1 Jon i lusim taun Geser na em i go ripot long Saimon, papa bilong em, long olgeta samting Sendebeus i bin mekim. 2 Orait Saimon i singautim namba wan na namba 2 pikinini bilong em, Judas na Jon, na em i tokim tupela olsem, “Mi wantaim ol brata bilong mi na ol lain bilong papa bilong mi, mipela i bin pait bilong helpim ol Israel, stat long taim mipela i yangpela yet i kam inap long nau. Planti taim mipela i bin go long pait na mipela i bin kisim bek ol Israel long han bilong ol birua. 3 Tasol nau mi lapun pinis, na mi tenkyu long God, long wanem, yutupela i kamap bikpela man pinis. Nau yutupela i mas kisim ples bilong mi na bilong ol brata bilong mi. Yutupela i mas i go pait bilong helpim kantri bilong yumi. God i ken sambai long yutupela.”

4 Orait Jon i bungim 20,000 soldia i save gut long pait na sampela soldia i save sindaun long ol hos. Ol i go bilong bungim Sendebeus long pait, na long nait ol i slip long taun Modein. 5 Taim tulait i bruk ol i kirap na i go long ples i stret. Long dispela hap wanpela bikpela lain soldia nating wantaim ol soldia i sindaun long hos i bungim ol. Tasol wanpela wara i stap namel long tupela lain ami. 6 Jon wantaim ol ami bilong en i go sanap na lukluk i go long ol birua. Tasol Jon i painimaut olsem ol soldia bilong en i pret long brukim wara. Olsem na em i go pas long brukim wara, na ol i lukim na bihainim em. 7 Na Jon i putim ol soldia i sindaun long hos namel long tupela lain soldia nating, long wanem, ol birua i gat planti tumas bilong ol soldia i sindaun long hos. 8 Ol i winim ol biugel, na ol i kirap ranim Sendebeus wantaim ol ami bilong em. Planti birua i kisim bagarap na planti i dai. Ol arapela i ranawe i go long strongpela kem long taun Kedron.

9 Long dispela pait Judas i kisim bagarap. Tasol Jon, brata bilong em, i ranim ol birua i go inap long Kedron, em ples Sendebeus yet i bin wokim. 10 Ol birua i ranawe i go tu long ol taua long hap bilong taun Asdot. Tasol Jon i kukim taun na 2,000 man i dai. Bihain em i go bek long Judia, na em i kamap gut long ples.

11 Tolemi, pikinini bilong Abubus, em i kamap namba wan gavman bilong ples daun long hap bilong taun Jeriko. Em i gat planti silva na gol, 12 long wanem, meri bilong en em i pikinini bilong hetpris Saimon. 13 Tolemi i stat long hambak tumas na em i laik bosim kantri olgeta. Em i gat tingting bilong trikim Saimon na kilim em wantaim ol pikinini bilong em. Long yia 177, long namba 11 mun, em mun ol i kolim Sebat,[a] 14 Saimon i go lukluk raun long ol taun insait long kantri bilong em. Em i laik save long ol laik na wari bilong ol manmeri. Em i go wantaim tupela pikinini bilong em, Matatias na Judas, na ol i kamap long Jeriko. 15 Tolemi i trikim Saimon na tupela pikinini bilong em. Em i askim ol long kam lukim em long liklik kem bilong em, ol i kolim Duk, em Tolemi i bin wokim. Em i wokim wanpela bikpela pati, tasol em i bin haitim sampela man insait long haus. 16 Taim Saimon wantaim tupela pikinini bilong en i spak pinis, Tolemi wantaim ol man bilong en i kirap na ol i kisim ol samting bilong pait na i ran i go insait long rum kaikai. Ol i kilim Saimon wantaim tupela pikinini bilong en na sampela wokman bilong ol. 17 Olsem na Tolemi i paulim nogut tru ol tambu bilong em. Em i bekim gutpela pasin bilong ol long pasin nogut bilong em.

18 Bihain Tolemi i raitim wanpela ripot bilong ol dispela samting em i bin mekim, na em i salim i go long king. Em i askim king long salim ol ami i kam bilong helpim em, bai em yet i ken bosim dispela graun. 19 Orait Tolemi i salim ol man i go long taun Geser bilong pinisim Jon. Em i raitim pas i go long ol ofisa bilong ami na em i singautim ol long kam kisim silva na gol na ol kain kain presen. 20 Na em i salim ol arapela man bilong i go kisim Jerusalem na maunten bilong tempel. 21 Tasol wanpela man i bin ran i go pas na i kamap long Geser na i tokim Jon olsem, “Papa bilong yu wantaim tupela brata bilong yu i dai pinis. Na Tolemi i salim sampela man i kam bilong kilim yu tu.”

22 Jon i harim dispela tok na em i kirap nogut tru. Tasol em i save pinis long trik bilong Tolemi, olsem na em i kalabusim ol man i kam bilong kilim em. Na em yet i kilim ol i dai.

23-24 Yu ken lukim tok bilong ol arapela wok bilong Jon long dispela buk i stori long ol samting em i bin mekim long taim em i stap hetpris. Dispela buk i stori long ol pait bilong Jon, na ol banis bilong taun em i bin sanapim bek, na ol arapela wok bilong em. Tok bilong dispela buk i stat long taim Jon i senisim papa bilong em na i kamap hetpris.[b]

<- 1 MAKABI 15