Nedenuk kara Tutuin 13

Hatahori Antiokiar radenu Barnabas no Saulus

1 Numa kota Antiokia, hatahori noꞌuk ka ramahere neu Yesus ena. Hambu hatahori hida fo Manetualain pake sara dadi neu Ndia mana toꞌu dedeꞌan, ma hambu hida bali fo Ana pake sara fo ranori hatahorir. Sira raa, ndia:

Barnabas,

Simeon, fo hatahorir rasiꞌe roken rae ‘Tou Nggeok’,*

Lukius, numa kota Kerene mai,

Menahem, fo ara rakaboin numa kadiꞌi anan mai sama-sama no manek Herodes,†

ma Saulus.

2 Faik esa, ara puasa ma rakabua fo rakaluku-rakatele neu Manetualain. Boe ma Manetualain Dula-dale Malalaon nafada sara nae, “Here mala Barnabas no Saulus. Te Au ue-osang noꞌuk ka. De ara muste tao ue-osa fo Au ae baꞌe fee sara.”

3 Neu ara puasa ma hule-haradoi basa, boe ma ara ndae liman nara reu Barnabas no Saulus fo tabis asa. Basa boe ma ara radenu dua sara reu rakalalaꞌok Lamatuak ue-osan.

Barnabas ma Saulus reni pulu Siprus reu

4-5 Neu Manetualain Dula-dale Malalaon fee parenda neu Barnabas no Saulus fo dua sara laꞌo ndule basa mamanak kara, makasososan ara reni kota esa nai tasi tatain reu, nade Seleukia. Yohanis (hatahori naa ndia ara roken oo rae, Markus boe), ana oo tungga sama-sama no sara boe. Ara losa naa, ara saꞌe ofak fo reni pulu Siprus reu, de ara konda numa kota esa, nade Salamis. Numa naa, ara rasiꞌe maso reni hatahori Yahudir uma huhule-haradoin reu fo ara fee nenorik laꞌe-neu Manetualain Dedeꞌa-kokolan neu hatahorir.

6-8 Boe ma ara laꞌo tuli-tuli numa nggorok esa mai neni nggorok esa neu, de ara losa kota esa nai pulu naa suꞌun seri, nade Pafos. Nggubenor leo nai kota naa. Ndia naden Sergius Paulus. Ndia naa, hatahori malelak. Neu ana namanene nae, Barnabas asa mai nai ndia kotan naa ena, boe ma ana nadenu hatahorir fo reu roke sara, te dalen hii nalan seli nau nenene nenori-nefadak numa Lamatuak mai ena.

Tehuu numa naa oo, hambu hatahori Yahudi esa boe, nade Bar Yesus (naden laen tungga dedeꞌa Yunani rae, ‘Elimas’). Hatahori ia, mana teka-dokik. Ana nasiꞌe pepeko-leleko hatahorir nae, ndia oo Manetualain mana toꞌu dedeꞌan boe. Ana natia-laik malole no nggubenor naa. Neu Barnabas asa mai, boe ma ana dudunggu nggubenor fo boso simbok kasa. Ana soba-soba nakabubusak nggubenor naa fo hae namahere neu Yesus.

9 Tehuu Manetualain Dula-dale Malalaon fee koasa neu Saulus (fo ara oo roken rae, Paulus boe), boe ma nakabubula matak fo mete nakateteek mana teka-dokik naa. Boe ma nae, 10 “Heeh! Elimas! Nitu anan o! Mana pepeko-lelekok! Losa faik hida bali fo o bei nau kedi-ira hatahori? O laban basa hata fo neulauk. No dalak naa, ai bubuluk o tungga nitur malangga ina-huun. O boso bei tao talo naa bali! O boso soba-soba kena Lamatuak dala ndoon bali! 11 Heeh! O nenene, ee! Neu ko Lamatuak huku-doki o. O matam neu ko poke fo o ta bisa mete-mita hata esa boe na losa faik hida dalen.”

Paulus kokolak basa talo naa, boe ma hatahori naa matan poke tutik ka leo. De ana laꞌok nafaroroe, fo sangga hatahorir toꞌu ndia liman, mita fo rakalalaꞌok kana.

