57
Maaron, upatooŋ tapirim ve poia tiom ivot ighazooŋ
Mbouŋ to David
Mbouŋ tonene iŋarua sawa to David ighau pa Saul, ve iyooŋ ila yaam saambu. Paesiiŋ ila pa ŋgeu to imuuŋ pa mbouŋ tovene: Mbouŋ tonene aliŋa, nene: ‘Urewa malep.’
1 O Maaron, you mbesooŋa tiom. Lolom isamin ghou, ve uul ghou lak!
You naŋarua ghom naghaze nayooŋ ilat tiom.
Upoon ghou inimale tatareek ipakud ndinatu ila bage samba, le irau pataŋani tonene isob.
Pasa aazne, nepooŋ tiou, nene inimale naneep ila uman ve yaghur tiina lolo.
2 You nataŋ roran Maaron Tiina To Ilib Pa Ndimaronŋa Tisob, naghaze iuul ghou.
Pasa, ŋgar toni ighurghur anoŋa. Sa ŋgar to ye ighaze ivot payou, nene pale ivot.
3 Pale ineep izi sambam, ve igham ulaaŋ payou, ve igham mulin ghou.
Pale iyoon payou, ve itatan koiagŋa to tinanaan ghou ne.
Pasa, lolo ineep tuŋia ila to tamtoghon toni ve iuluul di. Ve sawa isob, ye itataghon saveeŋ mbuaaŋ toni.
4 Koiagŋa tiluvut ghou wa.
Yes tinimale laion to luadi isami pa ghaniiŋ tamtoghon.
Livodi mata kat inimale pane ndinatu ve iiz.
Ve yamadi paam, mata kat inimale buza to malmal.
5 Maaron, ugham mbeb eta ivot ila sambam samba inim ghilalooŋ pa tamtoghon. Leso tighita ve tighilaal ghom tighaze izam tiina kat.
Ve upatooŋ tapirim ve poia tiom le irau taan isob paam!
6 Pataŋani tonene itatan ghou kat.
Pasa, koiagŋa tiraar malum payou tighaze tisavag ghou.
Ve titai saambu ila ataam tiou, leso natap nazila. Eemoghon maau. Taudi titap tizila.
7 Maaron, lolog ru payom maau.
Lolog ineep tuŋia ilat tiom.
Tovenen you pale nambou, ve narab gita pa napait ghom.
8 Lolog ighur naghaze ndugitun, ghoro namundig ve nagharaat taug,
ve napambar ambam tiou, ve narab gita ila ila le ndag pusukia iza.
9 Tiina tiou, you pale napait ghom pa poia tiom ila tamtoghon to ndug ndug matadi.
Pale yeiŋa tamtoghon to ndug tisob nilup ghei pa suŋuuŋ, ve nait mbouŋ pa napait ghom.
10 O Yoova, lolom ineep tuŋia ila to tamtoghon tiom ve uluul di.
Ŋgar tiom tonanan, nene tiina le tiina kat. Izala izala le ikis sambam.
Ve ŋgar to taghoniiŋ saveeŋ mbuaaŋ tiom tovene paam. Izala le ikis tata. Mbo 36:5
11 Maaron, ugham mbeb eta ivot ila sambam paroŋania inim ghilalooŋ pa tamtoghon. Leso tighita, ve tipait izam izala le izala kat.
Ve upatooŋ tapirim ve poia tiom irau taan isob!
<- Mbouŋ to Yes Israela 56Mbouŋ to Yes Israela 58 ->