1 Joseré na duáca beꞌro Judá cʉ̃ maꞌmisʉmʉa, cʉ̃ acabijirãrẽ cõꞌawijacʉ niwĩ. Cõꞌawija, Adulam wãmetiri macãpʉ waꞌacʉ niwĩ. Topʉ ti macãcjʉ̃ Hira wãmetigʉ ya wiꞌipʉ cãjĩcʉ niwĩ. 2-3 Topʉ niꞌcõ numiorẽ Canaá diꞌtacjʉ̃ Súa wãmetigʉ macõrẽ ĩꞌacʉ niwĩ. Core nʉmoticʉ niwĩ. Co meꞌrã níca beꞌro co nijĩpaco ni, niꞌcʉ̃ wĩꞌmagʉ̃ põꞌrãtico niwõ. Cʉ̃rẽ Er wãme õꞌoco niwõ. 4 Beꞌro apaturi nijĩpaco waꞌa, apĩ wĩꞌmagʉ̃rẽ põꞌrãtico niwõ. Cʉ̃rẽ Onán wãme õꞌocʉ niwõ. 5 Na beꞌrore apĩ põꞌrãtinemoco niwõ tja. Cʉ̃rẽ Sela wãme õꞌoco niwõ. Cʉ̃ Quezib wãmetiropʉ bajuacʉ niwĩ.

6 Beꞌropʉ Judá cʉ̃ macʉ̃ masã maꞌmi Er Tamar wãmetigore numiadaꞌrecʉ niwĩ. 7 Er cʉ̃ ñaꞌarõ weesetisere Õꞌacʉ̃ ne tʉꞌsaticʉ niwĩ. Tojo weegʉ cʉ̃ catiri ʉmʉcore ẽꞌmacãꞌcʉ niwĩ.

8 Cʉ̃ wẽ́rĩ́ca beꞌro Judá cʉ̃ macʉ̃ Onárẽ aꞌtiro nicʉ niwĩ:

—Macʉ̃, marĩrẽ dutisere queoro wéégʉ, mʉꞌʉ maꞌmi nʉmo níꞌcore nʉorẽña. Tojo weegʉ mʉꞌʉ maꞌmi mijĩrẽ põꞌrãtibosaturiagʉsaꞌa.[a]

9 Onán peꞌe “Co meꞌrã yʉꞌʉ põꞌrãticã, yʉꞌʉ põꞌrã nitibosama” ni, masĩcʉ niwĩ. Tojo weegʉ nipeꞌtisetiri co meꞌrã nimigʉ̃, nijĩpacoyoticʉ niwĩ. Tere tojo weegʉ, cʉ̃ maꞌmi põꞌrã nituriarã waꞌacã ʉasãtigʉ, tojo weecʉ niwĩ. 10 Õꞌacʉ̃ Onán cʉ̃ tojo weesere ĩꞌagʉ̃, tere tʉꞌsaticʉ niwĩ. Tojo weegʉ cʉ̃ quẽꞌrãrẽ wẽrĩcã weecʉ niwĩ.

11 Tojo waꞌáca beꞌro Judá cʉ̃ macʉ̃ nʉmo níꞌcore nicʉ niwĩ:

—Mʉꞌʉ pacʉ ya wiꞌipʉ wapewio tojáníña. Yʉꞌʉ macʉ̃ Sela cʉ̃ bʉcʉ nicãpʉ cʉ̃rẽ marãpʉtiapa, nicʉ niwĩ. Tojo weego, Tamar co pacʉ ya wiꞌipʉ dajaco niwõ. Core tojo nimigʉ̃, Judá aꞌtiro wãcũcʉ niwĩ: “Apetero weegʉ Sela quẽꞌrã cʉ̃ maꞌmisʉmʉa weronojõ wẽrĩbosami”, nicʉ niwĩ.

