahori hata taak kara. Memak naa ndia au nau taon ena.

11 Laꞌe esa Petrus neni kota Antiokia mai, boe ma au kaꞌi-oren no ledo-ledo, nahuu ana tao sala. 12 Neu ana bei fo mai, ana namahoko nanggatuuk naꞌa sama-sama no Karistus hatahori ta Yahudin nara. Tehuu neu Yakobis nonoon hatahori Yahudir mai, boe ma Petrus nakaheok numa toranoo ta Yahudi mai, ma ta nanggatuuk naꞌa no sara bali. Ana namataꞌu neu hatahori Yahudi fo mana fee nenorik naa nae, Karistus hatahorin nara muste toꞌu rahere basa hatahori Yahudi anggaman hohoro-lalanen lalaꞌen, ma muste leo-laꞌo rabinggak ruma hatahori ta Yahudir mai.

13 Hatahori Yahudi laen nara mete-rita Petrus tataon naa, ara oo tao tungga talo naa boe. Losa Barnabas oo tungga tasoso ro sira dea-matan nara raa boe. 14 Tehuu neu au mete-ita sira ta tungga tebe-tebe Hara Lii Malole hihii-nanaun ena, boe ma au kaꞌi-ore memak neu Petrus numa sira matan ae, “Kaꞌa Peꞌu! Kaꞌa ia, memak hatahori Yahudi. Tehuu Manetualain soi dalak ena fo hatahori mana namahere neu Yesus Karistus nakamboꞌik numa hatahori Yahudi anggaman hohoro-lalanen nara mai. Kaꞌa simbo nala dedeꞌak naa ena. Talo bee de hatematak ia kaꞌa bei nau nakasetik hatahori ta Yahudi, fo tao tungga anggama Yahudi hohoro-lalanen bali?”

15 Au kaꞌi-ore Petrus talo naa, nahuu ai dua ngga sama-sama hatahori Yahudi. Ai hatahori nusa Yahudin ta sama no hatahori nusa-nusak laen nara, nahuu ai hatahori nusa Yahudin malela Manetualain dook ka ena. 16 Tehuu hatematak ia ita oo bubuluk boe tae, Manetualain ta simbok hatahori esa boe na no malole, nahuu ana tao tungga anggama hohoro-lalanen. Manetualain simbok hatahori no malole, mete ma ana namahere neu Yesus Karistus, ta huu ana tao tungga anggama hohoro-lalanen. No kada hatahori namahere neu Karistus, dei fo Manetualain henggenee memak kana nae, ana ta naena salak ena.[d]

17 Huu naa de ita fee nenorik tae, Manetualain simbok hatahori no malole, nahuu namahere neu Yesus Karistus. Tehuu hambu hatahori Yahudi ndia nakasasaꞌek salak neu ai nae, ai sala ena, nahuu ai mamahere neu Karistus, tehuu ta tungga anggama Yahudi hohoro-lalanen nara. Ei oo nau ndae salak talo naa boe, do? 18 Mete ma au toꞌu falik anggama hohoro-lalanen, fo au akamboꞌik henin ena naa, na, dei fo au sala! 19-20 Memak fai bakahulun au aote tebe-tebe tao tungga anggama Yahudi hohoro-lalanen nara, mita fo au malole ua Manetualain. Tehuu au oo ta bisa boe. Huu naa de hatematak ia au nggari heni hohoro-lalanek kara raa fo leo-laꞌo akaesa ua Karistus. No dalak naa, dei fo Manetualain simbok au no malole. Taon neu, au mate neni londak numa ai ngganggek lain sama-sama ua Karistus. Hatematak ia au ta ndia asoda bali, tehuu Karistus ndia nasoda nai au aon dale. Au hambu masoda beuk ia, nahuu au amahere neu Manetualain Anan. Ana sue nalan seli neu au, losa Ana mate nggati au. 21 Ma Manetualain simbok nala au nahuu Ndia dale susuen, ta huu au tungga anggama hohoro-lalanen nara. Mete ma hatahori bisa malole no Manetualain nahuu tungga anggama hohoro-lalanen, na, naa sosoa-ndandaan nae, Karistus mamaten naa hie-hie a mesan.

Naa ndia au afada neu Petrus asa numa Antiokia.

<- Galatia 1Galatia 3 ->