2
Iit irau tatatan tauud izaad, talup lolood inim ee moghon, ve lolood pa nditaad
1 Yam aneep tuŋia ila to Krisi, ve ye ipapalot gham. Ve ŋgar toni to lolo payam kat, tauto irabrab atemim. Maaron Avuvu ilup gham anim ee moghon. Ve Maaron ŋgar toni to lolo isamin ghiit ve iuluul ghiit, nene ipamundigin gham ve ataghon ŋgar raraate. 2 Ighaze venen, yam irau alup lolomim toman ŋgar tiam inim ee moghon, ve lolomim pa nditamim ve agham poian di, inimale Krisi lolo payam ve igham poian gham. Ve azuaria gham, leso asob ataghon ŋgar ee moghon. Ighaze agham tovene, nene pale agham ghou lolog poia le poia kat. Ro 15:5; 1Pe 3:8
3 Agham ŋgar pa taumim moghon malep. Ve agham ŋgar eta pa apait taumim izamim malep. Paitooŋ to tamtoghon, nene mbeb sorok. Yam irau atatan izamim, ve agham ŋgar tiina pa nditamim, ghoro poia. Ro 12:10+; Ga 5:26; 1Pe 5:5
4 Tovenen matamim iŋgal taumim moghon malep. Matamim iŋgal nditamim paam. Ro 15:2; 1Kor 10:24, 13:5
Krisi ipatooŋ ghiit pa ŋgar to tatatan izaad
6 Aghita. Ye Maaron tau. Yesuru Maaron raratedi.
Ŋgar ve tapiri isob to ineep to Maaron, nene ineep to Krisi paam. Eemoghon ye lolo pa ikis ŋgar ve tapiri tonowen maau. Yo 1:1+; Kol 1:15; Hib 1:3
7 Iza tiina toman tapiri, ŋguruba, ve nepooŋ toni to ndug sambam, ye ipul di tizi tineep, ve iyok ighaze inim mbesooŋa sorok.
8 Tovenen tamtoghon tighita tighaze ye tamtoghon inimale iit.
Ve ye itatan tau, ve mata loŋloŋaiŋa pa Maaron ila ila le imaat.
Ve mateeŋ toni, poia maau.
9 Pughu tonene to Maaron ighami izala le izala kat ilib pa mbeb tisob, ve igham tau iza pani.
10-11 Pasa, Maaron ighaze tamtoghon tisob tiput aghedi pa Yesu, ve tipait iza, ve tisaav ghazooŋa tighaze: “Yesu Krisi, ye Tiina.”
Yes to tineep izi sambam, yes to tineep izi taan, ve yes mateeŋa to tineep ila taan lolo ne paam.
Tama Maaron itaghon ataam tovene, leso tamtoghon tisob tipait iza pa tapiri ve poia toni. Yo 5:23; Mbaŋ 2:36; Syg 5:13
Iit tapatooŋ ghazooŋa to Maaron pa tamtoghon
12 Yam ndiran tiou, lolog payam kat. Muuŋ ve inim, sawa to itiŋa tanepneep, yam matamim loŋloŋaiŋa, ve ataghon Krisi ŋgar toni. Eemoghon aazne, you naneep toman gham maau. Tovenen you nasaav payam: Azuaria gham le ataghon katin Krisi ŋgar toni. Onoon, Maaron igham mulin gham ila uraat to Krisi wa. Eemoghon yam irau amatughez ve aroron pani, ve azuaria gham pa taghoniiŋ ŋgar to Krisi, le aghita anoŋa toni ivot. Mbo 2:11; 1Pe 1:17
13 Pasa, Maaron ighamgham uraat tiina ila lolomim, ve ipapalot gham. Tauto lolomim aghaze le ataghon ŋgar to igham Maaron lolo poia, ve tapirimim irau to ataghon ŋgar tovene. Yo 15:5; 2Kor 3:5; Hib 13:21
14 Sa ŋgar to ighaze aghami, aghami toman lolomim poia. Ayasiil ve awazoran gham pani malep. 15-16 Leso lemim sosor eta sob, ve ŋgar tiam isob iŋgalaaŋ ve deŋia moghon ila Maaron mata, ve aneep animale ye ndinatu. Ival tiina to taan to aneep ila lolodi, laghooŋ todi deŋia maau, ve titaghon ŋgar samsamia. Eemoghon yam akis saveeŋ mata yaryaara, ve azuzuuna ila todi, tauto apatooŋ ghazooŋa to Krisi padi animale pitum to tiraŋ pa mboŋ. Ighaze yam ataghon ŋgar naol tonene, sawa to Krisi imuul inim, you pale lolog poia, ve napakur ghou payam. Pasa, gabuamim pale ipatooŋ ghou ighaze you napul tapirig payam sorok maau. You nagham katin uraat tiou ve anoŋa ivot. Mt 5:14+; Ep 5:1,8; 1Tes 2:19+