12 Yoáca beꞌro Judá nʉmo Súa macõ wẽrĩa waꞌaco niwõ. Cʉ̃ dʉjari peꞌtíca beꞌro Judá Timnat wãmetiri macãpʉ waꞌacʉ niwĩ. Ti macãpʉta cʉ̃ yarã oveja poarire seecãrã niwã. Cʉ̃ meꞌrãcjʉ̃ Hira Adulãcjʉ̃ cʉ̃rẽ baꞌpaticʉ niwĩ.

13 Tamar, co mañecʉ̃ “Timnat macãpʉ cʉ̃ yarã oveja poarire seegʉ waꞌapʉ” nicã tʉꞌogo, aꞌtiro weeco niwõ. 14 Co wapewio sãñarĩ suꞌtirore tuweeco niwõ. Tuwee, na ĩꞌamasĩticãꞌto nígõ, niꞌcã casero meꞌrã co diapoare moꞌaco niwõ. Tuꞌajanʉꞌcõ, Enaim macã sãjãrĩ sope pʉꞌto dujico niwõ. Ti macã Timnat waꞌari maꞌa tiropʉ nicaro niwʉ̃. Tamar, “Sela bʉcʉpʉ niapʉ” nisere tʉꞌogo, tojo weeco niwõ. Sela bʉcʉpʉ nimicã, Judá core Selare numiadaꞌreticʉ niwĩ.

15 Judá core ĩꞌagʉ̃, “Ʉmʉarẽ aꞌmetãrãwapataꞌari masõ nisamo”, ni wãcũcʉ niwĩ. Co diapoare moꞌa, ĩꞌata basiotico niwõ. 16 Cʉ̃ macʉ̃ nʉmo níꞌco nisamo, ni masĩtigʉ, maꞌapʉ níꞌcʉ co tiro ojanʉꞌcã, core aꞌtiro nicʉ niwĩ:

—Yʉꞌʉ, mʉꞌʉ meꞌrã nisĩꞌrĩsaꞌa, nicʉ niwĩ.

Co peꞌe “¿Ñeꞌenojõ yʉꞌʉre wapayegʉsari?” nico niwõ.

17 —Yʉꞌʉ ecarã cʉorãrẽ niꞌcʉ̃ cabracãrẽ mʉꞌʉrẽ oꞌogʉti, nicʉ niwĩ.

—Añuꞌu to pũrĩcãrẽ. Mʉꞌʉ cʉ̃rẽ oꞌoati dʉporo apeyenojõ cũuña yujupʉ, nico niwõ.

18 —¿Ñeꞌenojõrẽ yʉꞌʉ cũucã ʉati? ni sẽrĩtiñaꞌcʉ niwĩ.

—Mʉꞌʉ wãmerẽ ñacũurõrẽ ti da bʉsari da meꞌrã, tojo nicã mʉꞌʉ tuacjʉ mʉꞌʉ cʉocjʉre cũuña, nico niwõ.

Judá core tere oꞌotoja, co meꞌrã nicʉ niwĩ. Tojo wee co nijĩpaco tojaco niwõ. 19 Cʉ̃ meꞌrã níca beꞌro topʉ níꞌco Tamar waꞌaco niwõ. Waꞌa, co diapoa omáca caserore tuweeco niwõ. Tuꞌajanʉꞌcõ, co wapewio suꞌtiro co tuweeꞌcarore sãñaco niwõ tja.

20 Beꞌro Judá cʉ̃ níꞌcaronojõ cʉ̃ meꞌrãcjʉ̃ Adulãcjʉ̃ meꞌrã cabracãrẽ oꞌócʉ niwĩ. Cʉ̃ co meꞌrã topʉ cũuꞌquere wiatõrõdutigʉ, tojo weecʉ niwĩ. Cʉ̃ meꞌrãcjʉ̃ peꞌe core ne bocaticʉ niwĩ. 21 Tojo weegʉ tocjãrã masãrẽ sẽrĩtiñaꞌcʉ niwĩ:

—Mʉsã ĩꞌacã sõꞌoníco Enaícjõ, mʉsã ẽjõpeori wiꞌicjõ ʉmʉarẽ aꞌmetãrãwapataꞌari masõ, ¿noꞌopʉ nisari? Na peꞌe “Aꞌtoma ne niꞌcõ conojõ marĩmo aꞌti macãma”, nicãrã niwã.

