1 Yesu isavia saveeŋ palelaaŋ ite pa yes daaba tana ighe: 2 “Pooz to nugh sambam, ene imin kinik ee tau ighe igham ghanghaniiŋ tiina pa vaiŋ to naatu. 3 Tauvene isain tamtamon katini ighe tilam tighita vaiŋ tau pale ivot. I itartar pa gabua naol le isov, ra imbaaŋ besooŋa tooni siriv tila pa yauŋ yes tau poiŋ tooni igham zi na. Eemon tila le zeran tawe lolozi pa tila mako.
4 “Tauvene kinik imbaaŋ besooŋa tooni siriv muul tila, ve isaav pazi ighe: ‘Zeran tau yau nasain zi na, yam ala ve asavia aliŋag pazi tauvene: Yau natartar pa aniiŋ to ghanghaniiŋ isov wa. Ve narav makau toman tumbuŋazi siriv paam. Tauvene nagharaat gabua naol isov, ve nasaŋan zi mon. Rekia tilam pa ghanghaniiŋ to vaiŋ tane.’ [Tauvene yes besooŋa tana tila, ve tipaesia kinik aliiŋa pa zeran tawe.] 5 Eemon yes matazi veleghin poiŋ to kinik imin kaut sorok, ve tiburig tiparghaughau pa uraat toz toz. Ee ila igham uraat pa uum tooni, ite ila pa uraat tooni to raukoliiŋ, 6 ve siriv tikis yes besooŋa to kinik, ve tipamayaŋin zi, ve tirav zi timatmaat.
7 “Ŋgar tau tighamu na, ipas kinik aate, le aate yavyav kat. Tauvene imbaaŋ zaaba tooni tila, ve tiravuur yes tau tirav besooŋa tooni na, le tisov timataar, ve titun nugh toozi paam. 8 Murei ra, i ipoi besooŋa tooni siriv tilam, ve isaav pazi ighe: ‘Wais, aniiŋ to natug vaiŋ tooni, natartar pani wa. Eemon zeran tau nasain zi na, yes popoiazi irau to tilam pa ghanghaniiŋ tane ne mako. [a]
10 “Tauvene yes besooŋa tana tila tirau eez ta naol ne, ve tiyauur tamtamon tisov tau tindeeŋ zi na tilam, le ruum to vaiŋ tana loolo ivon kat. Tigham zeran popoiazi, ve yes sasaghatizi paam.
11 “Ra kinik iloŋ ila ruum to vaiŋ, ighe ighita yes tau tilam pa ghanghaniiŋ na. Maata ila le ighita ŋeer ee ilepleep. I ighur nonoghiiŋa poia to vaiŋ mako, ve ilam sorok. [b]
14 Ra Yesu iparwai saveeŋ tooni ighe: “Poiŋ to Maaron, ene ila pa eval tiina. Eemon tamtamon eŋaeŋa, ta i igham zi timin i tauu le.”
15 Murei ra, zeran tutuuŋa siriv tila tilup zi ve tiil eez pa Yesu. Yes tighe titombaana pa savsaveeŋ, ve ighe isik aliiŋa eta isosor, mako imin puughu pani to tipayooze pa savsaveeŋ. 16 Tauvene timbaaŋ ziŋerazi siriv tomania Erod ziŋeera siriv tila to Yesu, ve tigham saveeŋ ŋgoreeŋ pani tighe: “Mos puughu, yei niwatagh: Yo ŋeer to saveeŋ onoon mon. Isaav ighe upaghazoŋai tamtamon pa eez to Maaron, na saveeŋ tsio isov ene onoon mon. Ve isaav ighe tamtamon ezazi tintiina, ma lezi ezazi mako, na yo ugham ŋgar pa gabua tauvene mako. Usasavia ŋgar raraate mon pa tamtamon tisov, ve usavsaav ghazooŋ ila matazi. 17 Tauvene usaav ghazooŋ payei. Ugham ŋgar mindai? Isaav ighe iit Yuda tasik takes ila pa kinik tiina to Rom, pale iduduuŋ pa tutuuŋ toit, ma mako?”
18 Eemon Yesu iwatagh ŋgar toozi saghati wa. Tauvene isaav pazi ighe: “Yam zeran to karom. Apapamir taumim sorok pa ghuruuŋ ila tsiam! Puughu mindai ta aghe atoov ghau? 19 Maet tau tasiksiki pa takes na, atotoi eta ve naghita.” Tauvene tigham maet denari ee ila tooni, 20 ve ighason zi ighe: “Laak, sei anunu ve eeza tane?”
