1 Abrahã cʉ̃ níꞌcaro cõꞌawãꞌcãgʉ̃, Neguev wãmetiropʉ waꞌacʉ niwĩ. Cʉ̃ Cades, tojo nicã Shur waꞌteropʉ tojacʉ niwĩ. Tita cʉ̃ Gerar wãmetiri macãpʉ waꞌacʉ niwĩ. 2 Cʉ̃ topʉ nígʉ̃, cʉ̃ nʉmo Sarare “Yʉꞌʉ acabijo nimo”, ni werecʉ niwĩ. Cʉ̃ tojo nicã tʉꞌo, Geracjʉ̃ wiogʉ Abimelec Sarare nʉmotigʉti nígʉ̃, miidutigʉ oꞌócʉ niwĩ. 3 Ti ñami Õꞌacʉ̃ Abimelere quẽꞌerõpʉ aꞌtiro nicʉ niwĩ: “Mʉꞌʉ wẽrĩgʉ̃saꞌa. Mʉꞌʉ miidutigʉ oꞌoꞌco marãpʉtigo nimo”.

4 Abimelec peꞌe Sara meꞌrã ne niticʉ niwĩ yujupʉ. Tojo weegʉ Õꞌacʉ̃rẽ yʉꞌticʉ niwĩ: “Yʉꞌʉ wiogʉ, yʉꞌʉ ñaꞌarõ weetimicã, ¿yʉꞌʉre, tojo nicã aꞌti macãcjãrã quẽꞌrãrẽ wẽjẽgʉ̃sari? 5 Abrahã basuta yʉꞌʉre, ‘Co yʉꞌʉ acabijo nimo’, niami. Co quẽꞌrã, ‘Yʉꞌʉ maꞌmi nimi’, niamo. Tojo weegʉ ‘Marãpʉ moogõ nimo’, ni wãcũgʉ̃, tojo weeasʉ. Ne ñaꞌarõ weetiapʉ”, nicʉ niwĩ.

6 Cʉ̃ tojo nisere tʉꞌo, Õꞌacʉ̃ Abimelere quẽꞌerõpʉ yʉꞌticʉ niwĩ: “Yʉꞌʉ masĩꞌi. Mʉꞌʉ añurõ wãcũse meꞌrã tojo weeapʉ. Tojo weegʉ mʉꞌʉ co meꞌrã cãjĩsĩꞌrĩcã cãꞌmotaꞌapʉ. Mʉꞌʉ co meꞌrã nígʉ̃, yʉꞌʉre ñaꞌarõ wéégʉ weronojõ weeboapã. 7 Niꞌcãrõacã pũrĩcãrẽ co marãpʉre wiaya tja. Cʉ̃ Õꞌacʉ̃ ye queti weremʉꞌtãrĩ masʉ̃ nimi. Mʉꞌʉrẽ wẽrĩticãꞌto nígʉ̃, mʉꞌʉ ye cjasere sẽrĩbosagʉsami. Mʉꞌʉ cʉ̃ nʉmorẽ wiatigʉ pũrĩcã, mʉꞌʉ, mʉꞌʉ yarã nipeꞌtirã meꞌrã wẽrĩgʉ̃saꞌa”, nicʉ niwĩ.

8 Ape nʉmʉ boꞌreacãpʉ Abimelec wãꞌcã, cʉ̃rẽ daꞌracoꞌterãrẽ pijio, cʉ̃ quẽꞌerõpʉ ĩꞌaꞌquere werecʉ niwĩ. Tere tʉꞌorã, pũrõ uicãrã niwã. 9 Narẽ wéréca beꞌro Abrahãrẽ pijio, aꞌtiro nicʉ niwĩ:

—¿Deꞌro weeati mʉꞌʉ ʉ̃sãrẽ? ¿Ñeꞌenojõ yʉꞌʉ mʉꞌʉrẽ ñaꞌarõ weeꞌque wapa to cãꞌrõjo yʉꞌʉre, tojo nicã yarãrẽ ñaꞌabutiaro tojacã weemiati? Mʉꞌʉ yʉꞌʉre tojo weeꞌque ne niꞌcʉ̃ tojo weeya marĩsere weeapʉ. 10 ¿Deꞌro weegʉ tojo weeati? ¿Ñeꞌenojõrẽ wãcũgʉ̃, tojo weeati? ni sẽrĩtiñaꞌcʉ niwĩ.

11 Abrahã cʉ̃rẽ yʉꞌticʉ niwĩ:

—Yʉꞌʉ aꞌtiro wãcũcãti. “Aꞌtopʉ Õꞌacʉ̃rẽ ne ẽjõpeotisama”, nicãti. Yʉꞌʉ, “Yʉꞌʉ nʉmo nimo” nicãrẽ, “Yʉꞌʉre wẽjẽbosama”, ni wãcũasʉ. 12 Diacjʉ̃ta niꞌi. Co yʉꞌʉ acabijota nimo. Yʉꞌʉ pacʉ macõ nimo. Paco peꞌe apego nimo. Tojo weegʉ core nʉmotiwʉ. 13 Yʉꞌʉ pacʉ tiropʉ níꞌcʉ Õꞌacʉ̃ dutiro meꞌrã wijagʉ, core aꞌtiro niwʉ̃: “Noꞌo marĩ waꞌaro etago, ãpẽrãrẽ, ‘Yʉꞌʉ maꞌmi nimi’, niña”, niwʉ̃.

14 Na tojo ucṹca beꞌro, Abimelec Abrahãrẽ oveja, wecʉa oꞌocʉ niwĩ. Tojo nicã daꞌracoꞌterã ʉmʉa, numia oꞌocʉ niwĩ. Abrahãrẽ cʉ̃ nʉmo Sarare wiacʉ niwĩ. 15 Abimelec Abrahãrẽ nicʉ niwĩ:

—Aꞌti diꞌta ya diꞌta niꞌi. Noꞌo mʉꞌʉ tʉꞌsaro mʉꞌʉ niatjore beseya.

16 Sarare aꞌtiro nicʉ niwĩ:

—Mʉꞌʉ maꞌmirẽ mil niyeru cujiri wapabʉjʉse cujirire oꞌoapʉ. Te meꞌrã mʉꞌʉ meꞌrã nirã́ mʉꞌʉrẽ ne mejẽcã wãcũsome. Tojo weego na ĩꞌorõpʉ buꞌiri marĩgõ tojagosaꞌa, nicʉ niwĩ.

17-18 Abimelec tojo níca beꞌro, Abrahã Õꞌacʉ̃rẽ sẽrĩbosacʉ niwĩ. Abimelec Sarare miaꞌque buꞌiri cʉ̃ nʉmorẽ, narẽ daꞌracoꞌterã numiarẽ, nipeꞌtirã cʉ̃ ya wiꞌi nirãrẽ Õꞌacʉ̃ põꞌrãtimasĩticã weecʉ niwĩ. Abrahã narẽ sẽrĩbosáca beꞌro Õꞌacʉ̃ narẽ yʉꞌrʉocʉ niwĩ. Tojo weerã na põꞌrãtimasĩcãrã niwã tja.

<- GÉNESIS 19GÉNESIS 21 ->