101
Kinik imbua saveeŋ toman Maaron
Mbouŋ to David
1 O Yoova, you nambou mbouŋ tonene pa napait ghom.
Pasa, yom utaghon ŋgar deŋia moghon. Ve lolom ineep tuŋia ila to tamtoghon tiom, ve uluul di itaghon saveeŋ mbuaaŋ tiom.
2 You naghaze le naneep deŋia moghon ila matam.
Tovenen you pale nataghon ŋgar deŋia moghon ila ruum tiou,
ve nagham pooz pa tamtoghon tiou itaghon ŋgar deŋia.
Ve ŋeez o unum uul ghou?
3 You irau nayok pa mbeb samia eta ineep ila matag maau.
Ve yes to tiyel pa ataam tiom, you naghur koi padi, ve nandiir di tighaughau. Irau tilup toman ghou maau.
4 You pale naneep saguan pa ŋgar kaarom. Ŋgar tovene, eta irau ineep tiou maau.
Ve ŋgar samia tovene paam, irau matag ila pani maau.
5 Yes to tiŋgal saveeŋ pa nditadi inim ŋgozaaŋ, you pale nawaghamun di, leso napoon avodi.
Ve yes to tipakur taudi tighaze izadi tintina, ve tiveleg nditadi ve titatan di, nene irau napul di tineep maau.
6 Eemoghon taan tonene tamtoghona to avodi onoon ve titaghon ataam tiom, you nakalkaal di naghaze tinim tineep toman ghou.
Ve yes to laghooŋ todi deŋia moghon, you naghaze nagham di tinim mbesooŋa tiou, leso tiuul ghou pa uraat.
7 Eemoghon ndiran kaaromŋa irau tineep toman ghou ila ruum tiou ne maau.
Ighaze ŋgeu eta avo kaarom, nene irau iyoon ila matag maau.
8 Mboŋmaagh to naol ne, you pale nawaghamun tamtoghon samsamiadi tisob to tineep izi taan tonene.
Yes to tighamgham ŋgar samia, you pale nandiir di tighau pa Yoova ndug toni. Ro 13:4
<- Mbouŋ to Yes Israela 100Mbouŋ to Yes Israela 102 ->