12 Neu nggubenor mete-nita no mata heli-helin talo naa, ma ana namanene Barnabas asa fee nenorik laꞌe-neu Yesus, ana heran bali-bali, basa boe ma ana namahere neu Yesus.

Ara reni Tutui Malole neni kota Antiokia esa neu bali nai profensi Pisidia

13 Paulus asa saꞌe ofak numa kota Pafos nai pulu Siprus mai, reni kota esa nai profensi Pamfilia, nade Perga reu. Ara konda ofak numa naa, boe ma Yohanis Markus laꞌo ela sara de ana fali neni Yerusalem neu. 14 Ara laꞌok tungga mada lai ruma Perga mai reni kota Antiokia nai profensi Pisidia reu.

De ara laꞌok losa kota naa. Neu hatahori Yahudir fai hahae tao ue-osan, boe ma ara tungga reu hule-haradoi numa hatahori Yahudir uma huhule-haradoin. 15 Faik naa, ara lees numa baꞌi Musa susuran, ma numa Manetualain mana toꞌu dedeꞌan laen nara susuran mai. Boe ma uma huhule-haradoik naa malanggan nara roke Paulus asa rae, “Ama nggara ein. Mete ma ei mae helu hata neu ai, na, ai hule no hada-horomatak fo kokolak tao matea basa ai manai iar dalen.”

Paulus mulai kokolak neu hatahori Yahudir marai Antiokia

16 Boe ma Paulus nambariik neu mata. Ana botik liman fo noke sara nenee. De ana mulai kokolak nae, “Toranoo Israꞌel nggara ein. Ma basa ina-ama lalaꞌen fo mana maso anggama Yahudi, nahuu ei dalem mara oo hii ralan seli neu hatahori Israꞌel asa Manetualain boe. Au oke ei pasa ndiꞌi doom mara fo nenene au!

17 Manetualain here nala ita hatahori Israꞌel bei-baꞌin nara numa lele uluk mai ena. Neu ara reu leo numa dae Masir, fo ta sira nusa heli-helin, Manetualain fee sara leo no mole-damek, losa tititi-nonosin nara tamba ramanoꞌu. Basa boe ma Manetualain pake Ndia koasa moꞌon fo Ana noo sara kalua numa Masir mai.✡Kalua numa Masir mai 1:7; 12:51 18 Basa naa, ara leo lali-lali numa mamana nees, losa teuk haa hulu dalen. Leo mae ara langga batu rakandoo, tehuu Manetualain nakalalaꞌok kasa no kada dale narun fo ta namanasa sara.✡Susura Rerekek 14:34; Tui Seluk laꞌe-neu Dala Masodak 1:31 19 Basa boe ma Manetualain nakalulutu hatahori nusak hitu nai dae Kanaꞌan. De Ana babaꞌe daen nara neu ita bei-baꞌin nara fo dadi neu sira dae pusakan.✡Tui Seluk laꞌe-neu Dala Masodak 7:1; Yosua 14:1 20 Ara leo-laꞌo talo naa losa teuk natun haa lima hulu (450).

Basa boe ma Manetualain soꞌuk fee sara mana maketu-maladi dedeꞌak kara, fo rakalalaꞌok kasa, losa Manetualain soꞌuk nala Ndia mana toꞌu dedeꞌan esa, nade Semuel.✡ 21 Neu Semuel dadi neu Manetualain mana toꞌu dedeꞌan, ita bei-baꞌin nara hihiik ka hambu manek esa dei. De Manetualain soꞌuk nala Kis anan, nade Saul, numa leo Benyamin mai. Saul toꞌu parenda losa teuk haa hulu.✡ 22 Basa boe ma Manetualain hai henin. De Manetualain soꞌuk nala Isai anan, nade Dauk dadi neu mane beuk nggatin. Manetualain bubuluk Dauk dalen nae, ‘Isai anan, Dauk ia, ndaa Au daleng. Neu ko ana tao natetu basa Au hihii-nanaung lalaꞌen.’✡ 23 Lelek naa, Manetualain helu-bartaa nae nadenu Dauk tititi-nonosin esa, fo tao nasoi-nasoda hatahori Israꞌel asa numa sala-singgon nara mai. Au nau afada basa toranook kara ae, Dauk tititi-nonosin fo Manetualain helu-bartaak naa, ndia Yesus.”

