54
Tamtoghon eez ighason Maaron pa itatan koia
Mbouŋ to David
Mbouŋ tonene iŋarua sawa to tamtoghon to ndug Zip tila to Saul, ve tipaes pani tighaze David iyoŋyooŋ ila lolodi. Ŋgeu to imuuŋ pa mbouŋ, irau isaav pa tamtoghon pa tirab gita ve timbou mbouŋ tonene
1 O Maaron, yom izam tiina pa tapirim ve poia tiom. Uvool tiou ve upas ghou navot pa pataŋani tiou tonene!
Upatooŋ tapirim pa koiagŋa, ve ugham mulin ghou ila nimadi. Leso upaghazoŋan ghou ila tamtoghon matadi ughaze you nagham sosor eta maau.
2 Maaron, ughur taliŋam pa suŋuuŋ tiou.
Ulooŋ aliŋag tonene ve uul ghou.
3 Pasa, ndiran samsamia to ndug mala tinim tipamundigin malmal payou.
Yes to tizuaria di tighaze tirab ghou namaat, tamtoghon timatughez padi. Pasa, lolodi isamin tamtoghon rita maau.
Yes tipapait taudi, ve matadi iŋgal Maaron rita maau.
4 Eemoghon Maaron, ye Ulaaŋa tiou.
You naneep ila Tiina tiou nima, tauto aazne naneep matag iyaryaar.
5 Ŋgar samia to koiagŋa tigham payou ne, upamuula imuul ila pa taudi.
Upasob di le tisob kat itaghon saveeŋ mbuaaŋ tiom.
6 Yoova, yom poiam kat!
Tovenen lolog poia payom, ve naghaze nagham watooŋrau pa napait izam.
7 Pasa, yom uul ghou, ve upas ghou navot pa pataŋani tiou tisob.
Yom utatan koiagŋa ila matag, ve nalib padi wa.
<- Mbouŋ to Yes Israela 53Mbouŋ to Yes Israela 55 ->