1 Marĩ basu añurõ ucũcã, wapamarĩꞌi. Tojo nimigʉ̃, ucũgʉ̃ti. Marĩ wiogʉ quẽꞌese weronojõ yʉꞌʉre ĩꞌoꞌquere weregʉti. 2 Jesucristore ẽjõpeoca beꞌro aꞌtiro waꞌawʉ. Quẽꞌese weronojõ Õꞌacʉ̃ yʉꞌʉre cʉ̃ tiropʉ miimʉjãwĩ. Tere yʉꞌʉ ĩꞌáca beꞌro catorce cʉ̃ꞌmarĩ yʉꞌrʉꞌʉ. Yʉꞌʉ upʉ meꞌrã o yʉꞌʉ ejeripõꞌrã diaꞌcʉ̃ waꞌagʉ, waꞌapã. Masĩtisaꞌa. Õꞌacʉ̃ diaꞌcʉ̃ masĩsami. 3-4 Aꞌtere masĩꞌi. Õꞌacʉ̃ ʉꞌmʉse Paraíso wãmetiropʉ yʉꞌʉre miiejawĩ. Upʉ meꞌrã o ejeripõꞌrã diaꞌcʉ̃ miagʉ̃, miapĩ. Masĩtisaꞌa. Õꞌacʉ̃ niꞌcʉ̃ta tere masĩsami. Yʉꞌʉ topʉ nígʉ̃, masã masĩtisere tʉꞌowʉ. Cʉ̃ wereꞌque masãrẽ weredutise mejẽta niwʉ̃. 5 Aꞌtiro waꞌagʉnojõ pũrĩcãrẽ “Ãpẽrã yʉꞌrʉoro nimi”, nirõʉaꞌa. Yʉꞌʉ basu “Aꞌtiro nigʉ̃nojõ niꞌi”, nímasĩtisaꞌa. Yʉꞌʉ tutuatise diaꞌcʉ̃rẽ añurõ ucũgʉ̃ti. 6 Tojo nimigʉ̃, yʉꞌʉ basu añurõ ucũgʉ̃, ucũmaꞌagʉ̃ mejẽta weebosaꞌa. Diacjʉ̃ta ucũbosaꞌa. Aꞌtiro niꞌi. Mʉsã yʉꞌʉre ẽjõpeobosaꞌa. Tojo weeri nígʉ̃, “Yʉꞌʉ ãpẽrã yʉꞌrʉoro niꞌi” nisere nisome. Yʉꞌʉ weetisepʉreta, yʉꞌʉ weretisepʉreta yʉꞌrʉoquejobosaꞌa.

7 Õꞌacʉ̃ yʉꞌʉre ĩꞌoꞌque añubutiase niwʉ̃. Yʉꞌʉ tere wãcũgʉ̃, yʉꞌʉ basu “Añuyʉꞌrʉagʉ niꞌi”, nitawio niꞌi. Tojo weegʉ Õꞌacʉ̃ yʉꞌʉre tojo wãcũrĩ nígʉ̃, aꞌtiro weewĩ. Wãtĩ yʉꞌʉ upʉre dutidaꞌrecã, tojo ĩꞌacãꞌcʉ niwĩ. Te duti yʉꞌʉre pota buꞌbero weronojõ pũrĩꞌi. 8 Iꞌtiati yʉꞌʉ marĩ wiogʉre “Te pũrĩse peꞌtiato”, sẽrĩmiwʉ̃. 9 Cʉ̃ peꞌe yʉꞌʉre aꞌtiro niwĩ: “Yʉꞌʉ mʉꞌʉrẽ maꞌiꞌi. Tojo weero mʉꞌʉrẽ apeyenojõ dʉꞌsaweꞌe. Masã tutuatirã nicã, yʉꞌʉ tutuasere nemorõ ĩꞌota basioꞌo”, niwĩ marĩ wiogʉ. Tojo weegʉ yʉꞌʉ tutuatigʉ, eꞌcatiꞌi. Tojo tutuatigʉ, Cristo tutuase yʉꞌʉpʉre niato nígʉ̃ tojo weeꞌe. 10 Yʉꞌʉre ñaꞌarõ ucũsere, yʉꞌʉre apeyenojõ dʉꞌsasere eꞌcatiꞌi. Tojo nicã ẽjõpeose buꞌiri ñaꞌarõ weesere, mejẽcã waꞌasere eꞌcatiꞌi. Aꞌtiro niꞌi. Tutuatironojõ oꞌogʉ, nemorõ tutuagʉ waꞌaꞌa.

11 Yʉꞌʉ, yʉꞌʉ basu añurõ ucũgʉ̃, maatigʉ weronojõ weeꞌe. Mʉsã peꞌeta yʉꞌʉre tojo ucũdutirã weronojõ weeꞌe. Mʉsã yʉꞌʉre añurõ ucũcã, añu nibopã. Ãpẽrã mʉsãrẽ nisoose meꞌrã ẽjõpeocã weerã́ doca niweꞌe. Na aꞌtiro nisama: “Ʉ̃sã Jesucristo besecṹúꞌcãrã nemorõ niꞌi”, nisama. Yʉꞌʉ mejõ nigʉ̃ nimigʉ̃, tojo bʉsʉsijãrã dijaro niweꞌe. 12 Yʉꞌʉ mʉsã tiropʉ piꞌetimigʉ̃, wãcũtutuatjĩagʉ̃, peje Õꞌacʉ̃ tutuaro meꞌrã weeĩꞌowʉ̃. Te meꞌrã diacjʉ̃ta yʉꞌʉre Jesucristo besecṹúꞌquere ĩꞌowʉ̃. 13 Mʉsã Corintocjãrãrẽ ãpẽrã Jesucristore ẽjõpeose cururicjãrã doca ẽjõnʉꞌcõtiwʉ. Aꞌte diaꞌcʉ̃rẽ weeticãti. Mʉsãrẽ wapaseetiwʉ. Mʉsã tʉꞌoñaꞌcã, ¿yʉꞌʉ tojo weese ñaꞌa niti? Ñaꞌacãma, acobojoya.

