1 Ne waro Jesucristore ẽjõpeorã aꞌtiro weecã ʉaꞌa. Nipeꞌtirãrẽ sẽrĩbosarã. Õꞌacʉ̃ narẽ weetamuato nírã sẽrĩbosato. Õꞌacʉ̃rẽ sẽrĩrã, “Añuꞌu”, niato. 2 Wiorãrẽ, nipeꞌtirã dutiri masãrẽ sẽrĩbosato. Marĩ tojo weerã aꞌmequẽse marĩrõ nirãsaꞌa. Nipeꞌtise Õꞌacʉ̃ dutisere queoro weemasĩrãsaꞌa. Masã meꞌrã queoro nisetirãsaꞌa. 3 Marĩ ãpẽrãrẽ sẽrĩbosarã, añurõ weerã weeꞌe. Õꞌacʉ̃ marĩrẽ yʉꞌrʉogʉ tojo weecã tʉꞌsasami. 4 Õꞌacʉ̃ nipeꞌtirãrẽ cʉ̃ tiropʉ waꞌacã ʉasami. Nipeꞌtirãrẽ cʉ̃ ye, diacjʉ̃ cjasere masĩcã ʉasami. 5 Õꞌacʉ̃ niꞌcʉ̃ta nimi. Tojo nicã Jesucristo niꞌcʉ̃ta tja masãrẽ Õꞌacʉ̃ meꞌrã apobosari masʉ̃ nimi. Cʉ̃ masʉ̃ weronojõ upʉtigʉ nicʉ niwĩ. 6 Jesucristo nipeꞌtirã masãrẽ yʉꞌrʉogʉ wẽrĩbosacʉ niwĩ. Marĩ ñaꞌarõ weeꞌque wapare wapayegʉ tojo weecʉ niwĩ. Aꞌte quetire “Tojo waꞌarosaꞌa” nícatero ejacã, werebajurẽnoꞌcaro niwʉ̃. 7 Cʉ̃ ye quetire weredutigʉ Cristo yʉꞌʉre sõrõwĩ. Cʉ̃ besecṹúꞌcʉ niato nígʉ̃ judío masã nitirãrẽ cʉ̃ ye, diacjʉ̃ cjasere buꞌedutigʉ sõrõwĩ. Diacjʉ̃ta niꞌi. Nisoogʉ mejẽta weeꞌe.

8 Tojo weegʉ nipeꞌtirocjãrã ʉmʉarẽ aꞌtiro weecã ʉaꞌa. Na nerẽwʉaropʉ Õꞌacʉ̃rẽ sẽrĩcã ʉaꞌa. Ñúmorõ sẽrĩrã, ñaꞌarõ weese moorã sẽrĩrõʉaꞌa. Uase, aꞌmetuꞌtise moorã sẽrĩrõʉaꞌa. 9 Numia quẽꞌrã aꞌtiro weecã ʉaꞌa. Na suꞌtire añurõ ĩꞌatʉꞌsaropʉta sãñato. Ejatuaro weemeꞌrĩcãꞌto. Na upʉre ãpẽrã “Añurã nima” nidutirã peje maꞌmasuꞌayʉꞌrʉoticãꞌto. 10 Aꞌtiro peꞌe weeato. Añurõ bajusĩꞌrĩrã, Õꞌacʉ̃rẽ ẽjõpeorã numia weewʉasenojõrẽ weeato. Bajuyoropʉre añurõ weese meꞌrã “Añurã nima”, ninoꞌato. Ãpẽrãrẽ weetamu, añurõ weeato. 11 Jesucristore ẽjõpeorã nerẽ, na buꞌeri curare numia diꞌtamarĩrõ tʉꞌoato. Ũrũsãmaꞌa, yeꞌsuticãꞌto. 12 Ne numiarẽ masã decopʉ werenuꞌcũcã ʉaweꞌe. Tojo nicã ʉmʉarẽ ne dutiticãꞌto. Tojo weronojõ oꞌorã, na numia diꞌtamarĩato. 13 Aꞌtiro niꞌi. Õꞌacʉ̃ Adã́rẽ weemʉꞌtãcʉ niwĩ. Cʉ̃ beꞌro Evare weecʉ niwĩ. 14 Apeye quẽꞌrãrẽ, Adã́ wãtĩ nisoonoꞌmʉꞌtãcʉ mejẽta nimi. Numio peꞌe nisoonoꞌmʉꞌtãco niwõ. Tojo weenoꞌco niyugo, Õꞌacʉ̃ dutiꞌquere yʉꞌrʉnʉꞌcãco niwõ. 15 Tojo nimicã, Õꞌacʉ̃ numiarẽ yʉꞌrʉogʉsami. Na põꞌrãticã, narẽ añurõ yʉꞌrʉweticã weegʉsami. Na cʉ̃rẽ ẽjõpeocã, masãrẽ maꞌicã, tojo weegʉsami. Na queoro wãcũyu, weeseticã, Õꞌacʉ̃ cʉ̃ ʉaro weenuꞌcũcã, yʉꞌrʉweticã weegʉsami.

<- 1 TIMOTEO 11 TIMOTEO 3 ->