1 Õꞌacʉ̃ ʉ̃rʉ̃gʉ̃pʉ ucũgʉ̃, nipeꞌtise aꞌte ucũsere ucũcʉ niwĩ:

2 “Yʉꞌʉ Õꞌacʉ̃, mʉsã wiogʉ niꞌi. Yʉꞌʉta mʉsãrẽ Egiptopʉre miiwijawʉ. Topʉre mʉsã narẽ daꞌracoꞌterã niwʉ̃.

3 ”Yʉꞌʉ niꞌcʉ̃rẽta ẽjõpeoya. Ne ãpẽrãnojõrẽ ẽjõpeoticãꞌña.

4 ”Ne queosere yee, ẽjõpeoticãꞌña. Ʉꞌmʉarõ cjase queosere, ne docapʉ aꞌti diꞌtapʉ nisere, maa pajiri maajopʉ nise queose quẽꞌrãrẽ yee ẽjõpeoticãꞌña. 5 Ne narẽ ẽjõpeorã, paamuꞌrĩqueꞌaticãꞌña. Ne narẽ ñubuepeoticãꞌña. Yʉꞌʉ Õꞌacʉ̃ mʉsã wiogʉ niꞌi. Mʉsã ãpẽrãrẽ ẽjõpeosirutucã, ne ʉaweꞌe. Yʉꞌʉre ĩꞌasĩꞌrĩtirã tojo weema. Tojo weegʉ na põꞌrãrẽ, na pãrãmerãrẽ, na pãrãmerã nituriarãrẽ buꞌiri daꞌregʉsaꞌa. 6 Yʉꞌʉre mairã, yʉꞌʉ dutiꞌquere queoro weerã́ peꞌema peje turiri beꞌrocjãrãrẽ maꞌinuꞌcũgʉ̃saꞌa.

7 ”Yʉꞌʉ Õꞌacʉ̃, mʉsã wiogʉre wiopesase meꞌrã wãcũtimirã, wãmepeomaꞌaticãꞌña. Tojo ucũmaꞌarãrẽ buꞌiri daꞌregʉsaꞌa.

8 ”Yʉꞌʉ soodutigʉ cũuca nʉmʉ saurure wãcũña. Ya nʉmʉ, yʉꞌʉre ẽjõpeori nʉmʉ niꞌi. 9 Seis nʉmʉrĩta daꞌraya. Te nʉmʉrĩrẽ nipeꞌtise mʉsã daꞌrase cʉosere daꞌraweꞌocãꞌña. 10 Siete nʉmʉ nirĩ nʉmʉ peꞌema, yʉꞌʉ mʉsã wiogʉre wãcũ, soodutigʉ cũuca nʉmʉ niꞌi. Ti nʉmʉrẽ ne cãꞌrõ daꞌraticãꞌña. Mʉsã macʉ̃, mʉsã macõ, mʉsãrẽ daꞌracoꞌtegʉ o daꞌracoꞌtego, mʉsã yarã waꞌicʉrã, ape diꞌtacjãrã mʉsã tiropʉ nirã́ ne daꞌraticãꞌto. 11 Yʉꞌʉ Õꞌacʉ̃, mʉsã wiogʉ seis nʉmʉrĩta ʉꞌmʉsere, diꞌtare, pacase maarĩrẽ, nipeꞌtise tepʉ nisere weewʉ. Tuꞌajanʉꞌcõ, siete nʉmʉ nirĩ nʉmʉrẽ soowʉ. Tojo weero ti nʉmʉ sauru, ya nʉmʉ niꞌi. ‘Yʉꞌʉre ẽjõpeori nʉmʉ niato’, ni soodutigʉ cũuwʉ̃.

12 ”Mʉsã pacʉre, mʉsã pacore añurõ wejepeoya. Yʉꞌʉ Õꞌacʉ̃, mʉsã wiogʉ mʉsãrẽ oꞌori diꞌtare yoacã catirãti nírã, tojo weeya.

13 ”Masãrẽ wẽjẽcõꞌaticãꞌña.

14 ”Mʉsã nʉmosãnumia nitirãrẽ, mʉsã marãpʉsʉmʉa nitirãrẽ aꞌmetãrãticãꞌña.

15 ”Yajaticãꞌña.

16 ”Beseropʉ ãpẽrãrẽ ñaꞌarõ waꞌadutirã, na ye cjasere nisooticãꞌña.

17 ”Ãpẽrã ya wiꞌire ne ʉoticãꞌña. Cʉ̃ nʉmorẽ, cʉ̃rẽ daꞌracoꞌtegʉre, cʉ̃rẽ daꞌracoꞌtegore, cʉ̃ yagʉ wecʉre, cʉ̃ yagʉ burrore, nipeꞌtise cʉ̃ cʉosere ʉoticãꞌña” ni, dutise oꞌocʉ niwĩ Õꞌacʉ̃.

18 Israe curuacjãrã nipeꞌtirã bʉpo paacã, oveja ʉmʉ capesaꞌro bʉsʉcã tʉꞌorã, bʉpo yaꞌbacã, ʉ̃rʉ̃gʉ̃ oꞌmepuꞌsunuꞌcũcã ĩꞌarã, ui narãsãcãrã niwã. Tojo weeꞌcãrã niyurã, tigʉ yoacureropʉ tojacãrã niwã. 19 Tojo weerã Moisére aꞌtiro nicãrã niwã:

—Mʉꞌʉ ʉ̃sãrẽ ucũña. Mʉꞌʉ dutisere yʉꞌtirãti. Õꞌacʉ̃ cʉ̃ basu ʉ̃sãrẽ ucũticãꞌto. Cʉ̃ ʉ̃sã meꞌrã ucũcã pũrĩcãrẽ, ʉ̃sã wẽrĩbosaꞌa, nicãrã niwã.

20 Moisé narẽ yʉꞌticʉ niwĩ:

—Mʉsã uiticãꞌña. Õꞌacʉ̃ marĩrẽ diacjʉ̃ta yʉꞌʉre ẽjõpeomiti nígʉ̃, aꞌtiami. Mʉsã cʉ̃rẽ wiopesase meꞌrã wãcũcã ʉagʉ, cʉ̃rẽ yʉꞌrʉnʉꞌcã, ñaꞌarõ weeticãꞌto nígʉ̃, aꞌtiami.

21 Masã uirã, ʉ̃rʉ̃gʉ̃ yoacureropʉ tojaqueꞌacãrã niwã. Moisé peꞌe Õꞌacʉ̃ nirṍ, oꞌmecurua naꞌitĩꞌarĩ curua pʉꞌtopʉ ejanʉꞌcãcʉ niwĩ.