5 Yagu yauyaule kaiwena kagu baliyan sibowa yo sipwasa bwalaili sinae.

6 Dagelagu iyou yau kaiwe meuloina imwawasi yo kaliyate meuloina me yagu yaba yalolokeikeile.

7 Yogu iwedowedoli kasiebwa kaiwena kikiunamo yaboita.

8 Kamnagu inae molosi yo nige yagu kaiwe yaboyoi. Yayabayaba kategu ana kamkamna kaiwena.

9 O Yeoba, yagu nuwatu ukwatailiko yo yagu yaba meuloili kubenalagili.

10 Kategu iwakaka yo yau kaiwe imwamwawasi, mangu iganuganu mayalena ikwalaleleko.

11 Yagu eliyamwao yo kaukavao silosuwala koliyau kaiwena kau kasiebwa simatausan yo tabe yagu susuyao genuwali silaoma siboeyagau.

12 Siya analiyao nuwanuwali siunuyamateyau ali sipwasipwa sikatukatububu-nagili kaiwegu, yo siya nuwanuwali siyakamkamna-yau ali walo mena siula-matamatausagau siwalo kani sisibayanaeyau. Yagu silae kaiwena sinuwanuwatu sauga meuloina.

13 Yau besiele totenakola nige sowasowana yabenali, nige sowasowana yaedeedede yau besiele memenagu ipolowe.

14 Yapaisowa besiele totenakola yo gamwagu ipatu genuwagu kainali yayamaisa.

15 Na iyamo yagu meli yapei Yeoba yagu Yaubada koliwo, na kowa kani kuyamaisa koliyau.

16 Tabu kutatalam kagu tokaleyayao sigagagasa-likwaiyau yagu kamkamna yo yagu beku kaiwena.

17 Kikiunamo yabeku, yagu kamkamna iyaele imiyamiya koliyau nige ilolopei.

18 Yagu pwanoli yawalo-masalagili, siya siyamala yagu katewakaka.

19 Kagu tokaleyayao siya sinamwanamwa yo sikaiwe, sibaibaiwa sikalomagigi-lagau nige yaina ipapagan.

20 Siya naenaena siyeyama namwanamwana kaiwena sikalomagigi-lagau kaiwena yatotolo mumugana namwanamwana koina.

21 O Yeoba yagu Yaubada, tabu kulologabaegau yo tabu kutotolo-suwala koliyau.

22 O Yeoba kagu Tolebo, kulomwayamwayauma na kusaguiyau.

<- Same 37Same 39 ->