21 Yes tiyol ghasoniiŋ tooni tighe: “Ena kinik tiina to Rom.”
22 Yes tilooŋ saveeŋ tooni tane le tirur pani. Tauvene tipul Yesu, ve tighau.
23 Yes Sadusi tisavsaav tighe yes mateegha irau tiburig mako. Saawe eemon tana, Sadusi siriv tila to Yesu, [g]
29 Yesu iyol aliŋazi ighe: “Oyai, yam tane awatagh Maaron tapiri ve saveeŋ tooni rigta mako. Tauta ŋgar tsiam ikau. 30 Saawe to Mboŋ Murei, ve Maaron ighe ipaburigin yes mateegha, ene tamtamon irau tivai muul mako. Lepoghazi pale imin yes aŋela tau tileep izi nugh sambam.
31-32 Aiyo, yau naghe naghason gham pa burigiiŋ to yes mateegha. Mindai, Maaron aliiŋa ziiri ee isaav payam ighe:
33 Eval tiina tilooŋ saveeŋ tooni tane le tirur pani, ve ŋgar toozi imbool.
34 Zeran tutuuŋa tilooŋ tighe Yesu igham yes Sadusi tilil pa savsaveeŋ, tauvene tilup zi ve tila to Yesu, 35 ve tamtamon toozi ee tau le ŋgar tiina pa tutuuŋ na, aana itoov ghasoniiŋ Yesu ighe: 36 “Mos puughu, tutuuŋ sindei ta tiina kat iliiv tutuuŋ tisov?”
37 Yesu iyol ghasoniiŋ tooni ighe:
38 “Tutuuŋ tane ta tiina kat iliiv tutuuŋ tisov. 39 Ve tutuuŋ tiina ite tau imin ru pani, ene ŋgara igharau rig.
41 Zeran tutuuŋa tana tilup zi gha tilepleep, ve Yesu aana ighason zi ighe: 42 “Laak, yam agham ŋgar mindai pa Mesia? Pale ivot ila siŋ to sei?”
43 Tauvene Yesu ighason zi muul: “Ighe tauvene, puughu mindai ta Maaron Avuvu ipaburigin David, ve i iwaat Mesia ighe ‘Tiina tooni’? [p]
45 “Isaav ighe David tauu iwaat Mesia ighe ‘tiina tooni’, pale Mesia ivot ila siŋ to David mindai?” [r]
46 Yes tilooŋ saveeŋ tooni tane le tineneeŋ. Ŋeer eta irau iyol Yesu saveeŋ tooni mako. Tauvene saawe tana ve ila, tamtamon eta ighasoni pa saveeŋ eta muul mako. Pasaa, tiroi pani.
<- Matayu 21Matayu 23 ->- a Mbaŋ 13:46
- b Syg 3:4, 19:8
- c Yes ŋgara siriv tigham ŋgar tighe yes Yuda gabuazi tauvene: Isaav ighe tigham ghanghaniiŋ to vaiŋ, saawe siriv ghanghaniiŋ taama ireirei nonoghiiŋa popoiaizi pa yes tau i ipoi zi tilam na.
- d Mt 8:12
- e Yesu saveeŋ tooni, puughu tauvene. Maet denari, ene kinik to Rom anunu igheen ila. Tauvene isaav ighe yes Yuda tisik maet tawe ila pani, ene iduduuŋ. Eemon iit tamtamon tagham Maaron naagho. Tauvene iit aat taghur tauun tamin Maaron le.
- f Gnp 1:27; Ro 13:7
- g Mbaŋ 23:8
- h Lo 25:5
- i Igham 3:6
- j Yesu saveeŋ tooni, puughu tauvene: Abaram, Isak, ve Yakop timaat, ve ndaman 400 ma vene ilam ila, ra Maaron isavia saveeŋ tane pa Mose. Tauvene yes timaat alok wa. Eemon Maaron isavi zi imin yes tileep matazi yaryaare.
- k Mbaŋ 7:32; Hib 11:16
- l Lo 6:5
- m Wkp 19:18; Mt 19:19
- n Mt 7:12; Ro 13:10; Ga 5:14
- o Yo 7:42
- p Mbaŋ 2:30+
- q Mbo 110:1; 1Kor 15:25; Hib 1:13
- r Saveeŋ to Yesu tane, puughu tauvene: Isaav ighe Mesia ivot ila siŋ to David itaghon eez tau iit tamtamon to taan tavotvot pani, ene aat David irau iwaato ighe ‘Tiina tooni’ ne mako. Pasaa, David ivot imin maata. Eemon Mesia ivot itaghon eez tana mako. I Maaron tauu Naatu tau ileep sambam ve izilam. Puughu tane ta David iwaato ighe ‘Tiina tooni’.