10
Tosu nɔpɛ ge la kɔɔɠɔ ganigiti ba
1 À Ɠɔoɠɔ GALAGI vali ga
é yeeɠɛɠala mɔungi ma lonai ʋu.
Tɔ ɠa a ɗa sabalagiti pu,
toɠa tonai ve ga pooʋama,
toɠa ɛsɛ gilagilagi ná-kpalaga aniiti kpɛtɛ.
2 Mazɔlɔɔ pɛlɛ wu zaleiti ta wo wooɠaaʋotesu ga zɛɛi,
gɔvɛ ɠaazaɠa beaiti ti ɗa zɛɛ ɠula kɛlɛmaiti ka,
kɛzɛsulala ze gooiti ka ti suