1 A tah vëh to hik en, köꞌ ep in a meh ankeroꞌ to taneꞌ maꞌ pa vöön va kin ko kunah maꞌ. Eꞌ to teꞌ me non o maaka me o kikis apuh, ko maaka peꞌ ëman ke non po oeh avoes. 2 Eꞌ to kokoeꞌ suntan rakah, pareꞌ soe pan,
“A vöön apuh vëh Babiron to hat en, eꞌ to hat en!
Eꞌ to tavus en a ö teꞌteꞌ pa ma tuvuh hat,
eꞌ to tavus en a ö teꞌteꞌ pa ma tuvuh, hat me a ma növan hat to teꞌ ne nën,
me a ma növan hat oah rakah to teꞌ ne nën,
3 Suk ataeah, a napan poë varih to vasunön voh ne a ma sosoenën vapikpiuk.
Eꞌ to teꞌ va non manih pee to nok a taateꞌ rëhrëh me e köövo pamëh,
ka taateꞌ pamëh to teꞌ va non manih pee to kaak o ruiꞌ eh.
Ka ma teꞌ susunön varih po oeh, ee me to vasunön voh ne a ma sosoenën vapikpiuk.
Ka taateꞌ pamëh to teꞌ va non manih pee to nok a taateꞌ rëhrëh me e köövo pamëh.
Me a ma napan varih po oeh to vavavoen kakoꞌ voh ne,
pare nonok moniꞌ vapeo voh ne.
Suk e köövo pamëh to voen taneꞌ manih pee a ma moeh tah peo neꞌ to iu non,
ivëhpëhkëk, eꞌ to öt vapeo oah e non pa ma tah neꞌ se öt non.”
4 Eöꞌ to tënan a meh teꞌ manuh pa vöön va kin to soe maꞌ pan,
“Ma napan peöꞌ, eöm se këh tavus maꞌ a vöön manem!
Eöm se koe a vamomhë me a teꞌ manem, me a ma taateꞌ hat peꞌ,
tomeꞌ a ma punis peꞌ kopös a neöm.
5 A ma taateꞌ hat peꞌ to parin a peo vörep, ko teꞌ öök e ne na manuh kin,
ke Sosoenën nat tamoaan e non pa ma hat peꞌ.
6 Eöm se nat e nem pa ma taateꞌ hat ne köövo rëhrëh pamëh
to nok manih pa ma meh teꞌ, ko piun hah keah a ma taateꞌ hat poë varih.
Eꞌ to ununun voh a ma taateꞌ hat peꞌ, kee tavus vapeo.
Ivëh, köm se piun oah pet keah a ma taateꞌ hat neꞌ to nok voh, to onöt non a ma taateꞌ hat peꞌ neꞌ to nok manih po upöm teꞌ.
Eꞌ to hovën vaꞌpuh voh o ruiꞌ eh manih pa kap, ko heꞌ a ma napan pe Sosoenën.
Ivëh, ke eöm se hovën vaꞌpuh oah pet o ruiꞌ eh manih pa kap, ko heꞌ varuꞌ eah keꞌ kaak.
7 Eꞌ to kë koman hah voh non a ëhnaneah, ko ununun voh non a ma tah peo vihvih.
Ivëh, köm se heꞌ punis eah, keꞌ kon kamis to onöt va non manih pa ma tah poë varih neꞌ to nonok voh non, keꞌ se ook vörep.
Eꞌ koman to sosoe va non manih pan, ‘Eöꞌ e köövo sunön to ihoꞌ noꞌ pa matop a ma napan,
ko hikta teꞌ noꞌ a köövo amop ne voe to mët këh voh. Eöꞌ hikta se okook noꞌ ko hikta se taum noꞌ ta punis.’
8 Ivëh, ka ma vu hat rakah se tavus manih peꞌ po pöh poen ro.
O maë apuh se tavus, me a nap peo se mët, me a napan se vaokook ne.
A suraꞌ se ës vahik a Babiron.
E Sunön, e Sosoenën to teꞌ me non o kikis se kiiki poan, ko piun ke poan a ma vu punis apuh oah rakah.”
9 A ma teꞌ sunön varih po oeh to iu tavus voh ne o teꞌ öt ö vörep. Suk a köövo pamëh to voen taneꞌ manih pee, a ma moeh tah peo neꞌ to iu non, ivëhpëhkëk, eꞌ to öt vapeo oah e non pa ma tah neꞌ se öt non. Ee se vaokook ne pa ö see ep in o öh va pa suraꞌ to ësës non a vöön. 10 Ee se sun varo e ne maꞌ to nanaöp e ne pa huk vatët tomeꞌ a punis nö maꞌ pee, pare soe maꞌ pan,
“Vaururuan! Vaururuan rakah vöön apuh Babiron!
Eën a vöön apuh parën eh rakah me!
Pa pah aoaꞌ ro nën to kon eöm pa piun in a ma taateꞌ hat nën to nok voh!”
