1 ʻOku fakaʻāsili ʻae vaʻinga mo e feinga fakamaama ʻi he faikehekehe ʻae ngaahi kuonga. 11 ʻOku ai ʻae lelei ʻi he ngaahi ngāue ʻae ʻOtua: 16 Ka ko e tangata ʻe fakamaauʻi ʻe he ʻOtua ʻene ngāue.
1 ʻOku ai hono kuonga ʻoe meʻa kotoa pē, mo e ʻaho ki he ngāue kotoa pē ʻi he lalo langi:
2 Ko e ʻaho ke fanauʻi ai,
mo e ʻaho ke mate;
ko e ʻaho ke tō,
mo e ʻaho ke taʻaki ʻaia kuo tō;
3 Ko e ʻaho ke tāmateʻi,
mo e ʻaho ke fakamoʻui;
ko e ʻaho ke holoki hifo,
mo e ʻaho ke langa hake;
4 Ko e ʻaho ke tangi,
mo e ʻaho ke kata;
ko e ʻaho ke tangilāulau,
mo e ʻaho ke meʻe;
5 Ko e ʻaho ke liʻaki ʻae ngaahi maka,
mo e ʻaho ke tānaki fakataha ʻae ngaahi maka;
ko e ʻaho ke fāʻufua,
mo e ʻaho ke vāmamaʻo;
6 Ko e ʻaho ke maʻu,
mo e ʻaho ke mole ai;
ko e ʻaho ke kuku maʻu,
mo e ʻaho ke liʻaki atu;
7 Ko e ʻaho ke mahaehae,
mo e ʻaho ke tuitui;
ko e ʻaho ke fakalongolongo,
mo e ʻaho ke lea;
8 Ko e ʻaho ke ʻofa,
mo e ʻaho ke fehiʻa;
ko e ʻaho ke tau,
mo e ʻaho ke melino.
9 Ko e hā ʻae lelei ʻoku maʻu ʻe ia ʻoku ngāue ʻi he meʻa ʻoku ne ngāue ai? 10 Kuo u mamata ki he feinga ʻaia kuo tuku ʻe he ʻOtua ki he fānau ʻae tangata ke ʻahiʻahi ʻaki ʻakinautolu. 11 Kuo ngaohi ʻe ia ʻae meʻa kotoa pē ke fakaʻofoʻofa ʻi hono kuonga: pea kuo ne ʻai foki ʻae māmani ki honau loto, pea ko ia ʻoku ʻikai faʻa ʻilo ai ʻe ha tangata ʻae ngāue ʻoku fai ʻe he ʻOtua mei he kamataʻanga ʻo aʻu ki hono ngataʻanga. 12 ʻOku ou ʻilo ʻoku ʻikai ha lelei ʻi ai, ka koeʻuhi ke fiefia ʻae tangata, pea ke fai lelei ʻi heʻene moʻui. 13 Pea ko e kai mo e inu ʻae tangata kotoa pē, mo e fiefia ʻi he lelei ʻo ʻene ngāue kotoa pē, ko e foaki ia ʻae ʻOtua. 14 ʻOku ou ʻilo, ko e meʻa kotoa pē ʻoku fai ʻe he ʻOtua, ʻe tuʻumaʻu ia ʻo taʻengata: ʻe ʻikai faʻa fakalahi ia, pea ʻe ʻikai faʻa toʻo mei ai ha meʻa; pea ʻoku fai eni ʻe he ʻOtua koeʻuhi ke manavahē ʻae kakai ʻi hono ʻao. 15 Ko e meʻa naʻe ʻi ai, ʻoku ʻi ai ni; pea ko ia kuo tuʻutuʻuni ke hoko, kuo hili hono fai, pea ʻoku toe ʻomi ʻe he ʻOtua ʻae meʻa kuo mole atu.
16 Pea naʻaku mamata foki ʻi he lalo laʻā ki he potu ʻoe fakamaau, ʻoku ʻi ai ʻae angahala; mo e potu ʻoe māʻoniʻoni, ʻoku ʻi ai ʻae fai kovi. 17 Pea u pehē ʻi hoku loto, “ʻE fakamaau ʻe he ʻOtua ʻae māʻoniʻoni mo e angahala: he ʻoku ʻi ai pe hono ʻaho ki he tuʻutuʻuni kotoa pē mo e ngāue kotoa pē.” 18 Pea naʻaku pehē ʻi hoku loto koeʻuhi ko e anga ʻoe fānau ʻae tangata,
ke fakahā ia ʻe he ʻOtua kiate kinautolu, pea nau ʻilo ai ʻoku nau hangē ko e fanga manu. 19 He ko e meʻa ʻoku hoko ki he fānau ʻae tangata ʻoku hoko ia ki he fanga manu; ʻio, ko e meʻa pe taha ʻoku hoko ki ai fakatouʻosi: ʻo hangē ko e mate ʻae taha, ʻoku pehē pe ʻae mate ʻae taha; ʻio, ko e mānava pe taha ʻoku nau maʻu; pea ko ia ʻoku ʻikai māʻolunga ai ʻae tangata ʻi ha manu: he ʻoku vaʻinga ʻae meʻa kotoa pē. 20 ʻOku lau kotoa pē ki he potu pe taha; he ʻoku mei he efu kotoa pē, pea ʻoku toe liliu kotoa pē ki he efu. 21 Ko hai ʻoku ne ʻilo ʻae laumālie ʻoe tangata ʻoku ʻalu ki ʻolunga, mo e moʻui ʻae manu ʻoku ʻalu hifo ki he kelekele? 22 Ko ia ʻoku hā mai kiate au, ʻoku ʻikai ha meʻa ʻoku lelei hake, ka ko e fiefia ʻae tangata ʻi heʻene ngaahi ngāue ʻaʻana; he ko hono ʻinasi ia: he ko hai te ne ʻomi ia ke ne mamata ki he meʻa ʻe hoko kimui ʻiate ia?
<- Tangata Malanga 2Tangata Malanga 4 ->
