Hi misak ni holesok xa ladi e taon te hal Babilon[a] lakiri lel
1 Dutou ni ngan ak, napus masxaxa teimun xa bemei etan nggo ut nesao. Lelaxatien nan mahulong e minehinen te xeihen nan mileluv mikapis e ut xil vus te ut etan. 2 Xi mikei be nesao bit,
“!Hi misak ni taon xa eilep te hal Babilon mikiri lel![b]
!Xi mikiri lel vari!
Moletin xil teni lihe tovuol mun.
Vontoen xil teni imei ihe von xusen na temat xil e ninin tesa xil tang.
Tuman tesa xil kestang ha ti lixus en.
3 Taon xa eilep xiak bisu ni ekaten na Hi mak vengan xa sexien nan nggoni atou xa be hoeaso,
xa milihi nenemien na moletin xil te kantri xil vus tengan mei lipol isa itela.
Reitin, taon ak di ihur pangasien vengan xa pol misa del suv toto xil holu te ut etan,
e vengan xa nggal holesok holu xa eheien nan di en ra moletin te posen xil holu te ut etan, ma misak ni mani nae be holu ven.”[c]
4 Di, nalong rae tesav teimun nggo ut nesao bit,
“!Moletin navan xil mumea! !Mumea rani!
!Munavituei ti natel tesaen nan xil!
!Muxuxou kuhi tengan munahur ti longpangasien natela![d]
longpangasien xil mei ipurun ni e ihu vini e melengien tei takes: [h]
xi ihisu ni mesien, tangen, e mae kekaten.
Upang mei ia len ni,
vengan xa Hi Suv xa di milepis rin nan,
xeihen nan mahulong.”
9 Suv toto xil latepol ni sexien tesa tetela e latepus hosien tetela ve holesok xil te ut etan xa tehuri. E melele xa xil lipus eas te upang xa di ngga len ni, litesi e simetexil ikiri. [i]10 Xil lisoh sotin vengan xa ulixil ikan tengan linahur ti pangasien natela. Xil lihit, “!Aue li, misa xa misa pupu mi taon xa eilep te hal Babilon! Neta sav xa xeihen nan mahulong, e nggur sen longpangasien te lepisien nan e haoa tei takes.” [j]
11 Moletin te posen xil holu te ut etan, xil mun litesi e simetexil ikiri, vengan moletin ti mun naxal holesok ra xil. 12 Reitin, moletin ti mun naxal neta xil xa lapol ni ni gol, silva, hat xa minehin, e valit vatiei xil te tas xa bos xa bos. ?Reitin, visi mun ixal eising hos xil xa mieh, pipili, e pepol del eising xa bos xa lakesi ni silk? Ihe tovuol. E moletin ti mun naxal neta xil xa lapol ni ni liei xil xa bos, ni luh vongoro xil, ni aean xa lakesi ni brons, e ni hat xa lakesi ni marbel. [k]13 Neta xil xa di misak ni anien von mikon bos nggoni sinamon, e vokon xil xa nggoni mir e forangkansen liti nga tang. Anien xil xa langgoni uaen, oel, pulaoa e uit, linapos ni ti mun. Moletin ti mun naxal vongoro sae xil nggoni buluk, sipsip, e hos natel kat teni. Moletin tovuol tengan vaxal rat meulien na moletin xil tengan mei vahe slev nae xil. 14 Moletin xil xa di lapos ni holesok xil lihiteni iha mini lihit, “Holesok xil xa bos xa iem bei tengan uhuri lakesae relinguk. E holesok xil xa otepolu ni tetiamu tetel holesok xil xa tesak ni xouk di otesep koai ven, xil latetasil ranuk xosali, e onakamet ti mun.”
15 Ngan xil ak langgur mani holu nggo holesok xil xa xi texale ra xil, melele xa lapus longpangasien na Babilon, lasoh ladi nga sotin vengan ulixil mikan xa linahur ti longpangasien natela. Xil lamuis e ladang labit, [l]
16 “!Aue li, ngan ak misa xa misa pupu!
Tetiamu, taon xa eilep te hal Babilon tesing ni eising xil xa tehos xa tehos xa temieh, tepili e tehe pepol.
Tetiamu, xi tesoxolen gol, hat xil xa minehin, e valit vatiei xil xa tehos xa tehos.[m]
17 !E mapusi xa holesok nan xil vus lakesae relingi e haoa tei takes!” [n]
Melele xa vatihos xil te tuturil, boskru xil, moletin xil xa ladi en, e moletin sav xil xa lakamet meulien nae e tas lapusi, xil lasoh ladi nga sotin. 18 Melele xa lapus eas te upang xa di ngga len taon ak, lamuis nggeih e labit, “!Aue li, taon sav tovuol mun vaxoni taon xa eilep xiak!” [o]19 Ma, xil laso vulmeas be vatixil tengan vapisen ni xa lalonge misa holu, simetexil mikiri e ladesi labit, [p]
“!Aue li, ngan ak misa xa misa pupu!
Tetiamu taon xa eilep te hal Babilon teleh neta holu texo tuturil xil,
e moletin xil te tuturil latehur mani holu texo en.
Tetiamu, moletin xil xa di latepos ni holesok xil en,
xil mei latehe eilep mak mu e ut xil vus te ut etan.
E del sexien te vongou nan,
xi miluvos moletin xil vus te ut etan.”
24 Hi misa pangasien te lepisien nan mi taon te hal Babilon ak vengan xa mikamet re provet xil e re moletin nan xil en. Reitin, xi pusi xa Babilon tehas vin moletin xil holu xa latexo ut xil vus te ut etan. [u]