11 A ma nap vavavoen kakoꞌ varih po oeh, ee se kokoman e ne pa vöön pamëh, ko vaokook e ne, suk ataeah, a hikta teꞌ se voen taneꞌ hah ta kakoꞌ manih pa ma iuun kakoꞌ pee. 12 A ma kakoꞌ poë varih, eꞌ a gol, ka silvaꞌ, vös voen vapeah, mök voen vapeah, me a rara kakaare, me a ma vu rara ereraꞌ, me o rara silkaꞌ. Me a naon ovoavuh vih, me a ma tah to nok ne pa ma riu elepen, me a ma tah nee to nok po naon voen vapeah, me po bras, me po aën, me po vös nee to popokaꞌ ne a mapol. 13 Ka ma kakoꞌ nee to vavoen voh ne ivarih, sinamon, töꞌtöꞌ ënëën, a ma tah ësës ovoavuh vih, a tah uhuh ovoavuh vih, me o voaën, me o vamom nee to nok po naon öliv, me o praoaꞌ vih, me o vuit, me o purmakaöꞌ, me o sipsip, me o hös, me o karis, me a ma teꞌ kikiu akuk, me a ma teꞌ nee to öt pa tëëm vavapus. A ma tah kurus varih no a hikta teꞌ se vavavoen hah non. 14 Ka nap vavavoen kakoꞌ se soe vamanih pan,
“Babiron, a ma tah vih varih no a komömah to iu non to ro këh ee pën,
me a ma ohop vavatëk vavih pën to ro këh ee pën.
A ma napan hikta se ep hah ka nom oah to öt nom a ma tah poë varih!”
15 Ka nap vavavoen kakoꞌ voh manih pa vöön pamëh, ee se nanaöp rakah e ne po kamis hat vëh no a vöön apuh to kon. Ee se sun varo këh e ne maꞌ pa vöön me o kokoman karë, ko vaokook ne. 16 Ee se soe vamanih pan,
“Varenan! Varenan rakah pa vöön apuh vëh!
Moaan voh, eꞌ to ohop voh non a ma ohop kakaare vihvih,
me a ma vu ohop ereraꞌ,
ko ohop me voh non a ma ohop nee to nok voh pa gol,
me a ma mök ep vavih voen vapeah nee to mök voh ne!
17 Pa pah aoaꞌ ro rakah no a ma moniꞌ apuh,
me vatëk ep vavih poë varih to hik kurus ee.”
Ka ma teꞌ vavanö paröꞌ, me a ma teꞌ varih to kiu ne komön o paröꞌ, me a ma teꞌ varih to kokon moniꞌ ne pa voen a ma tah va tahiꞌ, a napan poë varih to sun varo këh e ne maꞌ pa vöön va Babiron. 18 Ee to sun varo ne maꞌ pare ep ne maꞌ o öh va pa vöön vëh to ësës non, pare vaokook varenan vamanih pan, “A vöön poanheh to teꞌ va non manih pa vöön apuh vëh?” 19 Ee kurus to vi peah o vavoan manih pa pasuire, ko vaokook ne pare sosoe ne pan,
“Varenan! Varenan rakah pa vöön apuh vëh!
A ma tövaneah pa ma paröꞌ varih to nönö voh ne tahiꞌ,
ee to tavus voh o teꞌ öt ö pa ma moniꞌ va pa vöön apuh vëh,
a pah aoaꞌ ro rakah no a ma tah kurus poë varih to hik ee!
20 Eöm varem pa vöön va kin me a ma napan pe Sosoenën,
me a ma teꞌ vanënën soe, me o aposol, eöm se vaeö rakah nem pa tah vëh to tavus manih pa vöön vëh.
E Sosoenën to kiiki voh en pa ma taateꞌ peꞌ, ko piun ke poan a punis no a vöön vëh to nok voh manih peöm.”
21 A tah vëh to hik en, ke eöꞌ ep in a ankeroꞌ eh to kon a vös apuh kokon vuit, ko vi kunah en peꞌ manuh tahiꞌ. Pareꞌ soe pan,
“A ö vëh nee se vi kunah va in a vöön apuh va Babiron,
ka napan hikta se ep hah ne poë.
22 Ivëh, ka tanih va pa gitaꞌ, me a kuru, me a suvin, me a ma moeh vu tah tatanih,
ee hikta se tënan hah ne a ma vu tanih poë varih manih pën.
Ka ma napan varih to vavaasis vahik voh maꞌ pa ma vu kiu,
ee hikta se ep hah ne a ma napan poë varih to teꞌ hah ne manih pën.
A tanih va pa ma tah nonok taëën,
no a napan hikta se tënan hah ne manih pën.
23 O ëman va po ram, nee se hikta se ep hah ne manih pën.
Ka rivoeero teꞌ tövaen, me a köövo tövaen to iu vaen ne,
ee hikta se tënan hah ne raoe manih pën.
Moaan voh a ma napan voh pën varih to matop voh ne a ma kiu moniꞌ, ko teꞌ ne a nap sunön öt ö pa matëëra ma napan.
Ke eën Babiron, eën to nonok voh nom a ma ëtoꞌ ororaꞌ teꞌ manih pa ma upöm napan va po oeh.”
24 E Sosoenën to heꞌ punis a vöön va Babiron, suk o eraꞌ po teꞌ vanënën soe, me a ma napan pe Sosoenën to takoꞌ voh koman pa vöön pamëh.
