1 [a] Amadi, Judia dowa Rangte mina loong suh ngun khoonse tiit raanghan ah langla amah. Galatia chaaste suh baattang ah likhiik emamah ih re an. 2 Naangtongsa rookwet sen loong ah ih ngun niik han dowa, amasasah lomse anno khoonthiin theng, eno ngah wanghang adoh ngun lomse jih tah angka ang ah. 3 Nga thok lidoh, sen ih danje han loong asuh menjat hoonmui suh le raangkoh ang, eno Jerusalem nah sen lakmak ah huikaat thuk ang. 4 Ngah kaat etheng mok ang abah, neng loong ah nga damdoh jen kaat eh rumha.

5 [b] Sen loong taangnah Mesidonia nah kaat lidoh raahang—tiimnge liidoh ngah Mesidonia lam ih kaat theng. 6 Ngah sen damdoh rekam mok roongtong ehang, hahook jangtang uh moktong e ang, eno manah kah ang bah uh sen ih jen chosok ehe. 7 Daankhoom luulu lah angthang ih sen tup suh ehan ramlang; Teesu ih tongthuk hang bah, sen damdoh rekamdook roongtong suh tuumaang lang.

8 [c][d] Pentikos rangwu maang thokthok ngah Ephesus nah tong ang. 9 Ani nga miksukte rapne ih je abah uh, mootse kaatse elong jen re suh saapootse je ah.

10 [e] Timothi sen lamko ih raaha bah, sengdung nah heh bantho jih toom ang ah, tiimnge liidi heh uh nga likhiik Teesu mootkaatte 11 Wasiit taan ih uh heh lathaangju theng, erah nang ebah nga reenah semroongroong ih jen thokkhoom suh heh lamkhoom doh chosokroh ih an; tiimnge liidi hanpiite loong damdoh wakngaak raaha ngeh ih bansok ang.

12 Amadi, seng phono Apollos suh hanpiite loong damdoh sen taangnah dongkhoom laatbaat hang, enoothong heh amadi tuk ih wang suh tanookka[f]. Erabah uh saapoot choh adoh toom wangha.

13 Motseng ih ban tong an, sen tuumaang nah rongtangtang ih tong an, lacho laphaan rongkopkop ang an. 14 Tiimjaat mokah anbah uh minchanmui damdoh mokah an.

15 [g] Stephanas jaatang ah sen ih jat ehan; Akaia ni jakhothoon neng kristaan phanghoon rumta eno Rangte mina loong raangtaan ih mokah rumla. Joon awaan loong sen uh 16 erah likhiik mihak phokhoh liphan theng adoleh heh damdi mootkaatte loong liphan theng.

17 Stephanas, Photunatus nyi Akaikas loong wang suh ngah rapne ih roonlang, neng loong ah sen laje tokdi wang rum taha 18 eno ngah tenroon thuk rum tahang neng ih an tenroon thuk rum taho ah likhiik ah. Erah likhiik miloong ah edanjat etheng.

19 [h] Asia nawa chaaste loong ah ih sen loong asuh jengseera halan; Akuila nyia Prisila erah damdi chaaste loong ah neng nok ni khoontong rum ano kristaan minchan jengseera halan. 20 Hanpiite loongtang ih jense ra halan.

Wasiit ih wasiit suh semroongroong ih tong suh jengseera halan.

21 Arah Jengkhaapse Pool jiin nawa, nga lak ih raangmaat halang.

22 O ih Teesu lanookka—erah mina ah etam ejih ang ah!

Marana tha Seng Teesu raaho!

23 Seng Teesu Jisu minchan ah an damdoh eje toom angha.

24 Jisu Kristo mendi sen loong ah nga mongnook.

<- 1 Korinte 15