THESOLONIITE Suh Pool Ih Takkhoh Raang Arah Le Ephangjatjih Thesolonika ah Mesidonia juungkhuung ni Roman samnuthung adi hadaang nuh thoon. Pool ih Philipi nawa dokkhoom ano erah ni Chaas dongsiitta. Enoothong seekdi, Jehudi dung nawa mina loong rah ih Pool ih Kristaan tiitkhaap riimbaat rum kota asuh rapne ih siikhaam rumta, Jehudi lah angte loong Judaism ko ni nengthung punte loong rah ah. Eno Pool ah Thesolonika hadaang nawa Berea hadaang ni rootroot ih dokkhoom thuk rumta. Eno erah lidi, heh Korin hadaang ni thok adi, Pool ih heh joonwah Timothi heh damdi karoong reeta wah jiin nawa Thesolonika Chaas ruurang tiitkhaap choh chaatta. Thesolonikaate suh Pool phangkhoh leeraang ah langla erah nawa Kristaan loong asuh tenchaan tiit nyia amiisak ah huksamjat thukta. Heh ih neng minchan nyia neng hanpi ruurang asuh lakookmi jengkhaap maatta; Pool ih neng damdi karoong tongsongta tiit loong anep dokthun thuk rumta, eno erah lilih Chaas ni Kristo ngaaksaat tiit chengmui rumta loong ah huk baatta: Kristaan mina Kristo maang ngaak ra ngakhoh di mattiita loong ah heh ngaaksaat doh babah uh lathoonka roidong eroong choh tam eah? Nyia Kristo maatok doh we raaha? Erah loong tiit ah joh ano Pool ih mina loong suh baatta Kristo ngaakraak asuh laalomte loong ah ih suusu heh mootkaat ah ban moruh ean. Hemong Dowa Jatjih Ephangjatjih (1:1) Eroorang nyia Tenthunse (1:2—3:13) Kristaan reeraang tiit baat (4:1-12) Kristo raak tiit lam baatkot (4:13—5:11) Tiit thoon jengkhaap (5:12-22) Hethoon tiit (5:23-28)
1 Esm 17:1 Pool, Silaas, nyia Timothi jiin nawa—Thesoloni Chaas dowa, seng loong Wah Rangte nyia Teesu Jisu mina loong raang ih arah:
Tenthet nyia semroongroong sen raang ih toom ang ah. Thesoloniite tuungmaang nyia roidong 2 Sen loong thoih seng Rangte suh saarookwih lakookmi liihi eno seng rangsoom ni sen ah ban menset ruh et hi. 3 Seng loong Wah nyia seng Rangte ngathong ni sen hanpi jun ih mame reeraang lan, nyia Jisu Kristo suh sen laalom anno minchan lam ih mame chekbek reeraang lan loong athoih seng ih samthun hi. 4 Joon awaan loong, seng ih jat ehi, Rangte ih sen ah heh mina ang raangtaan ih minchan hanno danje halan. 5 Erah thoih seng ih Ruurang Ese sen suh jengkhaap nawa ih luulu lah angthang ih, Esa Chiiala chaan aphaan pan ih nep amiisak kamkam angkah ih huk baat koh jahali. Sen ih jat ehan sen damdi roongtong tahe adi sen raangtaan ih seng mamah kah ih tongsongti rah ah. 6 Esm 17:5-9 Sen loong ah Teesu jeng nyootnyoot etan nyia seng jeng nyootnyoot ih tahe; mamah taat ih cham anaang anbah uh, Esa Chiiala ih tiitkhaap ah tenroon lam ih kap thuk tahan. 7 Erah thoih sen ah Mesidonia nyi Akaia hanpiite loongdung ni sen ah enyootsok etheng ih hoon lan. 8 Teesu tiitkhaap ah Mesidonia nyia Akaia ni tumbaat tan ah lalak tathok chaatka, erah nang ih bah sen ih Rangte suh hanpi lan ruurang ah nep noongrepwih ni thok japchaat kaatta. Erah thoih seng ih kahuk baatjih tumjih uh takah jeeka. 9 Erah miloong ih seng sen jiinni raahe di mamah kah ih noppoon tahe tiit ah baat rumha, nyia tongmih soomtu tan dowa amiisak ething Rangte ah soomtu suh mame lekliitan erah tiit ah baat et rumha 10 eno rang nawa heh Sah Jisu Kristo raak ah bantho han tiit anep baat rumha. Marah Rangte ih heh tek nawa ngaakthing thukta rah ah, eno heh ih seng ah Rangte tenkhat thokte anghala dowa piipangte.
1 Thesoloniite 2 ->
1 Esm 17:1 Pool, Silaas, nyia Timothi jiin nawa—Thesoloni Chaas dowa, seng loong Wah Rangte nyia Teesu Jisu mina loong raang ih arah: