28
1 ʻOku ai ʻae ʻilo ki he ngaahi meʻa ʻo māmani. 12 Ka ko e poto, ko e meʻa foaki lelei ʻae ʻOtua.
1 “Ko e moʻoni ʻoku ai ʻae halanga ki he siliva,
mo e potu ki he koula ʻoku fakamaʻa ʻe he kakai.
2 ʻOku toʻo ʻae ʻaione mei he kelekele,
pea ʻoku haka ʻae palasa mei he maka.
3 ʻOku ne fakangata ʻae fakapoʻuli,
pea ne kumi ki hono ngataʻanga:
ko e ngaahi maka ʻoe poʻuli mo e ʻata ʻoe mate.
4 ʻOku ʻoho mai ʻae vai mei he potu ʻoku ʻi ai ʻae kakai;
ne ngalo ia ʻi he kau vaʻe:
kuo matuʻu hake ia, ʻo mole atu mei he kakai.
5 ʻOku tupu ʻae mā mei he kelekele:
pea ʻoku fulihi ʻi lalo ia ʻo hangē ko e afi.
6 Ko hono ngaahi maka ko e potu ia ʻoe ngaahi safaia:
pea ʻoku ʻi ai ʻae efu koula.
7 Ko e hala eni ʻoku ʻikai ʻiloʻi ʻe he manupuna,
pea kuo ʻikai mamata ki ai ʻae mata ʻoe vulita.
8 Naʻe ʻikai moloki ia ʻe he fānganga ʻoe laione,
pe ʻalu ʻi ai ʻae laione fekai.
9 ʻOku ne ʻai hono nima ki he maka;
ʻoku taʻaki fuʻu hake ʻe ia ʻae ngaahi moʻunga.
10 ʻOku ne matofa ʻae ngaahi tafeʻanga vai ʻi he ngaahi maka;
pea ʻoku mamata ʻa hono mata ki he meʻa mahuʻinga kotoa pē.
11 ʻOku ne nonoʻo ʻae ngaahi vai ke ʻoua naʻa mafola ia;
pea ko ia naʻe fufū ʻoku ne ʻomi ki he maama.
12 “Ka ʻe ʻilo ki fē ʻae poto?
Pea komaʻa ia ʻae potu ʻoe ʻilo?
13 Ko hono mahuʻinga ʻo ia ʻoku ʻikai ʻilo ʻe he tangata;
pea ʻoku ʻikai ʻilo ia ʻi he fonua ʻoe moʻui.
14 ʻOku pehē ʻe he loloto, ‘ʻOku ʻikai ʻiate au ia:’
ʻoku pehē mo e tahi, ‘ʻOku ʻikai ʻiate au.’
15 ʻE ʻikai faʻa maʻu ia ʻaki ʻae koula,
pea ʻe ʻikai fakamamafa ʻae siliva mo hono totongi ʻoʻona.
16 ʻE ʻikai fakatauʻaki ia ʻae koula ʻo Ofeli,
pe ko e oniki mahuʻinga, pe ko e safaia.
17 ʻOku ʻikai tatau mo ia ʻae koula mo e kalisitala:
pea ʻe ʻikai fetongi ʻaki ia ʻae ngaahi teunga koula lelei.
18 ʻE ʻikai lau ki ai ʻae feo kulokula, mo e mataʻitofe:
he ko e mahuʻinga ʻoe poto ʻoku lahi hake ia ʻi he ngaahi maka mahuʻinga.
19 ʻOku ʻikai tatau mo ia ʻae topasi ʻo ʻItiopea,
pea ʻe ʻikai totongi ʻaki ia ʻae koula haohaoa.
20 Ko ia, ʻoku haʻu mei fē ʻae poto?
pea ko maʻā ia ʻae potu ʻoe ʻilo?
21 He kuo fufū ia mei he mata ʻoe moʻui kotoa pē,
pea fakalilolilo mei he fanga manu ʻoe ʻatā.
22 ʻOku pehē ʻe he fakaʻauha mo e mate,
‘Kuo ma fanongo ki hono ongoongo ʻo ia ʻaki homa telinga.’
23 “ʻOku ʻiloʻi ʻe he ʻOtua ʻa hono hala,
pea ʻoku ne ʻiloʻi mo hono potu.
24 He ʻoku ne sio ki he ngaahi ngataʻanga ʻo māmani,
pea ʻoku ne ʻafioʻi ʻaia kotoa pē ʻoku ʻi lalo langi;
25 Ke ne ngaohi ʻae mamafa ʻoe matangi;
pea ʻoku ne tuʻutuʻuni ʻae ngaahi vai ʻi he fuofua.
26 ʻI heʻene fokotuʻu ʻae fono ki he ʻuha,
pea mo e hala ki he ʻuhila ʻoe mana:
27 Ko ia naʻa ne mamata ki ai, pea fakahā ia;
naʻa ne fokotuʻumaʻu ia, ʻio, pea naʻa ne hakule ki ai.
28 Pea naʻe pehē ʻe ia ki he tangata,
‘Vakai, ko e manavahē kia Sihova, ko e poto ia;