Mbeb Naol Tisob Pughudi 48

Yakop ighur poia to Maaron iza to Manase yesuru Epraim

1 Tinepneep ila, ve tipaes pa Yosep tighaze: “Tamam imorooŋ.” Tovenen Yosep igham ndinatu ru, Manase yesuru Epraim, ve yesŋa tila tighaze tighita tama Yakop. 2 Tila peria, ve tamtoghon pida tipaes pa Yakop tighaze: “Olman, natum Yosep inim wa.”

Olman Yakop ilooŋ saveeŋ tonene, ve ipariaaŋ tau, imundig mbole izi ina to ghenooŋ, 3-4 ve isaav pa Yosep ighaze: “Ulooŋ. Maaron Ariaŋa To Ilib pa Ndimaronŋa Tisob Ne, ivot tiou izi ndug Lus to ineep ila taan to Kanaan, ve ighur poia toni iza tiou, ve isaav payou ighaze: ‘You pale nagham papaghu tiom timasa tinim ival, ve rumai katindi tivot ilat tiom. Ve you pale nagham taan tonene inim ledi. Leso tineep pani itaghoni taghoni gha ila.’ ” Mbnp 28:13-14

5 Yakop iseeŋ saveeŋ toni ighaze: “Ndinatum ru, Manase ve Epraim, you nanim taan to Isip sone, ve yamru azuwam apoop di izi sualen. You naghaze nagham di tinim leg ve tiyoon pa mbeb tiou raraate inimale Ruben ve Simeon to taug ndinatug kat. 6 Ve ighaze apoop muul, nene pale tinim yom taum lem, ve tineep ila nditoghadi ru Epraim ve Manase sambadi, ve tigham mbeb ila todi. 7 Sawa to napul taan to Mesopotamia, ve namuul nanim Kanaan le nagharau ndug Eprata, tinam Rael imaat izi ataam luvuŋa, ve natavia tonowe.” (Ndug Eprata, iza ite Betelem.) Mbnp 35:16-19

8 Yakop isavia saveeŋ tonene le isob, ghoro mata ila le ikus Yosep ndinatu ru. Tovenen ighasoni ighaze: “Sei masin tonanan?”

9-10 Yosep ipamuul aliŋa ighaze: “Nene ndinatug ru to Maaron igham di payou izi sualen.”

Yakop ighilaal di maau pasa, ye inim olman waat, ve mata irau ighita ndug muul maau. Ghoro Yakop isaav pa Yosep muul ighaze: “Ugham yesuru tinim tigharau ghou. Leso naghur poia to Maaron iza todi.”

Tovenen Yosep igham ndinatu ru tila tigharau timbudi Yakop, ve ye isavag di. 11 Ghoro isaav pa Yosep ighaze: “Muuŋ, naghaze pa naghita ghom muul maau. Eemoghon Maaron igham poian ghou, tauto aazne naghita ghom, ve naghita ndinatum paam.”

12 Ghoro Yosep igham ndinatu ru tila saguan ris pa tama, ve ana iput aghe pa tama, ve ighur nagho izila taan. 13 Igham tovene le isob, ghoro imundig iyoon, ve nima ŋas ikis natu aidaba Manase, ve ighuri ineep ila pa tama nima waan, ve nima waan ikis natu Epraim, ve ighuri ineep ila pa tama nima ŋas. 14 Eemoghon Yakop iparabolin nima, le nima waan izala ŋgeu muria daba, ve nima ŋas izala ŋgeu olman daba. 15 Ghoro ighur poia to Maaron iza to Yosep toman ndinatu ighaze:

“O Maaron, yom Maaron to timbug Abaram yesuru tamaŋ Isak. Nepooŋ toman laghooŋ todi, yesuru matadi iŋgalŋgal ghom ve titaghon ataam tiom.

Sawa to tinaŋ ipoop ghou, ve inim imuul aazne, yom uŋgin ghou, ve matam payou. Mbo 23:1; Yo 10:11

16 Ve uvot tiou inimale aŋela, ve ugham mulin ghou pa pataŋani tiou to naol ne.

Aazne, suŋuuŋ tiou iŋarua ghom naghaze ughur poia tiom iza to ndipain ru tonene.

Leso papaghu todi timasa tinim naol izi taan, ve yeru tamaŋ Isak ve timbug Abaram izamai iseeŋga itaghoni taghoni gha ila.”

17 Yosep ighita tama ighur nima waan izala natu muria Epraim daba, le irau lolo maau. Tovenen iit tama nima waan pa natu muria, ve ighaze ighuri ila natu olman Manase daba. 18 Ve isaav pa tama ighaze: “Tamaŋ, ugham vene malep. Nimam waan ila ŋgeu olman daba, ghoro poia.”

19 Eemoghon Yakop ilooŋ Yosep aliŋa maau. Isaav pani ighaze: “Natug, ŋgar to you naghami ne, nakankaan pani maau. You nawatagi. Natum Manase, papaghu toni pale timasa tinim naol, ve iza inim tiina paam. Eemoghon tazi iza pale ilib pani. Pasa, papaghu toni pale timasa tinim ival tiina kat, ve rumai katindi tivot ila toni.”

20 Tovenen sawa tonenen, Yakop ighur poia to Maaron iza to Yosep ndinatu ru, ve isaav padi ighaze: “Muri, ighaze yes Israela tighur poia to Maaron iza to tamtoghon, nene pale tiwaat izamim tighaze: ‘Maaron pale ighur poia toni iza tiam inimale igham pa Epraim yesuru Manase.’ ” Tovenen ye iit Epraim iza le ilib pa togha Manase. Hib 11:21

21 Yakop ighur poia to Maaron iza to yesuru le isob, ghoro isaav pa Yosep muul ighaze: “Ulooŋ. Sawa tiou to mateeŋ inim igharau wa. Eemoghon Maaron pale ineep toman gham. Ve muri, ye pale igham gham amuul ala pa taan to nditimbumim ve nditamamim. 22 Ve ulooŋ. Muuŋ, you nagham pane toman buza tiou, ve yeiŋa yes Amora niparab le nalib padi. Tauto nagham ndug mbuŋa Sekem inim leg. You naghaze nait izam ilib pa nditogham izadi. Tovenen aazne, you napul taan tonowen inim lem. Ve taan pida, pale napuli ila pa nditogham.”

<- Mbeb Naol Tisob Pughudi 47 Mbeb Naol Tisob Pughudi 49 ->