14 Yʉꞌʉ mʉsã tiropʉ waꞌatjere apoyugʉ weeꞌe. Niꞌcãrõacã yʉꞌʉ waꞌase meꞌrã iꞌtiati waꞌarosaꞌa. Mʉsãrẽ “Weetamuña”, ni caribosome. Mʉsã cʉosere ẽꞌmasome. Aꞌte diaꞌcʉ̃rẽ ʉaꞌa. Mʉsã Cristo dutiꞌquere añurõ weecã ʉaꞌa. Aꞌtiro niꞌi. Pacʉsʉmʉa na põꞌrãrẽ na ʉasere oꞌosama. Na põꞌrã mejẽta na pacʉsʉmʉarẽ na ʉasere oꞌosama. Aꞌtiro wéérã, mʉsã yʉꞌʉ põꞌrã weronojõ niꞌi. Tojo weerã yʉꞌʉre yʉꞌʉ ʉasere oꞌoweꞌe. 15 Yʉꞌʉ cʉose ejatuaro mʉsãrẽ weetamugʉ̃ti. Nipeꞌtiro yʉꞌʉ weepõtẽota basioro mʉsãrẽ añurõ waꞌato nígʉ̃ tojo weetamugʉ̃ti. Aꞌtiro tʉꞌoñaꞌa. Yʉꞌʉ mʉsãrẽ nemorõ maꞌicã, mʉsã peꞌe yʉꞌʉre dʉjaro maꞌibosaꞌa.

16 Ãpẽrã yʉꞌʉ caribotisere masĩmirã, aꞌtiro nisama: “Cʉ̃ meꞌrĩse meꞌrã mʉsãrẽ ẽjõpeocã weecʉ niwĩ”, nisama. 17 ¿Yʉꞌʉ oꞌóꞌcãrã mʉsãrẽ nisoo, mʉsã yere ẽꞌmarĩ? Ne apeyenojõ ẽꞌmaticãrã niwã. 18 Yʉꞌʉ Titore mʉsã tiropʉ waꞌadutiwʉ. Tojo nicã apĩ Jesucristore ẽjõpeogʉ marĩ acaweregʉre cʉ̃ meꞌrã oꞌówʉ. ¿Topʉre Tito nisoose meꞌrã mʉsã yere ẽꞌmarĩ? Mʉsã masĩsaꞌa. Tito yʉꞌʉ weronojõ weemi. Mʉsãrẽ buꞌégʉ, añuse diaꞌcʉ̃rẽ weesĩꞌrĩcʉ niwĩ. Ne wapaseeticʉ niwĩ.

19 Apetero weerã mʉsã ʉ̃sãrẽ “Añurõ wãcũdutirã weema”, nisaꞌa. Tojo niweꞌe. Aꞌtiro peꞌe niꞌi. Ʉ̃sã Õꞌacʉ̃ ĩꞌorõpʉre Cristo dutiro meꞌrã ucũꞌu. Yʉꞌʉ mairã yʉꞌʉ acawererã, mʉsãrẽ Õꞌacʉ̃rẽ nemorõ ẽjõpeonemodutigʉ tojo weeꞌe. 20 Yʉꞌʉ uisaꞌa. Apetero weerã yʉꞌʉ mʉsã tiropʉ waꞌacã, “Yʉꞌʉ ʉaronojõ mejẽta weerã weebosama”, nisaꞌa. Mʉsã quẽꞌrã yʉꞌʉre mejãrõta nibosaꞌa. Apeye quẽꞌrãrẽ yʉꞌʉ mʉsãrẽ “Aꞌtiro weerã weebosama”, nisaꞌa. “Aꞌmetuꞌtirã weebosama. Ʉorã weebosama. Uarã weebosama. Na ye diaꞌcʉ̃rẽ wãcũrã weebosama. Ãpẽrãrẽ ucja, ñaꞌarõ ucũrã weebosama. Tojo nicã ‘Ʉ̃sã ãpẽrã yʉꞌrʉoro añuyʉꞌrʉnʉꞌcãꞌa’, nirã weebosama. Noꞌo ʉaro weemaꞌacãrã weebosama”, nisaꞌa. 21 Yʉꞌʉ uisaꞌa. Mʉsã tiropʉ apaturi waꞌacã, Õꞌacʉ̃ yʉꞌʉ wiogʉ mʉsã ñaꞌarõ weeꞌque buꞌiri yʉꞌʉre bopoyoro yʉꞌrʉcã weebosami. Tojo nicã ñaꞌarõ weeꞌcãrã acobojose sẽrĩticã, pũrõ utibosaꞌa. Mʉsã ñaꞌarõ weesere, ñaꞌarõ wãcũsere, noꞌo mʉsã aꞌmetãrãbajaqueꞌatisere pũrõ bʉjawetibosaꞌa. Nipeꞌtise ñaꞌase ʉaripejase, mʉsã weewʉasenojõrẽ duꞌuticã, mejãrõta bʉjawetibosaꞌa.

<- 2 CORINTIOS 112 CORINTIOS 13 ->