Mbeb Naol Tisob Pughudi 16

Agar ipoop Ismael

1 Abram azuwa Sarai, ye ipoop Abram le natu eta sone. Eemoghon ye le liva mbesooŋa eez to Isip, iza Agar. 2 Sawa eez, Sarai isaav pa Abram ighaze: “Ulooŋ. Yoova ipoon ghou, tauto napoop maau. Tovenen yom ula to liva mbesooŋa tiou Agar, ve yamru agheen. Ighaze ugham tovene, nene pale inim ataam pa nagham ndinatug tivot ila toni.” Abram ilooŋ Sarai aliŋa ve itaghoni.

3 Tovenen Sarai igham liva mbesooŋa toni to Isip tidi, ve ighuri ila to Abram inimale ye azuwa ite. Sawa tonenen, Abram ineep izi Kanaan irau ndaman saaŋgul wa. 4 Abram yesuru Agar tigheen le Agar apo.

Sawa to Agar iwatag ighaze ye apo, ipakur tau ve mata izi pa tiina toni Sarai. 5 Tovenen Sarai izi ve isuk saveeŋ pa Abram ighaze: “Pataŋani to aazne iza tiou ne, yom unum pughu pani! Onoon, you taug naghur liva mbesooŋa tiou ilat tiom. Eemoghon sawa to iwatag ighaze ye apo, mata izi payou kat. Maaron tau pale iŋgabiiz ghiit, ve ighur atia iŋarua sei to igham sosor!”

6 Abram ipamuul aliŋa ighaze: “Ughita. Liva mbesooŋa tiom tonowen, ye ineep ila taum nimam. Sa ŋgar to yom ughaze ugham pani, ghoro ughami.” Tovenen Sarai igham samin Agar, le Agar imundig ve ighau.

7 Agar ilaagh ila pa ndug balim le ivot izi ya eez, to bokbokia izaza igharau ataam to ila pa taan suruvu to Sur. Ye ila ivot tonowe, ve Mbaŋooŋa to Yoova *Mbaŋooŋa to Yoova igham Yoova nagho ve ivotvot to tamtoghon. Tok Pisin Baibol iwaata ighaze ‘ensel bilong Bikpela,’ ve English Baibol iwaata ighaze ‘Angel of the LORD.’ Saveeŋ to mbaŋooŋa tonowen, nene inimale Yoova tau isavsaav. Tovenen ŋgara pida matadi iŋgal tighaze mbaŋooŋa tonowen, nene Krisi.

ivot toni, ve ighasoni ighaze: 8 “Agar, liva mbesooŋa to Sarai, yom uneep sine to unum? Ve ughaze ula sine?”

Agar ipamuul aliŋa ighaze: “You naghau pa tiina tiou Sarai.”

9 Mbaŋooŋa to Yoova isaav pani ighaze: “Umuul ula to tiina tiom Sarai, ve uneep ila samba. 10 You pale nagham papaghu tiom timasa tinim naol. Irau tinin di maau.” 11 Ve Mbaŋooŋa to Yoova isaav pani muul ighaze:

“Yom apom. Ve pale upoop natum tamoot.

Pain tonanan, yom uwaat iza Ismael.

Pasa, Maaron ilooŋ taŋiiz tiom wa.

12 Natum tonanan pale iwalaghlaagh inimale ŋgai sagsag,

ve ighur koi pa tamtoghon tisob.

Ve tamtoghon tisob pale tighur koi pani paam.

Tovenen yesŋa toŋvetaz toni, pale tighur koi pa taudi, ve tineep saguan saguan.”

13 Yoova isavsaav toman Agar le isob, ghoro Agar igham ŋgar pa mbeb to ivot pani, ve isaav ighaze: “Ye to ighita ghou irau sawa isob, tauto taug naghita sualen.” Tovenen iwaat Yoova iza ighaze ‘El-Roi.’ Saveeŋ tonene, pughu tovene: ‘Maaron to ighita ghou.’ 14 Tauto tiwaat ya naliu to ndug tonowen tighaze ‘Ya bokbokia to Maaron mata yaryaara to ighita ghou.’ †Ila saveeŋ Hibru, tiwaat ya tonowen iza ‘Beer Lai Roi.’

Ya tonowen ineep bodbodaaŋ pa ndug Kades ve ndug Bered.

15-16 Abram ndaman toni 86, ve Agar ipoop Abram le natu tamoot. Ve Abram iwaat iza Ismael.

<- Mbeb Naol Tisob Pughudi 15 Mbeb Naol Tisob Pughudi 17 ->