23
1 ʻOku holi ʻa Siope ke haʻu ki he ʻao ʻoe ʻOtua, 6 ʻI he loto falala ki heʻene ʻaloʻofa. 8 ʻOku taʻehāmai ʻae ʻOtua, ka ʻoku ne ʻafioʻi ʻa ʻetau faianga. 11 Ko e māʻoniʻoni ʻa Siope. 13 ʻOku tuʻumaʻu ʻae tuʻutuʻuni ʻae ʻOtua.
1 Pea naʻe toki tali ʻe Siope, ʻo ne pehē,
2 “ʻOku kona ʻaupito ʻa ʻeku mamahi,
ʻio, ʻi he ʻaho ni: pea mamafa lahi hoku tā ʻi heʻeku faʻa toʻe.
3 Taumaiā ke u ʻilo ʻae potu te u maʻu ai ia! Ke u aʻu atu ki hono nofoʻanga!
4 Te u fakamatala ʻeku meʻa ʻi hono ʻao,
ʻo fakafonu hoku ngutu ʻaki ʻae ngaahi lea fakamamafa.
5 Te u ʻilo ai ʻae ngaahi lea te ne tali ʻaki au,
pea u faʻa ʻilo ʻaia te ne lea ʻaki mai kiate au.
6 He te ne fai mo au ʻaki hono mālohi lahi?
ʻIkai: ka te ne ʻai ʻae mālohi kiate au.
7 ʻE faʻa alea ai mo ia ʻae māʻoniʻoni;
pea ʻe fakamoʻui taʻengata ai au mei hoku fakamaau.
8 “Vakai, ʻoku ou ʻalu atu, ka ʻoku ʻikai ʻi ai ia;
pea ʻoku ou foki mai, kae ʻikai te u ʻiloʻi ia:
9 Ki he toʻohema, ʻoku ne ngāue ai, kae ʻikai te u sio ki ai:
pea ʻoku ne fufū ia ʻi he toʻomataʻu, ke ʻoua naʻaku ʻilo ia:
10 Ka ʻoku ne ʻilo ʻae hala ʻoku ou ʻalu ai:
pea ka ʻosi ʻene ʻahiʻahiʻi au, te u hao mai ʻo hangē ko e koula.
11 Kuo puke maʻu ʻe hoku vaʻe ki hono lakaʻanga,
pea kuo u ʻalu ʻi hono hala, ʻo ʻikai afe.
12 Pea naʻe ʻikai te u foki mai mei he fekau ʻa hono fofonga:
kuo u fufū ʻi hoku loto ʻae ngaahi lea ʻa hono fofonga.
13 Ka ʻoku pehē ai pe ia pea ko hai te ne liliu ia?
Pea ko ia ʻoku tokanga ki ai hono finangalo, ʻe fai pē ʻe ia.
14 He te ne fakakakato hoku ʻinasi kuo tuʻutuʻuni:
pea ʻoku lahi ʻae meʻa pehē ʻiate ia.
15 Ko ia ʻoku ou manavahē ai ʻi hono ʻao:
pea kau ka fakakaukau, ʻoku ou ilifia kiate ia.
16 He ʻoku fakamolū hoku loto ʻe he ʻOtua,
pea ʻoku fakamamahiʻi au ʻe he Māfimafi:
17 Koeʻuhi naʻe ʻikai tuʻusi au ʻi he teʻeki hoko ʻae fakapoʻuli,
ʻo ʻikai ʻufiʻufi ʻe ia ʻae poʻuli mei hoku mata.