Paulus nae Yesus naa, Hatahori fo Manetualain helu-bartaa fo nae nadenun mai

24 Paulus tuti kokolan nae, “Neu Lamatuak Yesus bei ta mulai ue-osan, hambu hatahori esa, nade Yohanis, neu nafada hatahori Israꞌel asa nae, ara muste hahae numa sala-singgon nara mai, fo fali tungga Lamatuak. Basa naa, ara muste sarani fo dadi neu tanda nae, sira malole ro Lamatuak ena.✡ 25 Tehuu neu Yohanis ue-osan sangga basan ena, ana nafada hatahorir nae, ‘Ei boso duꞌa mae, au ia, Hatahori fo Manetualain helu-bartaa numa lele uluk mai ena fo nae nadenun mai. Masaneda matalolole! Ei muste mahani Hatahori esa fo neu ko nae mai. Ndia ta neni babanggak lena heni au, losa au dadi uu kada ana neondan oo au ta andaa boe.’‡

26 Toranoo nggara ein! Ei fo memak baꞌi Abraham tititi-nonosin, ma ei laen nara fo dalem mara hii malan seli neu Manetualain. Nenene neu au dei! Manetualain nafada dedeꞌak ia neu ita ena, fo ita bisa bubuluk tala Ndia eno-dala masodan. Ana tao nasoi-nasoda ita numa ita sala-singgon nara mai. 27 Numa lele uluk mai, Manetualain pake Ndia mana toꞌu dedeꞌan nara fo ara surak rafada hatahorir laꞌe-neu Hatahori fo Manetualain helu-bartaa nae nadenun mai naa. Boe ma ita malangga anggaman nara, ma hatahori laen nara marai Yerusalem, ara lees laꞌi-laꞌik ka ena hata fo mana toꞌu dedeꞌak kara surak ena. Tungga fai hahae tao ue-osa, ara maso reni uma huhule-haradoik dale reu, fo ara lees laꞌe-neu Hatahori naa nai Manetualain Susura Malalaon dale.

Tehuu ara ta ralela rae, Hatahori fo Manetualain helu-bartaa nae nadenun mai naa ena, ndia Yesus. Basa boe ma ara sangga dalak fo hukun mates neun. Naa te dalak ia oo ndaa no hata fo Manetualain mana toꞌu dedeꞌan nara surak ena boe. 28 Ara sangga-sangga dedeꞌak ro Yesus fo rae ike ratudan, tehuu ara ta hambu Ndia salan hata faa boe na. Leo mae talo naa, tehuu ara reu roke nggubenor Pilatus fo tao risan.✡ 29 Nggubenor naa nakaheik, boe ma ara paku londa Yesus neu ai ngganggek lain, losa Ana mate. Tehuu basa iar oo ndaa no hata fo Manetualain mana toꞌu dedeꞌan nara surak ena boe. Basa boe ma ara rakonda ao-mbaa mamaten numa ai ngganggek lain mai, de ara koꞌo renin reu taon neu rates dale.✡ 30 Tehuu Manetualain pake Ndia koasan, fo nasoda falik Yesus numa mamaten mai.

31 Neu Yesus nasoda fali numa mamaten mai ena, Ana natudu aon laꞌe noꞌuk ka neu hatahorir. Sira raa, ndia mana sama-sama ro Yesus ruma profensi Galilea mai fo reni Yerusalem reu. Ma sira raa ndia hatematak ia dadi reu sakasii fee hatahori Israꞌel asa.”✡Nedenuk kara Tutuin 1:3

Paulus natudu nae, Lamatuak pake Ndia mana toꞌu dedeꞌan nara ena, fo rafada memak laꞌe-neu Yesus

32-33 Paulus tuti kokolan nae, “Talo ia! Ai dua ngga, ndia au ua Barnabas ia, numa dae dook ka mai ena fo mafada ei, mita fo ei bubuluk mae, hata fo Lamatuak helu-bartaa neu ita bei-baꞌin nara ena, hatematak ia basa sara mori-dadi ena. Manetualain tao nasoda falik Yesus numa mamaten mai ena. Nai susura Sosoda Kokoa-kikiok kara nomer kaduan, Manetualain pake hatahori ena fo surak laꞌe-neu Yesus, Hatahori fo Ana helu-bartaa nae nadenun mai naa nae,

‘O ia, Au Anang.

