8
Zeeluzalɛme lo fai ʋolu
1 Ɠɔoɠɔ GALAGI Fai-Pɛ-Maliɠii ɓɔɛni ɠani: 2 Ɠɔoɠɔ GALAGI Fai-Pɛ-Maliɠii wooi ɠaa:
«Siyɔn nɛɛʋɛ bɛ̀, ma yii wola ɠa bɛ̀,
gaamazu, nà ɠalazu su ga ná-maayogi.
3 Ɠɔoɠɔ GALAGI Fai-Pɛ-Maliɠii wooi ɠaa:
Nà ɠalesu ma Siyɔn,
sèizuʋɛ ɠa ɠɛ ga Zeeluzalɛme.
Zeeluzalɛme ɠa loli ga ‹Wooɠɛɠila taai,›
ta ɠɛ Ɠɔoɠɔ GALAGI Fai-Pɛ-Maliɠii ná-gizei ma ‹Gize ɲadegai.›
4 Ɠɔoɠɔ GALAGI Fai-Pɛ-Maliɠii wooi ɠaa:
Nu ʋɔlɔzaɠagiti ta zeizu mɔnɔ Zeeluzalɛme,
zunuiti ta anzanuiti ta zei koi zaamaʋɛti,
ɛsɛ pɛ ná-tukpɔ zea, tɔɔzei ma nu ná-konagi mɔin ʋelei ʋa.
5 Zeeluzalɛme koi zaamaʋɛti daa ɠa ve
ga zunu loungoiti ta anzanu loungoiti, ti ɗa ɠaɠo.
6 Ɠɔoɠɔ GALAGI Fai-Pɛ-Maliɠii wooi ɠaa:
Ni nuɓusɛi mɔtaiti ta kaazu ga
niima vaiti ti la zooga ɠɛɛzu niima voloiti su,
anɠɛ nɛi nà ɓalaagi nà ɠisiɛzu ga naati ti la zooga ɠɛɛzu?
Ɠɔoɠɔ GALAGI Fai-Pɛ-Maliɠii wooi ɠana.
7 Ɠɔoɠɔ GALAGI Fai-Pɛ-Maliɠii wooi ɠaa:
Nà nà-nuɓusɛiti kizosu,
gè ti ɠula folo ɠulazu ʋele yooi ta folo liizu ʋele yooiti su.
8 Nà ʋa ga tiye ti ɠula ná,
ti zei Zeeluzalɛme.
Ta ɠɛ ga nà-nuɓusɛiti,
gè ɠɛ ga ta-ƓALAGI,
nà masadai ɠɛ ti unda ga wooɠɛɠiladai ta telebogi.
9 Ɠɔoɠɔ GALAGI Fai-Pɛ-Maliɠii wooi ɠaa:
À zɛbɛzeɠe, wɔigi wo niima wooiti mɛnisu niizu,
nii GALA goo wo nuiti ti ɠɛni bosu,
siɛgi zu GALA sei ʋɛlɛi ma wuulaagiti ti ɠɛni laazu la,
GALA pɛlɛi naa lo fai zu.
10 Mazɔlɔɔ, aisa naama voloiti ti ʋa zeeli,
nuɓusɛiti ta toganiiti ti la ɠɛni ta-wotii ma zala zɔlɔɔsu.
Siɛ wo nui niiti ti ɠɛni lɛɛzu, ti ɗa yei,
naati ti ɠɛni nɔ ga ti zili nuiti tɔnɔ,
mazɔlɔɔ gè yeeɓeni nuiti ba,
ti ɗa wuzeɠe ɓɔɠɔ laalɔɠɔma.
11 Kɛlɛ niizu niina, gè la mɔ nuɓusɛi mɔtai zosu ga
ʋelei gè ɠɛni kɛɛzu la mɔungi.
Ɠɔoɠɔ GALAGI Fai-Pɛ-Maliɠii wooi ɠana.
12 Mazɔlɔɔ, nà ziilɛigi vaza wo zaama, eɠɛ ani zuwui.
Leezɛn ɓelei ɠa gaawaai ve,
zooi ɠa ba lɔnɔgi ve,
geeɠɔlɔgi ɠa ɓe tonai ʋa, é ʋu ga gola.