22 Tere tʉꞌogʉ, Judá tiropʉ cʉ̃ majãmitojaacʉ niwĩ. Cʉ̃rẽ nicʉ niwĩ:

—Ne bocatiasʉ. Tocjãrã marĩcã “Conojõ aꞌtoma ne marĩmo”, niama, nicʉ niwĩ.

23 Judá cʉ̃rẽ yʉꞌticʉ niwĩ:

—Tocjãrã marĩrẽ bujiticãꞌto, nírã, yʉꞌʉ cũuꞌque meꞌrãta tojacãꞌto. Yʉꞌʉ cabracãrẽ oꞌomiapʉ, oꞌogʉ peꞌe; mʉꞌʉ bocatiapã, nicʉ niwĩ Judá.

24 Iꞌtiarã mujĩpũ beꞌro ãpẽrã Judáre aꞌtiro quetiwererã etacãrã niwã:

—Mʉꞌʉ macʉ̃ nʉmo ãpẽrã ʉmʉarẽ aꞌmetãrã, nijĩpacoyoja waꞌaco niamo, nicãrã niwã.

Judá tere tʉꞌogʉ, “Core miiwĩrõ, ʉ̃jʉ̃acõꞌacãꞌrã waꞌaya”, ni caricũcʉ niwĩ.

25 Core miiwĩrõrĩ curare co peꞌe cʉ̃ wapaye cũuꞌquere oꞌo, co mañecʉ̃rẽ aꞌtiro queti oꞌóco niwõ: “Aꞌte noa cũuꞌque nírõ nisasaꞌa. Aꞌte wiogʉta yʉꞌʉre nijĩpacoyowĩ. Ĩꞌarẽ mʉꞌʉ. ¿Noa yaro aꞌto wãme ñacũurõ, aꞌti da meꞌrã, tojo nicã aꞌtigʉ tuacjʉ niti?”

26 Judá cʉ̃ yere ĩꞌamasĩgʉ̃, aꞌtiro nicʉ niwĩ:

—Co peꞌe yʉꞌʉ yʉꞌrʉoro añurõ weeapõ. Yʉꞌʉ peꞌe, yʉꞌʉ macʉ̃ Sela meꞌrã numiadaꞌretigʉ, ñaꞌarõ weepã, nicʉ niwĩ. Tojo weegʉ Judá core ne apaturi aꞌmetãrãnemoticʉ niwĩ majã.

27 Tamar co wĩꞌmagʉ̃ wʉari nʉmʉ ejacã, pʉarã sʉꞌrʉaꞌcãrã bajuacãrã niwã. 28 Na bajuari curare niꞌcʉ̃ omocã sĩowĩrõcʉ niwĩ. Tojo weego põꞌrãtirãrẽ coꞌteri masõ niꞌcã da sõꞌarĩ da meꞌrã, omocãpʉ dʉꞌteõꞌoco niwõ. Aꞌtiro nico niwõ: “Ãꞌrĩ bajuamʉꞌtãmi”, nico niwõ. 29 Co tojo nirĩ curata cʉ̃ omocãrẽ wejequesõrõcʉ niwĩ. Cʉ̃ tojo weecãta, cʉ̃ acabiji peꞌe bajuamʉꞌtãcʉ niwĩ. Tojo weego põꞌrãtirãrẽ coꞌtego cʉ̃rẽ aꞌtiro nico niwõ: “¿Deꞌro weegʉ mʉꞌʉ maꞌmi peꞌere bajuamʉꞌtãcã weetiati?” Tojo weerã cʉ̃rẽ Fares wãmeyecãrã niwã. 30 Beꞌro apĩ omocãpʉ sõꞌarĩ da dʉꞌteõꞌoꞌcʉ peꞌe bajuacʉ niwĩ. Cʉ̃rẽ Zara[b] wãme õꞌocãrã niwã.

<- GÉNESIS 37GÉNESIS 39 ->