Faik ia, Au soꞌuk ala O fo toꞌu parenda.’✡

34 Numa lele uluk mai Manetualain helu-bartaa ena nae, neu ko Ana nae tao nasoda falik Hatahori fo Ana helu-bartaa nae nadenun mai naa ena, de Hatahori naa ta mate bali. Huu naa de Manetualain pake mana toꞌu dedeꞌan ena fo surak nae,

‘Numa lele uluk mai Au ndara fangga hehelu-bartaak ena ua mane Dauk fo ae feen babaꞌe-babatik.

Dadi hatematak ia Au oo nau ndara fangga hehelu-bartaak naa bali ua o boe, nahuu o dadi muu mane Dauk tititi-nonosin.’✡

35 Hambu Sosoda Kokoa-kikiok kara laen rae,

‘Lamatuak ta ela O Hatahori Malalaon ao-mbaa mamaten,

fo dadi noe nakalulutu nai Ndia raten dale.’✡

36-37 Ndondoon talo ia: Sosoda Kokoa-kikiok kara iar ta dudu neu kada Dauk mesa kana! Ita bubuluk talo naa, nahuu mane Dauk tao hata fo neulauk noꞌuk ka ena soa-neu ndia hatahori nusan, basa boe ma ana mate. De ratoin, boe ma ao-mbaa mamaten noe heni basan ena. Dadi ita bubuluk tae, Sosoda Kokoa-kikiok kara raa ta dudu neu Dauk, tehuu dudu neu Hatahori laen. Hatahori fo Ana dudu nalak naa, neu ko mete ma Hatahori naa maten ena, na, Manetualain tao nasoda falik kana numa mamaten mai. Huu naa de ao-mbaa mamaten ta noe nakalulutu faa boe na.

38-39 Dadi toranoo nggara ein, nenene matalolole! Hatahori naa, ndia Yesus! De mete ma ita tamahere neun, dei fo Ana nau lemba-nasaa sala-singgok kara, fo mete ma tungga ndoon, na, ita mesa ngga ndia muste lemba-tasaa. No dalak naa, Manetualain koka heni ita sala-singgon nara. Tehuu ita bubuluk ena tae, leo mae ita tao tungga basa baꞌi Musa hada hohoro-lalanen lalaꞌen oo, naa mesa kana bei ta bisa tao ita ndaa nai Manetualain matan. 40-41 Huu naa de ei muste duꞌa matalolole. Boso losak, hata fo Manetualain mana toꞌu dedeꞌan lele uluk kara rafada ena, tuda laꞌe ei. Ara surak ena rae,

‘Besa-besa ei hatahori mana makatitiik kara fo soa mete hatahori no kada pui a!

Huu Au, Manetualain, tao sudi hata fo hatahorir heran bali-bali;

tehuu neu ko ei simbo mala ei babaꞌem, fo ei mate ndua hadak.

Au tao dalak esa neu ei bei masodak,

tehuu ei ta nau simbok.

Leo mae hatahorir rafada ena oo,

ei ta nau malela boe.

Malole lenak ei duꞌa matalolole dedeꞌak kara iar, mita fo ei oo heran boe.’✡

Dadi toranoo nggara ein. Duꞌa matalolole hata fo au afada bebeik kara ena. Boso nggari heni hata fo ei mamanene malan bebeik kara ia ena, sama leo hatahori mana makatitiik kara tatao-nonoꞌin. Au kokolang baꞌu kada naa. Makasi noꞌuk ka.”

