1 Yʉꞌʉ acawererã, niꞌcãrõacãma marĩ wiogʉ Jesucristo aꞌtiatjere, cʉ̃ tiropʉ marĩrẽ neonʉꞌcõ miatjere weregʉti. 2 Cãꞌrõacã meꞌrã mʉsã weresuꞌrianoꞌticãꞌña. Tojo nicã ãpẽrã “Marĩ wiogʉ aꞌtiri nʉmʉ nitojaꞌa” mʉsãrẽ nicã, wãcũqueꞌtiticãꞌña. Aꞌtiro nibosama. “Ãpẽrã Espíritu Santu yʉꞌʉre tojo niami”, nibosama. Ãpẽrã “Apĩ weregʉ, tojo niami”, nibosama. Ãpẽrã “Pablo quẽꞌrã tojo ojacãrã niama”, nibosama. Aꞌtere tʉꞌorã, wãcũqueꞌtiticãꞌña. 3 Na ʉaronojõ nisoonoꞌticãꞌña. Cʉ̃ aꞌtiatji nʉmʉ dʉporo aꞌtiro waꞌarosaꞌa. Masã ʉpʉtʉ waro Õꞌacʉ̃rẽ yʉꞌrʉnʉꞌcãrãsama. Tojo weeri cura niꞌcʉ̃ ñaꞌarõ weeyʉꞌrʉnʉꞌcãgʉ̃ waro bajuagʉsami. Cʉ̃ pecameꞌepʉ buꞌiri daꞌre bajurionoꞌacjʉ nigʉ̃sami. 4 Cʉ̃ Õꞌacʉ̃rẽ ĩꞌatuꞌtigʉ, tojo nicã nipeꞌtise masã ẽjõpeosenojõrẽ ñaꞌarõ ucũacjʉ nigʉ̃sami. Cʉ̃ diaꞌcʉ̃rẽ ẽjõpeocã ʉagʉsami. Õꞌacʉ̃ weronojõ Õꞌacʉ̃ wiꞌipʉ sãjãanujã dujigʉsami. “Yʉꞌʉ Õꞌacʉ̃ niꞌi”, nitaꞌsagʉsami. 5 Yʉꞌʉ mʉsã tiropʉ nígʉ̃, tere werewʉ. ¿Mʉsã tere wãcũweti? 6 Mʉsã cʉ̃ ñaꞌagʉ̃ aꞌtiatjere cãꞌmotaꞌagʉre masĩꞌi. Õꞌacʉ̃ cʉ̃ queoca nʉmʉ dʉporo ñaꞌagʉ̃ aꞌtisome. 7 Dicʉse ñaꞌase cʉ̃ weeatjere masĩnoꞌña marĩꞌi yujupʉ. Tojo masĩnoꞌña marĩmicã, ñaꞌase cʉ̃ weesenojõ nʉꞌcãtojaꞌa. Cʉ̃rẽ cãꞌmotaꞌagʉre miáca beꞌro cʉ̃ ñaꞌarõ weese masĩnoꞌrõsaꞌa. 8 Cʉ̃ waꞌacã, ñaꞌarõ weesebʉcʉ peꞌe aꞌtigʉsami. Beꞌro marĩ wiogʉ Jesú aꞌti diꞌtapʉ apaturi aꞌtigʉ, cʉ̃ tutuaro meꞌrã ñaꞌagʉ̃rẽ wẽjẽgʉ̃sami. Cʉ̃ asistese meꞌrã aꞌtigʉ, cʉ̃rẽ cõꞌabajuriogʉsami. 9 Cʉ̃ ñaꞌagʉ̃ etáca beꞌro wãtĩa wiogʉ weetamurõ meꞌrã peje weeĩꞌotaꞌsagʉsami. 10 Pecameꞌepʉ buꞌiri daꞌrenoꞌajãrẽ noꞌo nise ñaꞌase põtẽorõ narẽ weetaꞌsagʉsami. Õꞌacʉ̃ narẽ yʉꞌrʉosĩꞌrĩmicã, na diacjʉ̃ cjasere ẽjõpeosĩꞌrĩtirãsama. Tojo weerã pecameꞌepʉ waꞌadojarãsama. 11 Na ẽjõpeotise buꞌiri Õꞌacʉ̃ nemorõ narẽ nisoonemocã weegʉsami. Tojo weerã nisoonoꞌo, ẽjõpeorãsama. 12 Õꞌacʉ̃ ye diacjʉ̃ cjasere ẽjõpeosĩꞌrĩtirã, ñaꞌarõ weesere tʉꞌsayʉꞌrʉarãsama. Tojo weegʉ Õꞌacʉ̃ narẽ buꞌiri daꞌre bajuriogʉsami.

13 Yʉꞌʉ acawererã, Jesú marĩ wiogʉ mʉsãrẽ maꞌimi. Õꞌacʉ̃ ne waropʉ mʉsãrẽ yʉꞌrʉweticã wéégʉ besecʉ niwĩ. Espíritu Santu tutuaro meꞌrã Õꞌacʉ̃ yarã sãjãcã weecʉ niwĩ. Tojo nicã mʉsã diacjʉ̃ cjasere ẽjõpeodutigʉ tojo weecʉ niwĩ. Tojo weerã ʉ̃sã mʉsã weesetisere wãcũrã, Õꞌacʉ̃rẽ eꞌcatise oꞌonuꞌcũcãꞌrãti. 14 Ʉ̃sã mʉsãrẽ Jesucristo masãrẽ yʉꞌrʉose quetire werewʉ. Te meꞌrã Õꞌacʉ̃ mʉsãrẽ cʉ̃ põꞌrã waꞌacã weecʉ niwĩ. Marĩ wiogʉ Jesucristo nirõpʉ marĩrẽ cʉ̃ añubutiasere buꞌipejatamucã ʉagʉ, tojo weecʉ niwĩ. 15 Tojo weerã wãcũtutuanuꞌcũcãꞌña. Ʉ̃sã mʉsã tiropʉ buꞌeꞌquere, tojo nicã ʉ̃sã todʉporopʉ ojaoꞌoꞌquere wãcũnʉrʉ̃ña.

16 Jesucristo marĩ wiogʉ basuta, tojo nicã marĩ pacʉ Õꞌacʉ̃ marĩrẽ pajañaꞌrã, maꞌicãrã niwã. Na marĩrẽ wãcũtutuacã weenuꞌcũsama. Marĩrẽ oꞌoatjere eꞌcatiyutojacã weesama. 17 Mʉsãrẽ wãcũtutuacã, ẽjõpeonuꞌcũcã weeato. Nipeꞌtise mʉsã ucũsere, mʉsã weesere añurõ niseticã weeato.

<- 2 TESALONICENSES 12 TESALONICENSES 3 ->