1 Dadi ia laꞌe katelun fo au nau neti tiro-dangga ei. Mete ma hambu ketuk fo nau rakasasaꞌek salak neu hatahori, na, boso lilii-ndondou ndia hohoro-lalanen. Sama leo neni surak nai Manetualain Susura Malalaon nae, “Mete ma hambu ketuk fo rakasasaꞌek salak neu hatahori esa, muste hambu sakasii dua do telu fo kokolan nara sama dei, dei fo simbok. Mete ma ta talo naa, na, boso simbok.”[a] 2 Neu lelek fo au uni ei uu, laꞌe kaduan maneuk, au fee nesenedak neu hatahorir mana leo-laꞌo tao manggarauk kara raa ena. Hatematak ia, au fee nesenedak neu sara bali, sama-sama ro basa hatahorir fo mana leo-laꞌo tao manggarauk kara. Sama leo fai bakahulun, au fee nesenedak ae, neu ko mete ma au neti, au ta atanggodo sara.

3 No dalak naa, natudu bukti nae, Karistus kokolak nesik au. Mete ma Karistus nau koladu ei, Ana taon nenik koasa moꞌok nai ei taladam mara. Huu Ana ta tao ues no noe-naꞌuk. 4 Neu ara rakanisan numa ai ngganggek lain, memak Ana noe-naꞌu, huu Ana nakamboꞌik heni Ndia koasan ena. Tehuu Manetualain fee koasa neu Karistus de Ana nasoda hatematak ia. Leo mae ita mana dadi Ndia hatahorin tameda ta tabeꞌi, tehuu Manetualain fee ita masoda beuk ena. Huu naa de ai bisa maono-lalau ei pake Ndia koasan.

5 Parisa ei dale heli-helim mara fo sangga bubuluk mae, ei mamahere tebe-tebe neu Karistus, do taa. Ndia koasan neni nitak nai ei leleo-lalaꞌom, do taa? Fora ei aom talo naa. Huu mete ma Ana ta nakaesa no ei, na, ei ta dadi miu Ndia hatahorin. 6 Mete ma ei parisa ai, na, ei bisa mete-mita Ndia koasan neni nitak nai ai leleo-lalaꞌon. No dalak naa, ai mala dea. 7 Ai oo hule-haradoi moke neu Manetualain boe, mita fo ei boso tao salak hata esa boe na. Ai ta hosek mete ma hatahorir manaku do ta manaku air ia, Lamatuak nedenun. Tehuu ai hii ei tao hata fo tetebes, leo mae hatahori ketuk nau timba heni ai. Talo naa oo ta hata-hata boe. 8 Huu ita ta bisa tao hata esa boe na, fo laban hata fo tetebes. Kada ai malela tao hata fo tetebes a mesan. 9 Mete ma ei dadi barakaik, ma ai dadi noe-naꞌuk, ai mamahoko a mesan. Ai hule-haradoi moke fo Lamatuak tao nala ei boe dadi mandaik. 10 Huu naa de, leo mae au nai dook ka numa ei mai, au surak dedeꞌak kara iar hatematak ia, mita fo neu ko au mai, na, au hae kokolak hara berak neu ei bali. Au dadi uu ita Lamatuan nedenun. Tehuu Ana fee au haak ma koasa fo atetea ei, ta akalulutu ei.

11 Toranoo susue nggara ein! Au dedeꞌa deꞌen mateꞌen ia, kada hara masodak malole. Tao matetu-mandoo basa dedeꞌak kara. Mamanene matalolole au nenori-nefadang. Leo-laꞌo dalek esa. Ei muste malole esa no esa. Manetualain naa sue-lai ei. Au oke-hule fo Ana sama-sama no ei nakandoo, ma Ana tulu-fali ei fo leo-laꞌo mole-dame esa no esa.

12 Ei muste lole haram pake iꞌidu susuek, fo nandaa soa-neu Lamatuak hatahori lolo-laon. Manetualain hatahorin marai iar, basa sara haitua hara masodak malole soa-neu ei.

13 Au oke-hule fo ita Lamatuan Yesus Karistus natudu Ndia dale susuen neu ei. Au oke-hule fo Manetualain natudu Ndia susue-lalain neu ei. Au oo oke-hule fo Lamatuak Dula-dale Malalaon natudu Ndia dale lilon, mita fo ei basa ngga leo-laꞌo no dalek esa boe.