1 Yam toŋvetaz, you nagham ŋgar tiina kat pa yes Israela naghaze le Maaron igham mulin di, ghoro poia. Tauto sawa isob, suŋuuŋ tiou iŋaŋarua Maaron padi. Ro 9:3
2 You nawatag katin di, tovenen you irau nasavia gabuadi. Onoon, ŋgar todi iyaryaaŋ kat tighaze le titaghon katin ataam to Maaron. Eemoghon tighazooŋ kat pa Maaron lolo ve ŋgar toni maau. Tauto tiyel pa ataam toni. Mbaŋ 21:20
3 Pasa, ataam to Maaron igham ghiit taneep deŋiaad ila mata, nene tighilaala sone. Tauto tizurun ataam toni tonowen, ve tiyoon ila ataam to taghoniiŋ tutuuŋ tighaze ŋgar tonowen pale igham di tineep deŋiadi ila Maaron mata. Ro 9:31+; Pil 3:9
4 Eemoghon Krisi igham tutuuŋ to Mose anoŋa ivot wa. Tauto ataam to taghoniiŋ tutuuŋ inim imuul izi toni. Pasa, tamtoghon tisob to tighur ila toni, ye igham di tineep deŋiadi ila Maaron mata. Mt 5:17; 2Kor 3:6; Ga 3:24+; Hib 8:13
Ataam to taghur ila, leso taneep deŋiaad ila Maaron mata
5 Ataam to taghoniiŋ tutuuŋ leso taneep deŋiaad ila Maaron mata, nene ipataŋan. Muuŋ, Mose imbood saveeŋa ighaze: “Tamtoghon to ighaze itaghon katin tutuuŋ, nene pale ineep pooi.” Wkp 18:5; Lu 10:27+; Ga 3:12
6 Ve ataam to taghur ila, leso taneep deŋiaad ila Maaron mata, nene rauraua. Pasa, isaav pait tovene: “Usaav ila lolom ughaze: ‘Sei irau iza ila sambam?’ Vene malep. Pasa, Maaron imbaaŋ Krisi izi inim taan wa. Ughaze ughami imuul izi inim pasa? 7 Ve usaav ughaze: ‘Sei irau izila ndug to mateeŋa?’ Vene paam malep. Pasa, Maaron ipamundigin Krisi pa mateeŋ wa. Yom ughaze upamundigini muul pasa?” 8 Saveeŋ tonene, ŋgara tovene:
“Maaron saveeŋ toni ineep mala pait maau. Pasa, ineep ila avood ve lolood wa.” Lo 30:11-14
Laak, sa saveeŋ? Nene saveeŋ to yei nivovotia pa ataam to ghurla. 9 Saveeŋ tonowen isaav pait tovene: Ighaze taum avom uvotia ghurla tiom ila ival tiina matadi ughaze: “Yesu, ye Tiina tiou,” ve ighaze lolom ighur ila ughaze Maaron ipamundigini pa mateeŋ wa, nene pale Maaron igham mulin ghom, ve uneep pooi. Yo 3:15; Mbaŋ 16:31
10 Pasa, ighaze lolood ighur ila, nene pale Krisi igham ghiit taneep deŋiaad ila Maaron mata. Ve ighaze tauud avood tavotia ghurla toit ila ival tiina matadi, nene pale Maaron igham mulin ghiit ve taneep pooi.
11 Pasa, Maaron aliŋa to timbooda, isaav tovene:
“Tamtoghon tisob to tighur ila toni, nene pale tighita anoŋa to ghurla todi ve Maaron igham mulin di. Eta irau ighur mata pani sorok ve maya ne maau.” Is 28:16; Ro 9:33
12 Saveeŋ tonene iŋarua tamtoghon tisob. Yes Yuda, ve yes to Yuda maau ne paam. Pasa, Maaron ee moghon inepneep. Ye Tiina to iit tasob. Ve ye ighurghur poia toni tiina izaza to tamtoghon tisob to tighasoni pa ulaaŋ. Mbaŋ 10:34+; Ro 3:22,29; Ga 3:28
13 Pasa, Maaron aliŋa isaav ighaze:
“Tamtoghon tisob to tighason Maaron pa ulaaŋ, ye pale igham mulin di ve tineep pooi.” Yoel 2:32; Mbaŋ 2:21
Yes Israela ledi pughu eta pa tizurun Krisi maau
14 Eemoghon ighaze tamtoghon tighur ila to Maaron maau, nene pale tighasoni pa ulaaŋ vena? Ve ighaze tilooŋ varu maau, pale tighur ila toni vena? Ve ighaze ledi tamtoghon eta pa ivotia mos padi maau, pale tilooŋ Maaron varu vena? Mbaŋ 8:30+
15 Ve ighaze timbaaŋ yes uraata tila maau, pale tivotia mos pa tamtoghon vena? Pasa, Maaron aliŋa to timbooda, isaav tovene:
“Tamtoghon tighita yes to tilaghov varu poia inim, le igham di lolodi poia.” Is 52:7; Ep 6:15
16 Eemoghon yes Israela tisob titaghon saveeŋ to varu poia maau. Eŋaeŋa moghon. Isaia isavia saveeŋa muuŋ wa. Ighaze:
“Tiina, sei ighur ila saveeŋ to yei nivotia padi?” Is 53:1; Yo 12:38; Hib 4:2
17 Tovenen Maaron aliŋa to taloŋlooŋa, tauto ipamundigin ghiit pa taghur ila. Ve sawa to tivotia Krisi varu, tamtoghon tilooŋ saveeŋ toni.
18 Ighaze venen, pale tasaav vena pa yes Israela? Tilooŋ varu poia sone? Maau. Yes tilooŋa wa. Pasa, Maaron aliŋa isaav tovene:
“Aliŋadi ila irau taan, ve saveeŋ todi ilaan irau ndug tisob.” Mbo 19:4
19 Ma vena? Yes Israela tilooŋ saveeŋ tonowen, ve tikankaan pa pughu? Maau. Yes irau tighazooŋ pani. Aghita. Muuŋ, Mose isaav ighaze:
“Yes ndug ndug to ledi izadi maau ve ledi ŋgar maau, you pale nagham di tinim leg ve naghur poia tiou iza todi.
Ve yam pale aghita ŋgar to nagham padi, ve igham gham atemim yabyab, ve aghaze le mbeb tovene ivot payam paam, ghoro poia.” Lo 32:21; Ro 11:11,14
20 Ve propet Isaia isaav ghazooŋa kat ighaze:
“Tamtoghon to tizuaria di payou maau, yes tauto tindeeŋ ghou.
Ve yes to tighason payou maau, tauto napatooŋ taug padi.” Is 65:1; Ro 9:30
21 Eemoghon yes Israela, Isaia isavia saveeŋ iŋarua di ighaze:
“Yam to taliŋamim saambu maau ve azorzoor aliŋag, sawa isob you nakaak nimag ve nasasaŋan gham pa amuul anim tiou. Eemoghon anim maau.” Is 65:2 <- Rom 9Rom 11 ->
