1 Long namba wan de bilong wik,[a] long moningtaim tru, ol meri i go long matmat. Ol i kisim dispela marasin samting i gat gutpela smel, ol i bin redim pinis, na ol i karim i go. 2 Na ol i lukim dispela ston ol man i bin pasim matmat long en em i no moa i stap long maus bilong matmat. Nogat. Ol i tantanim i go pinis. 3 Na ol i go insait, tasol ol i no lukim bodi bilong Bikpela Jisas. 4 Ol [b] i no save bodi bilong Jisas i stap we, na ol i tingting planti i stap. Na ol i lukim tupela man i sanap klostu, klos bilong tupela i lait moa yet. 5 Orait [c] na ol meri i pret tru na ol i daunim het na lukluk i go daun. Tasol dispela tupela man i tokim ol olsem, “Bilong wanem yupela i kam painim man i gat laip long ples bilong ol man i dai pinis? 6 Em [d] i no i stap hia. Em i kirap pinis. Yupela i mas tingim gen dispela tok em i bin givim yupela, taim em i stap yet long Galili. 7 Em i bin tokim yupela olsem, ol i mas givim Pikinini Bilong Man long han bilong ol man bilong mekim sin, na ol bai i nilim em long diwai kros. Na long de namba 3 bai em i kirap bek.”
8 Na ol i tingim dispela tok Jisas i mekim bipo, 9 na [e] ol i lusim matmat na ol i go bek. Na ol i tokim ol 11-pela disaipel na olgeta arapela manmeri tu long dispela olgeta samting. 10 Ol [f] meri i givim dispela tok long ol aposel, em Maria bilong taun Makdala na Joana na Maria, em mama bilong Jems, na ol arapela meri i stap wantaim ol. 11 Tasol [g] ol aposel i ting ol meri i mekim tok win nating. Na ol i no bilipim tok bilong ol. 12 [h]Tasol Pita i kirap na i ran i go long matmat. Na em i lindaun na i lukluk i go insait, na em i lukim ol laplap tasol i stap. Orait em i go bek long haus na em i tingting planti long dispela samting i bin kamap.*
13 Long dispela de tasol ol meri i bin i go long matmat, tupela disaipel i wokabaut i go long wanpela ples ol i kolim Emeus. Dispela ples i stap longwe long Jerusalem inap olsem 11-pela kilomita. 14 Tupela i wokabaut i go, na tupela i wok long toktok long dispela olgeta samting i bin kamap. 15 Tupela [i] i wok long mekim planti toktok na askim long ol dispela samting, na Jisas yet i kamap klostu na i wokabaut i go wantaim tupela. 16 Tasol [j] wanpela samting i pasim ai bilong tupela, na tupela i no luksave olsem, em i Jisas.
17 Na em i askim tupela olsem, “Yutupela i toktok long wanem samting na yutupela i wokabaut i go?” Em i tok olsem, na tupela i sanap na pes bilong tupela i soim olsem tupela i bel sori tru. 18 Na [k] wanpela bilong tupela, em wanpela man nem bilong en Kliopas, em i bekim tok olsem, “Planti man bilong ol narapela narapela ples nau ol i stap long Jerusalem. Na ating yu wanpela tasol yu no save long ol samting i bin kamap long Jerusalem long dispela taim?” 19 Em [l] i tok olsem, na Jisas i askim tupela, “Wanem samting?”
25 Na Jisas i tokim tupela olsem, “Yutupela i no gat tingting na bel bilong yutupela i no kirap kwik long bilipim olgeta tok ol profet i bin mekim. 26 Olsem [q] wanem? Ating yutupela i no save, dispela man God i bin promis long salim i kam bilong kisim bek ol manmeri bilong en, em i mas karim pen pastaim na bihain em bai i kisim bikpela namba tru long God?” 27 Na [r] em i autim tok long tupela. Em i stat long tok bilong Moses na bilong olgeta profet, na em i skulim tupela long as bilong olgeta hap bilong buk bilong God i toktok long em yet.
28 Ol i wokabaut i go na ol i kamap klostu long dispela ples tupela i laik i stap long en. Na Jisas i mekim olsem em i laik i go moa. 29 Tasol tupela i pasim em na i tok, “Yu stap wantaim mitupela. San i laik i go daun nau, na liklik taim bai tudak i kamap.” Olsem na em i go insait long haus na i stap wantaim tupela. 30 Bihain [s] ol i laik kaikai, na Jisas i sindaun wantaim tupela. Na em i kisim bret na i tenkyu long God, na i brukim, na i givim long tupela. 31 Em i mekim olsem, na ai bilong tupela i op, na tupela i luksave long em. Na wantu em i lus nating, na tupela i no lukim em moa. 32 Na tupela i toktok long tupela yet olsem, “Tru tumas, taim mitupela i wokabaut long rot, na em i givim toktok long mitupela, na em i autim as tingting bilong buk bilong God long mitupela, bel bilong mitupela i bin kirap tru.”
33 Tupela i tok olsem, na wantu tupela i kirap na i go bek long Jerusalem. Na tupela i lukim ol 11-pela disaipel wantaim sampela pren bilong ol, ol i bung i stap. 34 Na [t] ol i tokim tupela olsem, “Tru tumas, Bikpela i kirap bek! Saimon i lukim em pinis!” 35 Orait na tupela i stori long ol long olgeta samting i bin kamap long tupela long rot. Na tupela i tok, “Taim em i brukim bret, mitupela i bin luksave long em.”
