2 Ve ŋgai naol naol to popoiadi pa watooŋrau, ugham nditamoot liim ve ru ve paŋgaar liim ve ru, tilooŋ tila waaŋ lolo. Ve mbeb pida to popoiadi pa watooŋrau maau, ugham ruŋaruŋa, tamoot eez ve liva eez. 3 Ve ugham man naol naol to tirovroov ila tata paroŋania paam. Ugham nditamoot liim ve ru, ve paŋgaar liim ve ru. Leso timaat sob, ve muri tipoop, ve timasa tinim naol, ve tirau taan muul. 4 Pasa, mboŋ liim ve ru tonene isob, ghoro nagham uman tiina izi taan le irau mboŋ tamoot ru. Leso napasob mbeb matadi yaryaara to naghur di le tisob pa taan.”

5 Yoova isavia saveeŋ tonene le isob, ghoro Noa ila igham uraata. Saveeŋ to Maaron isavia pani, ye itaghoni le isob.

6 Noa ndaman toni irau 600, ghoro ya ivon izi taan toman yawaaŋa tiina. 7 Tovenen Noa yesuru azuwa, ndinatu, ve ndirawa liva tisob tilooŋ tila waaŋ lolo. Leso yawaaŋa iwaghamun di sob, ve tineep pooi. 8-9 Ve ŋgai naol naol to popoiadi pa watooŋrau, toman mbeb naol to irau tigham watooŋrau padi maau ne, ve man to tirovroov, toman mbeb naol to tindandarab ila taan, nene ruŋaruŋa, tamoot ve paŋgaar, tila tivot to Noa, ve yesŋa Noa tilooŋ tila waaŋ lolo itaghon saveeŋ to Maaron isavia pani. 10 Tilooŋ tila waaŋ lolo, ve tineep mboŋ liim ve ru le isob, ghoro ya ivon toman yawaaŋa tiina, le itatab taan isob.

11 Tovenen indeeŋ Noa ndaman toni irau 600, kaiyo inim ru pani, ve mboŋ inim saaŋgul liim ve ru pani, ghoro taan avo ikaak, ve ya tiina to ineep taan lolo, bokia iza toman tapiri tiina. Ve tata tovene paam. Avo ikaak, ve ya to ineep sala, imaliŋ izi toman tapiri tiina. 12 Tovenen uman tiina kat izi taan le irau ndag tamoot ru ve mboŋ tamoot ru. 13 Sawa kat tonenen, Noa yesuru azuwa, ve ndinatu tol, Sem, Ham ve Yapet, toman ndizwadi, tilooŋ tila waaŋ lolo. 14 Ve ŋgai naol naol to paanu ve su, toman mbeb naol naol to tindandarab ila taan, ve man naol naol titaghon di ve yesŋa tilooŋ tila waaŋ lolo. 15-16 Tovenen mbeb tisob to matadi iyaryaar, ruŋaruŋa, nditamoot ve paŋgaar, tilooŋ tila waaŋ lolo, titaghon Maaron aliŋa. Ghoro Noa ana ilooŋ ila, ve Yoova tau ipoon ataam to waaŋ.

17 Ya ivon iza, le itatab taan irau mboŋ tamoot ru, ve ipapotin waaŋ ve iza ipot. 18 Ya iza iza le waaŋ imoghan. 19 Ya iza le ivon toman tapiri tiina kat, le itatab lolooz tintina tisob. 20 Ya ivon izala le ilib pa lolooz to naol ne dabadi irau roov paaŋ (8 mita). 21 Tovenen mbeb to tinepneep izi taan, tisob timatmaat. Ŋgai to paanu, ŋgai to su, man, ve mbeb naol to tindandarab ila taan, toman tamtoghon paam timatmaat le tisob. 22 Mbeb to tineep izi taan ve tighamgham yaghur, tauto tisob tilaledi. 23 Nene ataam to Maaron ipasob mbeb tisob pa taan. Tamtoghon, ŋgai, mbeb to tindandarab ila taan, ve man to tirovroov ila tata paroŋania, eta ineep muul maau. Tisob tilaledi. Eemoghon yes to tineep toman Noa ila waaŋ lolo, yes moghon to tineep pooi. Hib 11:7; 2Pe 2:5, 3:6

24 Tovenen ya itatab taan, ve ipot irau mboŋ 150 (kaiyo liim ma venen).

<- Mbeb Naol Tisob Pughudi 6Mbeb Naol Tisob Pughudi 8 ->