Nà niima vaaɓɔɠɔi pɛ kɛɛzu
nà-nuɓusɛi mɔtaiti bɛ.
13 Ee, Zuda ta Izelayɛle ʋɛlɛyeɠeiti,
mɔungi wo ɠɛni zii ɠiligiti saama,
ga nuɓusɛiti ti voovoai, naati ma ʋoogi.
Ʋele nɔ ɠana gè wo ɠizosu da,
wo ɠɛ ga tuya ɗɛungi.
Naa ɠa é ba mu, à mina lua, à zɛbɛzeɠe ʋolu.
14 Mazɔlɔɔ Ɠɔoɠɔ GALAGI Fai-Pɛ-Maliɠii wooi ɠaa:
Siɛgi zu gè devea la ga gè wo ɓɔlɔ,
tɔɔzei wo-mɛmɛwolani ti zìiɠaawanani,
gè la ɠɛni zeɠeni gòoi ʋolu.
15 Niizu niina, gè zeɠea naama levei ʋolu,
nà faa ʋagɔi ɠɛɛzu niina Zeeluzalɛme ʋɛ,
ta Zuda nuɓusɛiti pɛ bɛ.
À mina lua mu.
16 Pɛtɛ ʋele ɠa wa faiti kɛɛ la: Ɛsɛ pɛ ge ɗa gaamai wo bɔɔlai ma, tukpɔɠaaleʋe nuiti ti ɗa tukpɔɠaaleʋe ga telebogi, tukpɔɠaaleʋei nii ziilɛigi a zɔlɔɔ su. 17 Wo tanɔpɛ ge mina faa ɲɔu ɓɛtɛ yiimaʋɛ bɔɔlaiti daalɔɠɔma, à mina ɗa ga ɠona ga zɛɛi, tɔɔzei naama vai tanɔpɛ bɛlɛ la bɛ̀.» Ɠɔoɠɔ GALAGI Fai-Pɛ-Maliɠii wooi ɠana.
Zu so foloiti ta valibo ga fɛti voloiti
18 Ɠɔoɠɔ GALAGI Fai-Pɛ-Maliɠii ɓɔɛni pɔ̀, é ɠɛ mà: 19 Ɠɔoɠɔ GALAGI Fai-Pɛ-Maliɠii wooi ɠaa: «Zugi nii wo sosu, alugi naanisiɛi, dɔɔlusiɛi, dɔfelasiɛi ta puusiɛi konagi zu, ta valibo ga koozunɛ voloi, ta fɛti voloiti Zuda nuɓusɛiti bɛ.
Naa ma, à gaamai ta ziilɛigi nɛɛ ʋɛ.
20 Ɠɔoɠɔ GALAGI Fai-Pɛ-Maliɠii wooi ɠaa:
Zou ɠili su nuɓusɛiti,
ta taa wolaiti su zei wo nu mɔinmɔin ga ta ʋa mɔnɔ.
21 Taa wolaiti su nuɓusɛiti ta li ti ɠɛ taɠiligaa ma:
‹Ade li de Ɠɔoɠɔ GALAGI Fai-Pɛ-Maliɠii maanɛɛnɛ, de gaiziɛ. Nà ɓalaagi nà liizu.›
22 Ʋele ɠana nuɓusɛ mɔinmɔin, ta zeeɠaaɓaa yooiti,
ta ʋaa la Ɠɔoɠɔ GALAGI Fai-Pɛ-Maliɠii ɠaiziɛzu la, ti maanɛɛnɛ.
23 Ɠɔoɠɔ GALAGI Fai-Pɛ-Maliɠii wooi ɠaa:
Naama voloiti nu puugɔ ti tanɔpɛ ti la ga zii ɠila ta ɠaalɛ ba,
ti Zuifu ɠila so ná-seɠei lakɔlɔgi ʋa,
ti ɠɛ ma: ‹Gá ʋilɛsu wo ʋolu,