16
Suŋuuŋ to ŋeer tau inumeer Yoova
Mbouŋ to David
1 O Maaron, umin sigheu payau ve uŋgin ghau naleep poi.
Pasaa, yau nanumeer ghom ve nayooŋ ilat tsio.
2 Yau nasaav pa Yoova: “Yo Tiina tsiau.
Isaav ighe naleep soghan payo, ene irau nandeeŋ gabua poia eta mako.”
3 Tamtamon patabuyaaŋa to Yoova tau tilepleep izi taan, yes popoiazi kat.
Isaav ighe naleep tomani zi, yes tigham lolog poia le poia kat. *Mbo 119:63; Mbaŋ 2:42+; Hib 10:25
4 Eemon zeran tau tibesbees pa maaron karomŋa na, pataŋani naol pale izazaa toozi.
Yau irau napaak zi pa watooŋrau toozi mako.
Ve avog irau itut maaron toozi ezazi rigta mako.
5 Yau naghita Yoova naghe i imin taan poia ee tau tipuli payau to naleep ila.
Irau nambool pa gabua eta mako. Pasaa, yau naleep ila i niima. *Mbo 23:5, 73:25+
6 Gabua naol tau yau nagham zi ilat tsio, ene popoiazi mon.
Onoon kat, lepoogh tsiau tau Yoova igham payau ne, ene poia kat. Imin naleep ila taan paghuuna ee tau tipuli payau. *Mbo 142:5; Ga 4:7
7 Yau napait Yoova pa poia tooni. Pasaa, i ighamgham pooz payau, leso nataghon eez poia.
Mboŋ paam, ŋgar tau i ighuru ila lolog ne, itotoi eez payau.
8 Saawe isov, matag iŋgalŋgal naghe Yoova ileep tomani ghau.
I ilepleep ila zigeg tapir ve ipapalot ghau. Tauvene gabua eta irau igham ghau narur ne mako. *Mbo 15:5; Mbaŋ 2:25
9 Tauta tintinig ve lolog poia kat.
Irau naroi mako. Pasaa, yo aat uŋgin ghau naleep poi.
10 Irau ughur murim payau, ve upul ghau namaat gha nazila mateegha niazi ne mako.
Pasaa, yau tamtamon tsio. Lolog isaghav ghom ariaaŋ, ve nataghon eez tsio.
Irau upul patag imbuuz ila naal loolo ne mako. *Mbaŋ 2:27, 13:35
11 Yo utotoi eez to lepoogh poia payau.
Isaav ighe naleep tomani ghom, ene pale lolog poia le poia kat.
Ighe naleep ila nimam tapir, ene aat nayamaan poia tsio taghon taghon gha ila. *Mbo 36:7+
<- Mbouŋ To Yes Israela 15Mbouŋ To Yes Israela 17 ->