1 ညီကို မောန်နှမလေ၊ တကယ်ဒမ်းဆိုဟှာ ငါဟှာ နန်းနို့လေဟှို ဝိညာဉ်လူလေဟှို ဟောပြောဟှူမျိုး ပြောဟှိမရဘဲ၊ ဇာတိလူဖြစ်ဟှူ လောကသားလေမျိုး၊ ခရစ်ယာန်သတ်တာမာ ယေရှုခရစ်တော်နှိုက် သာဂန်းဟှားလေမျိုးဘဲ့ နန်းနို့ဟှို ဟောပြောရဟှယ်။ 2 [a]ခုထတ်ထိ နန်းနို့လေဟှာ မာဟှူစာဟှို မစားနိုင်သေးဘဲကြောန့် ငါဟှာ နို့ဟှိုဘဲ့တိုက်ရဟှယ်။ ခုလည်းဘဲ့ နန်းနို့လေဟှာ မာဟှူစာဟှို စားနိုင်သေးဟှ။ 3 ခုလည်း နန်းနို့လေဟှာ ဇာတိလူဖြစ်ဂေ့သေးဟှယ်။ ရှင်းရှင်း မနာလိုဟှူဇာလေ၊ ကွဲပြားဟှူဇာလေ၊ ဂေါင်ပြိုင်ဟှူဇာလေ၊ ရန်ဖြစ်ဟှူဇာလေဟှာ ဇာတိလူလေ ဖြစ်ဂေ့သေးဟှယ် မှုဟှလော။ လောကီထောင်းစံတိုင်းဘဲ့ နန်းနို့လေ ကျင့်သောင်းနေဂေ့ဇာ မှုဟှလော။ 4 [b]ဖြားဖြစ်ကြောန့်နူးဆိုဟှာ တယော့‑က်ဟှ “ငါဟှာ ပေါလုတဗဲ့ ဖြစ်ဟှယ်။” နော့‑က်တယော့‑က်ဟှလည်း “ငါဟှာ အာပေါလုတဗဲ့ ဖြစ်ဟှယ်” ဆိုဘီး နန်းနို့လေ ပြောဆိုနေဂေ့ဇာဟှာ လောကသားလေမျိုးဘဲ့ ပြုမူနေဂေ့ဇာဘဲ့ မှုဟှလော။

5 အာပေါလုဟှ ဖယ်သူနူး။ ပေါလုဟှလည်း ဖယ်သူနူး။ နို့လေဟှာ နန်းနို့ ယောင်ကြည်လာဟှို့တွပ် ဟောပြောသတ်သေခံဟှူ ဓမ္မမှုတော်ဆောန်ဘဲ့ ဖြစ်ဟှယ်။ နို့လေဂူလောင်းဟှာ သခင်ဘုရားရဲ့ မှုတော်ဟှို စေခံလောက်ဆောန်ဟှူ သူလေဘဲ့ဖြစ်ဟှယ်။ 6 [c]ငါဟှာ စိုက်ပျိုးဟှူ သူဖြစ်ဟှယ်။ အာပေါလုဟှ ရေလောန်းဟှူ သူဖြစ်ဟှယ်။ ပန်ဟှို ပေါ့‑က်စေဘီး ကီးထွားစေသူဟှ ဘုရားသခင်ဘဲ့ ဖြစ်ဟှယ်။ 7 စိုက်ပျိုးဟှူ သူန ရေလောန်းဟှူ သူဟှ ဖြားဇာလည်းတတ်နိုင်ဟှ။ ပန်ဟှို ကီးထွားစေဟှူ ဘုရားသခင်ဟှဘဲ့ ရှိမျှဂူလောင်းဟှို တတ်နိုင်တော်မူဟှယ်။ 8 စိုက်ပျိုးဟှူ သူန ရေလောန်းဟှူ သူဟှာ တလောင်းတဝဒဲ ဖြစ်ဘီး လူတိုင်းဟှာ ကိုယ်ကြိုးစား လောက်ဆောန်တိုင်း ကျိုးဟှို ခံရလေ့မယ်။ 9 နို့လေဟှာ ဘုရားသခင်နားမာ လောက်လောက်ဟှူ လောက်ဖော်ဆောန်ဖတ်လေ ဖြစ်ဟှယ်။ နန်းနို့လေဟှာ ဘုရားသခင်ရဲ့ ဥယျာဉ်တော် ဖြစ်ဂေ့ဟှယ်။