36 Ol [u] disaipel i toktok yet i stap, na Jisas yet i sanap namel long ol. [v] Na em i tokim ol olsem, “Bel bilong yupela i ken i stap isi.”* 37 Tasol [w] ol i kirap nogut na ol i pret. Ol i ting ol i lukim wanpela tewel. 38 Na em i tokim ol olsem, “Bilong wanem yupela i kirap nogut? Bilong wanem yupela i tingting planti? 39 Lukim han na lek bilong mi. Mi yet mi stap. Holim skin bilong mi, na lukim. Ol tewel i no gat mit na bun olsem yupela i lukim i stap long mi.” 40 [x] Em i tok olsem, na em i soim han wantaim lek bilong en long ol.* 41 Ol [y] i amamas tru, tasol ol i no bilip yet. Na ol i tingting planti. Na em i tokim ol olsem, “Ating yupela i gat sampela kaikai i stap hia?” 42 Na ol i givim em hap pis ol i bin kukim, 43 na em i kisim na kaikai, na ol i lukim.
44 Na [z] em i tokim ol olsem, “Taim mi stap yet wantaim yupela, mi bin tokim yupela pinis olsem, olgeta samting bipo ol i raitim long mi long lo bilong Moses na long buk bilong ol profet na long Buk Song, dispela olgeta samting i mas kamap tru.” 45 Na [aa] em i helpim ol long tingting gut long as bilong ol tok i stap long buk bilong God. 46 Na [bb] em i tokim ol olsem, “Buk bilong God i gat tok olsem, man God i makim bilong kisim bek ol manmeri bilong en, em i mas karim pen, na long de namba 3 em i mas kirap bek long matmat. 47 Na [cc] long nem bilong em bai ol i mas autim tok long olgeta lain manmeri, bai ol i ken tanim bel, na bai God i lusim ol sin bilong ol. Yupela i mas statim dispela wok long Jerusalem, 48 na [dd] yupela i mas autim tok long ol dispela samting i bin kamap. 49 Harim. [ee] Bipo Papa i bin promis long givim Holi Spirit long yupela, na klostu bai mi salim i kam long yupela. Yupela i mas i stap long dispela taun inap long taim yupela i kisim dispela strong bilong God.”
50 Orait Jisas i bringim ol disaipel i go inap long ples Betani. Na em i litimapim han bilong en na i askim God long mekim gut long ol. 51 Em [ff] i givim blesing yet long ol, na em i lusim ol, na God i kisim em i go long heven. 52 [gg] Na [hh] ol i brukim skru na lotu long em.* Na ol i amamas tru na ol i go bek long Jerusalem. 53 Na [ii] oltaim ol i stap long tempel na ol i litimapim nem bilong God.
<- LUK 23- a Namba wan de bilong wik, em Sande tasol.
- b Ap 1.10
- c Lu 2.9
- d Mt 16.21, 17.22-23, 20.18-19, Mk 8.31, 9.31, 9.31, 10.33-34, Lu 9.22, 18.31-33
- e Mk 16.10
- f Lu 8.3
- g Mk 16.11, Lu 24.25
- h Sampela saveman i ting dispela tok i stap namel long tupela sta, em Luk yet i no bin raitim, tasol narapela man i bin raitim bihain.
- i Mt 18.20, Lu 24.36
- j Jo 20.14, 21.4
- k Jo 19.25
- l Mt 21.11, Jo 6.14, Ap 2.22
- m Lu 23.1, Ap 13.27-28
- n Lu 1.68, 2.38, 19.11, Ap 1.6
- o Mt 28.8, Mk 16.10, Lu 24.1-11, Jo 20.18
- p Jo 20.3-10
- q Lu 9.22, 24.44, Ap 17.3, 1 Pi 1.11
- r Stt 3.15, Nam 21.9, Lo 18.15, Sng 22.1-21, Ais 7.14, Dan 9.24, Mal 3.1, Jo 13.31, Ap 3.13
- s Mt 14.19, Lu 22.19
- t 1 Ko 15.4-5
- u 1 Ko 15.5
- v Sampela saveman i ting dispela tok i stap namel long tupela sta, em Luk yet i no bin raitim, tasol narapela man i bin raitim bihain.
- w Mt 14.26
- x Sampela saveman i ting dispela tok i stap namel long tupela sta, em Luk yet i no bin raitim, tasol narapela man i bin raitim bihain.
- y Jo 21.5
- z Mt 16.21, 20.18, Mk 8.31, Lu 9.22
- aa Lu 24.27, Ap 16.14
- bb Sng 22, Ais 50.6, 52.14—53.12, Hos 6.2, Lu 24.26, Ap 17.3
- cc Ais 49.6, 49.22, Jer 31.34, Mai 4.2, Mal 1.11, Mt 28.19, 1 Ti 3.16
- dd Jo 15.27, Ap 1.8, 1.22, 2.32
- ee Ais 44.3, Jol 2.28, Jo 14.16, 14.26, 15.26, 16.7, Ap 1.4
- ff Jo 20.17, Ef 4.8
- gg Sampela saveman i ting dispela tok i stap namel long tupela sta, em Luk yet i no bin raitim, tasol narapela man i bin raitim bihain.
- hh Jo 14.28, 16.22
- ii Ap 2.46, 5.42