58
Ŋeer ee ighason Maaron to ighur atuya pa yes daaba sasaghati
Mbouŋ to David
Paesiiŋ ila pa ŋeer tau imuŋmuuŋ pa mbouŋ na tauvene: Mbouŋ tane aliiŋa, ene: ‘Ureua sov.’
1 Yam daaba, alooŋ. Ŋgar tau yam asasavia na, ene iduduuŋ?
Ve isaav ighe agabiiz saveeŋ to tamtamon ve aghur atuya pazi, yam ataghon ŋgar duduuŋa? Mako kat!
2 Lolomim ariaaŋ pa ŋgar saghati mon,
ve avavaghamunia tamtamon irau nugh nugh.
3 Zeran sasaghati, saawe isov, tisosor pa eez poia.
Saawe tau tinazŋa tipoop zi ve ilam, avozi karom, ve tisosor pa Maaron eez tooni.
4-5 Saveeŋ tau ivotvot ila avozi na, ene ivavaghamunia tamtamon imin moot saghati.
Ve isaav ighe tatoova to tapaduduuŋ zi, ene irau tilooŋ ghiit mako. Pasaa, tipoon taliŋazi.
Yes timin moot to malmal tau taliŋazi puura mako. Tauvene isaav ighe moot tawe taama iviv pirai, leso ighamu loolo poia ve imogheer, i irau ilooŋ pirai luutu mako.
6 O Maaron, zeran tawe timin laion paghpaaghu tau matazi ghamuuŋ malmal.
Arav polpolin livozi, ve apas zi! Leso tivaghamun tamtamon sov.
7 Upasov zi gha tilalez, imin yaa tau ireer ila le imaak.
Uvaghaaz zi ila aghem saamba imin tamtamon tivaghaaz kikiliiŋ le igorgor.
8 Ugham zi timin golgool tau timaat ve timbuuz.
Naghe timin geegeu tau tinazŋa tipoop zi ve timin siŋ mon.
Irau tileep ve tighita aaz mako.
9 Maaron pale rekia mon iŋgoor saawe toozi tuuku, imin gabua gorgori tau yav ighani rekia.
Aatyavyav tooni pale izaa toozi, ve ipasov zi gha tilalez, imin pen tau yaghur ivuvuura ila.
10 Isaav ighe tamtamon duduŋazi tighita Maaron ighur atuya pa zeran sasaghati ve iyat ŋgar toozi, ene pale lolozi poia.
Zeran sasaghati siŋ toozi pale ireer izi ve ipot izala taan paavo, ve tamtamon duduŋazi tilaagh ila.
11 Mako tamtamon tisaav tighe:
“Onoon kat, Maaron ilepleep, ve igagabiiz tamtamon to taan, ve ighurghur atuya pazi.
Ve yes tau titaghon ŋgar duduuŋa na, i ighamgham lezi atuya popoia.” *Mbo 37:37; 2Tes 1:5+
<- Mbouŋ To Yes Israela 57Mbouŋ To Yes Israela 59 ->