Okaka Amzazirrün Kla 15

7 Anerru akó 7 Godón Ngürsilpükü Kübül

1 Olgabi ka akó darrü wirrian akó ilküpa baus tulmil eserró kwitüm: 7 anerru tibiób 7 wirri gum müppükü. Ini dómdóm ne klama, zitülkus Godón ngürsila sab blakóne, ene wirri gum müpa nóma tómbapórre.

2 Da ka darrü kla eserró wamaka glas malua, urpükü yarrisarri apórrón, akó ka ene pamkolpam nósenarre, ene nurr lar akó oya ingülküp dandang nidi ⌊ut-ut ninóp⌋, akó oya ngim ne namba-a zamngólda. I blamana ap[a] amorran kwarilürr, God ibü ne kla nülinóp. 3 Akó i Mosesón wórr ato kwarilürr,[b] Godón leba zaget olom, akó ene Sip Kupoan wórr. Igó ne wórr yarilürr wagó,

“Lod, Wirrian Arüng Godóe,

marü wirrian akó ilküpa baus tórrmenako!

Blaman bwób-bwób Kingóe,

marü tórrmen tulmil dümdümako akó amkoman!

4 Lod God, marü sab koke nidi gum mangónórre,

akó marü ngi sab koke nidi wirri kwitüm emngyelnórre?

Blamana sab ini kla tónggapórre, zitülkus ma mobela ⌊kolkalan⌋.

Blaman bwób-bwób pamkolpama sab marü obzek kwata togobe

akó marü ⌊ótók⌋ kwarile,[c]

zitülkus ma moba ⌊dümdüm tonarr⌋ tulmil kuri okaka tinarre.”

5 Ini elklaza kakóm, ka yazilürrü akó ⌊Godón Gyabi Müót⌋ ugón tapakurrün yarilürr kwitüm, ene ⌊Palae Müót⌋ ene 10 gida bóktan pokopükü, ne klama amtyanda wagó, God asine. 6 Ene 7 anerrua tübausürr ene Godón Gyabi Müótüdügab tibiób darrpan-darrpan ene wirri gum müppükü. I ⌊tóman-koke⌋ akó zyónan mórrkenyórr bamelórrón kwarilürr, golde tómbapórrón sas[d] bamelórrón dalgüp ngarkwat. 7 Olgabi darrü ene ngyaben klama ene 7 anerru darrpan-darrpan golde tómbapórrón kübül nülinóp. Ene kübül Godón ngürsili barümürrün kwarilürr, metat-metat nótó ngyabenda. 8 Akó Godón Gyabi Müót nokama[e] aterrón yarilürr, Godón ⌊wirri kómal zyón⌋ akó oya arüngdügab. We ngarkwatódó, darrü oloman gaodó koke yarilürr Godón Gyabi Müótüdü bangrinüm, kókó ene 7 anerruab 7 wirri gum müpa nóma tómbapórre.[f]

<- Okaka Amzazirrün Kla 14 Okaka Amzazirrün Kla 16 ->