56
1 ʻOku lotu ʻa Tevita ki he ʻOtua, ʻo tui ki heʻene folofola, pea hanu koeʻuhi ko hono ngaahi fili. 9 ʻOku fakahā ʻene falala ki he folofola ʻae ʻOtua, ʻo ne pehē, te ne fakamālō kiate ia.
Ki he Takimuʻa ʻi he Sonatilemi-Lehokimi, ko e Saame mahuʻinga ʻa Tevita, ʻi he puke ia ʻe he kakai Filisitia ʻi Kata.
1 Ke ke ʻaloʻofa kiate au, ʻE ʻOtua: he ʻoku fie folo hifo au ʻe he tangata;
ʻoku ne tauʻi au ʻi he ʻaho kotoa, ʻo ne taʻomia au.
2 Ko e loto ʻo hoku ngaahi fili ʻi he ʻaho kotoa pē ke folo hifo au:
he ʻoku tokolahi ʻakinautolu ʻoku tauʻi au, ʻE Fungani Māʻolunga.
3 ʻI he ʻaho ʻoku ou manavahē ai,
te u falala kiate koe.
4 Te u fakamālō ki he ʻOtua ʻi heʻene folofola;
ʻoku ou falala ki he ʻOtua;
ʻe ʻikai te u manavahē ki he meʻa ʻe faʻa fai ʻe he kakai kiate au.
5 ʻOku nau fakakehe ʻeku ngaahi lea ʻi he ʻaho kotoa pē:
ko ʻenau fakakaukau kotoa pē ke u kovi ai au.
6 ʻOku nau fakataha ʻakinautolu, ʻoku nau fakafufū ʻakinautolu,
ʻoku nau vakai hoku ʻaluʻanga, ʻi heʻenau holi ki heʻeku moʻui.
7 Te nau hao koā ʻi heʻenau hia?
ʻE ʻOtua, ke ke lī ki lalo ʻae kakai ʻi he houhau.
8 ʻOku ke lau ʻa ʻeku ʻalu fano pē:
ke ke ʻutu hoku ngaahi loʻimata ki hoʻo hina:
ʻikai ʻoku nau tuʻu ʻi hoʻo tohi?
9 ʻO kau ka tangi kiate koe, ʻe foki kimui ai ʻa hoku ngaahi fili:
ʻoku ou ʻilo ʻae meʻa ni; he ʻoku ʻiate au ʻae ʻOtua.
10 Te u fakamālō ki he ʻOtua ʻi heʻene folofola:
te u fakamālō kia Sihova ʻi heʻene folofola.
11 Kuo u falala ki he ʻOtua:
ʻe ʻikai te u manavahē ki ha meʻa ʻe faʻa fai ʻe he tangata kiate au.
12 ʻE ʻOtua, ʻoku ʻiate au hoʻo ngaahi fuakava:
te u ʻatu ʻae fakamālō kiate koe,
13 He kuo ke fakamoʻui hoku laumālie mei he mate:
pea ʻikai te ke fakahaofi hoku vaʻe mei he hinga,