ဘုရားသခင်ရဲ့ က္လောန်းတော်တိုက်လည်း ဖြစ်ဂေ့ဟှယ်။ 10 ငါ့ဟှို ဘုရားသခင်ပေးအပ်တော်မူဟှူ ကျေးဇူးတော်တိုင်း ပညာရှိဟှူပရံဆရာမျိုး အုပြစ်ဟှိုခ္လဟှားဘီ။ တခြားသူလေဟှာ ထပ်ဆစ်ဘီး တည်ဆော့‑က်လေဟှယ်။ အယ်ဘေမဲ့ ဖယ်မျိုးထပ်ဆစ်ဘီး တည်ဆော့‑က်ဟှူဆိုဇာဟှို လူတိုင်းဒိပြုရမယ်။ 11 ဖြားဖြစ်ကြောန့်နူးဆိုဟှာ ယေရှုခရစ်တော်ဖြစ်ဟှူ ခ္လဟှားဘီးဟှူ အုပြစ်ဟှလွဲဘီး၊ တခြားအုပြစ်ဟှို ဖယ်သူလည်းမခ္လနိုင်ဟှ။ 12 အယ်မူအုပြစ်ထတ်မာ ရွှေ၊ ငွေ၊ က္လော့‑က်မြတ်ရတနာ၊ သစ်သား၊ ဗြစ်ပန်၊ ကော့‑က်ရိုးလေန ထပ်ဆစ်ဘီး တည်ဆော့‑က်ဟှူသူရှိဟှူမျှ၊ 13 လူတိုင်းလောက်ဟှူ လောက်ဟှာ ထန်ရှားလေ့မယ်။ ဖြားဖြစ်ကြောန့်နူးဆိုဟှာ ဖော်ပြဟှူနေ့ရစ်ဟှာ မီးအားဖြင့်ထန်ရှားစေလေ့မယ်။ လူတိုင်းလောက်ဟှူ လောက်ဟှာ ဖယ်မျိုးလောက် ဖြစ်ဟှယ်ဆိုဇာဟှို မီးဟှာစစ်ဆေးလေ့မယ်။ 14 အယ်မူအုပြစ်ထတ်မာ ထပ်ဆစ်ဘီး တည်ဆော့‑က်ဟှူ သူရဲ့လောက်ဟှာ တည်မြဲဟှယ် ဆိုဟှာ၊ အယ်သူဟှာ ကျိုးရလေ့မယ်။ 15 အယ်ဘေမဲ့ ယော့‑က်ယော့‑က်လောက်ဟှူရာဟှာ မီးလောန်ဟှယ် ဆိုဟှာ ရှောင်းခံရလေ့မယ်။ အယ်ဘေမဲ့လည်း သူကိုယ်တိုင် မီးနလွတ်ဟှူသူမျိုး ကယ်တန်ရှင်းဟှို ခံရလေ့မယ်။

16 [d]နန်းနို့လေဟှာ ဘုရားသခင်ရဲ့ ဗိမာန်တော် ဖြစ်ဟှယ် ဆိုဟှူဇာန ဘုရားသခင်ရဲ့ ဝိညာဉ်တော်ဟှာ နန်းနို့လေထဲမာ ကိန်းဝပ်နေဟှယ် ဆိုဇာဟှို နန်းနို့လေ သိဂေ့ဟှလော။ 17 ဘုရားသခင်ရဲ့ ဗိမာန်တော်ဟှို ဖျစ်ဆီးဟှူသူဟှို ဘုရားသခင် ဖျစ်ဆီးလေ့မယ်။ ဘုရားသခင်ရဲ့ ဗိမာန်တော် ဆိုဇာဟှာ သန့်ရှင်းရဟှယ်။ နန်းနို့လေလည်း အယ်ဗိမာန်တော် ဖြစ်ဂေ့ဟှယ်။

18 ဖယ်သူလည်းဘဲ့ ကိုယ့်ကိုယ်ကိုယ် လှည့်ဇားစေန။ နန်းနို့လေမာ ယော့‑က်ယော့‑က်ဟှ ငါဟှာ အယ်လောကရဲ့ ပညာရှိဖြစ်ဟှယ် ဆိုဘီး ထန်မှတ်ဟှယ် ဆိုဟှာ အယ်လူဟှာ ပညာရှိဖြစ်ဟှို့တွပ် မိုက်မဲဟှူသူ ဖြစ်ပါစေ။ 19 ဖြားဖြစ်ကြောန့်နူးဆိုဟှာ အယ်လောကရဲ့ ဉာဏ်ပညာဟှာ ဘုရားသခင်ရဲ့ မျစ်မှော့‑က်တော်မာ မိုက်မဲဟှူဇာဘဲ့ ဖြစ်ဟှယ်။ ကျမ်းစာဟှ၊ “ဘုရားသခင်ဟှာ ပညာရှိလေဟှို ပရိယာယ်အားဖြင့် ဖမ်းဆီးတော်မူဟှယ်” ဆိုဘီး လာဟှယ်။ 20 နော့‑က်ထပ် ကျမ်းစာဟှ “ပညာရှိလေရဲ့ ကြံစည်ဟှာ ချည်းနှီးသတ်သတ် ဖြစ်ဟှူကြောန်းဟှို သခင်ဘုရား သိတော်မူဟှယ်” ဆိုဘီး လာဟှယ်။ 21 အယ်မျိုးဖြစ်ကြောန့် လူလေရဲ့ စွမ်းစန ပတ်သတ်ဘီး ဖယ်သူလည်း ဝါကြွားစေန။ ဖြားဖြစ်ကြောန့်နူးဆိုဟှာ ရှိမျှဂူလောင်းဟှာ နန်းနို့လေတွပ် ဖြစ်ဟှယ်။ 22 ပေါလုဘဲ့ဖြစ်ဖြစ်၊ အာပေါလုဘဲ့ဖြစ်ဖြစ်၊ ကေဖဘဲ့ဖြစ်ဖြစ်၊ အယ်လောကဘဲ့ဖြစ်ဖြစ်၊ သတ်ရှင်ရှင်းဘဲ့ဖြစ်ဖြစ်၊ သေရှင်းဘဲ့ဖြစ်ဖြစ်၊ မျစ်မှော့‑က်ရာဘဲ့ဖြစ်ဖြစ်၊ နော့‑က်ဖြစ်လာတတ်ဟှူ ရာဘဲ့ဖြစ်ဖြစ် ရှိမျှဂူလောင်းဟှာ နန်းနို့လေတွပ် ဖြစ်ဟှယ်။ 23 နန်းနို့လေလည်း ခရစ်တော်တွပ် ဖြစ်ဟှယ်။ ခရစ်တော်ဟှာလည်း ဘုရားသခင်တွပ် ဖြစ်တော်မူဟှယ်။

<- ၁ ကောရိန္သု 2၁ ကောရိန္သု 4 ->