Mbouŋ To Yes Israela 24

Maaron, i kinik tau eeza tiina pa tapiri ve poia tooni

Mbouŋ to David

1 Taan tomania gabua naol isov tau tileep ve tigheen ila, ene to Yoova.

Nugh tisov tomania tamtamon tau tilepaar ila, ene i tooni mon. [a]

2 Pasaa, i ta ighur taan ipot izala te paavo.

Ve ipariaaŋ taan puughu igheen tuŋia izila te loolo ta siiŋa geeg. [b] [~3~]

3 Sei irau izala loloz to Yoova ve isuŋ pani?

Ve sei irau iloŋ ila rumei tooni patabuyaaŋ ve iyooz ila i naagho? [~4~]

4 Tamtamon tauvene: I igham sosor eta mako. Ve ŋgar isov tau igheen ila loolo na, ene iŋgalaaŋ mon.

I ipait maaron karomŋa mako,

ve iwaat Maaron eeza sorok to ipalot saveeŋ karom mako. [~5~]

5 Tamtamon tauvene, poia to Yoova aat izaa tooni.

Maaron tau Uleeŋa tooni na, pale igham mulini ve ileep poi, ve ipaghazoŋaini ighe i ŋeer duduuŋa.

6 Zeran tauvene tizuari zi pa Maaron.

Yes tighe tila tivot to Maaron to Yakop naagho, ve tisuŋ pani.

7 O yam ataman, akaak ve tinimim izaa.

Yam ataman to muuŋ geeg, tinimim izaa, ve akaak le akaak kat.

Leso sooso irau kinik tau eeza tiina pa tapiri ve poia tooni na itaghoni iloŋ ila. [~6~] [~7~]

8 Laak, kinik tau eeza tiina pa tapiri ve poia tooni na, ene sei?

Ene Yoova.

I saksaki, ve tapiri tiina.

Ve i irau kat pa ghamuuŋ malmal. [~8~]

9 O yam ataman, akaak ve tinimim izaa.

Yam ataman to muuŋ geeg, tinimim izaa, ve akaak le akaak kat.

Leso sooso irau kinik tau eeza tiina pa tapiri ve poia tooni na itaghoni iloŋ ila.

10 Laak, kinik tau eeza tiina pa tapiri ve poia tooni na, ene sei?

Ene Yoova.

I Maaron saksaki, ve iŋgin gabua naol isov.

Onoon kat, i kinik tau eeza tiina pa tapiri ve poia tooni.