42 Paulus no Barnabas kokolak basa, boe ma ara rambariik fo rae laꞌo ela uma huhule-haradoik naa. Tehuu hatahorir maruma naa roke fo ara fali mai seluk nai menggu mana maik, fo ara kokolak no lutun lenak bali, hata fo ara kokolak bebeik kara raa ena. 43 Neu ara kalua numa uma huhule-haradoik naa dale mai, hambu hatahori noꞌuk ka ruma naa mai, reu laꞌo tungga Paulus no Barnabas. Basa boe ma dua sara fee nenori-nefadak neu sara rae, “Ita bubuluk tae, Manetualain dalen malolen seli neu ita. Huu naa de ei oo muste toꞌu mahere tebe-tebe neu Ndia boe.”

Hatahori Yahudi malanggan nara timba heni Paulus asa

44 Neu menggu mana maik, ndaa no hatahori Yahudir fai hahae tao ue-osan, ela kada baꞌuk ka fo basa hatahorir marai kota naa mai fo rae nenene Lamatuak Dedeꞌa-kokolan. 45 Tehuu neu hatahori Yahudi malanggan nara mete-rita hatahori noꞌuk ka nau mai fo nenene Paulus asa, boe ma dalen nara mana kikitok kara. Neu Paulus bei kola-kola, ara rasimbo bafak no huu-suꞌun taa roon, ma ara kokolak rakatutudak Paulus asa.

46 Tehuu Paulus asa ta rakadedeak, ma ara kokolak ta no bii-bambik bali. Ara rae, “Memak Manetualain soi dalak nakahuluk fee ita hatahori Yahudir, ma Ana fee Hara Lii Malolen neu ita ena. De naa memak nandaa! Tehuu ei ta nau simbok. Dadi no ei here talo naa, ei matudu mae, ei ta mandaa hambu masodak seku neu mia Manetualain. Dadi hatematak ia, ai mae meni Hara Lii Malole naa neni hatahori nusa-nusak laen nara reu, nahuu ei timba henin ena. 47 Huu Manetualain nadenu ai, sama leo Yesaya surak ena nae,

‘Au soꞌuk ala ei ena, fo dadi sama leo lantera fo neni manggaledok

fee hatahori nusa-nusak laen nara, fo hatahori ta Yahudir,

naa fo ei tao manggaledo dalak fo mana neni Au mai naa,

ma naa fo Au akamboꞌik kasa numa sira sala-singgon nara mai.

Ei oo muste matudu dalak naa nai dae-bafok ia numa suꞌun seri mai neni suꞌun seri neu boe.’ ”✡

48 Neu hatahori laen fo hatahori ta Yahudir ramanene talo naa, boe ma ara ramahoko ralan seli. De ara koa-kio neu Manetualain rae, “Koa-kio Lamatuak! Lamatuak Hara Lii Malolen naa neulaun seli!” Ma nai naa, hambu hatahorir fo Manetualain henggenee memak kasa numa lele uluk mai ena, fo bisa rasoda seku neu ro Ndia. Boe ma basa sara ramahere neu Lamatuak Yesus.

49 Manetualain Dedeꞌa-kokolan, ara tui-benggan numa bafak mai neni bafak neu, de natanggela ndule basa nusak naa.

50 Numa kota naa, hambu hatahori moꞌo-inahuuk kara, inak ma touk. Hambu ketuk fo dalen nara hii ralan seli neu Lamatuak. Tehuu hatahori Yahudi malanggan nara mai fo dudunggu hatahori moꞌo-inahuuk kara raa, losa ara husi kalua heni Paulus no Barnabas numa sira nusan mai. 51 Ara kalua numa kota naa mai, boe ma dua sara tao tungga hadak esa ndia nggafu heni afu numa ein nara mai, fo dadi tanda nae, hatahorir marai kota naa ta nau nenene neu dua sara. Basa boe ma ara laꞌo rasadea ela kota naa. De ara reni kota laen esa reu, nade Ikonium.✡Mateos 10:14; Markus 6:11; Lukas 9:5; 10:11

52 Tehuu hatahorir fo mana ramahere neu Lamatuak Yesus nai Antiokia ena, dalen nara ramahoko, nahuu Manetualain Dula-dale Malalaon tao natea dalen nara.

<- Nedenuk kara Tutuin 12 Nedenuk kara Tutuin 14 ->