17 Ghurla tiam ipamundigin gham, tauto arei taumim pa Maaron ve ambesmbees pani toman tinimim iza. Ŋgar tiam tonanan, nene inimale watooŋrau poia eez to yam aghuri ila toni, ve igham ghou lolog poia toman gham. Onoon, aazne nambaad pataŋani ve nakankaan: Pale siŋ tiou imaliŋ ve namaat ma venen. Ighaze ŋgar tovene ivot, nene pale inimale vaen to tiliŋi izala watooŋrau tiam pogho. Mbaŋ 21:13; 2Tim 4:6
Paulus ighaze imbaaŋ Timoti ila iŋgig yes Pilipai
19 You naghur matag pa Tiina toit Yesu naghaze mala maau pale igharaat ataam eta, leso nambaaŋ Timoti ilat iŋgig gham ve ipalot gham. Ve sawa to ighaze ye imuul inim ve isavia varumim, nene pale igham ghou lolog poia, ve ipalot ghou paam. 20 You leg ŋgeu ite paam inimale Timoti maau. Yeru ŋgar tiei ee moghon. Pasa, sawa isob, ye ighamgham ŋgar tiina payam, ve ikalkaal ataam pa iuul gham. 21 Tamtoghon katindi matadi iŋgalŋgal taudi moghon. Ve mbeb to Yesu Krisi ighita di ighaze tintina ila mata, nene yes tigham ŋgar padi maau. 2Tim 4:10,16
22 Eemoghon Timoti, yam awatagi wa. Ye ŋgeu poia eez. You naghita ŋgar ve uraat toni, ye iraua. Ye itaghon ghou inimale taug natug, ve yeru nimbesmbees pa uraat to varu poia. 1Kor 4:17; 1Tim 1:2
23 Tovenen you pale naneep ve naghita: Pale tighur sa ataam payou. Ghoro rikia moghon nambaaŋa ilat tiam. 24 Ve you naghur ila ariaŋa naghaze mala maau pale Tiina toit Krisi igharaat ataam payou, leso taug nalat naghita gham paam.
Paulus ipait Epaproditus iza. Pasa, ye irei tau pa uraat to Krisi
25 Toŋvetaz toit Epaproditus to yam ambaaŋa inim pa iuul ghou pa mbolaaŋ tiou, ye inim peria wa. Ye mbesooŋa poia eez to Maaron, ve igham ghou lolog poia kat. Yeru niluplup ghei pa uraat, ve yeru ndaaba to Krisi to niparab ariaŋa pa saveeŋ toni. Eemoghon matag iŋgal naghaze you pale nambaaŋa imuul ilat tiam. 26 Pasa, ye ikausim pa yam asob ighaze le imuul ilat ighita gham. Ye igham ŋgar tiina payam pasa, iwatag ighaze yam alooŋ varu pa moroghooŋ toni wa. 27 Ve varu to yam alooŋa, nene onoon. Moroghooŋ tiina kat ighami, ve rismoghon tone imaat. Eemoghon Maaron lolo isamini ve iuuli, tauto tini poia muul. Ve ye eŋgeni maau. You paam, Maaron lolo isamin ghou ve iuul ghou. Pasa, inimale Epaproditus imaat, tone igham pataŋani ite paam iza tiou. 28 Tovenen you naghaze nambaaŋa rikia moghon imuul ilat. Leso yam aghita, ve lolomim poia muul. Ve ighaze lolomim poia, nene pale igham ghou ateg izi paam. 29 Tovenen ighaze ye imuul ilat peria, yam aghami toman lolomim poia. Pasa yamŋa, tamtoghon to Krisi. Ndiran tovene, yam irau atandag padi ve apait di. 1Tes 5:12+; 1Tim 5:17
30 Aghita. Ye rismoghon tone imaat pa uraat to Krisi. Pasa, ye iwatag: Yam aneep mala payou, ve taumim irau auul ghou maau. Tauto irei tau, ve izuaria tau le inim peria tiou, leso iuul ghou to sualen. Tovenen ulaaŋ to yam irau agham payou maau, nene ye igham payou.
<- Pilipai 1Pilipai 3 ->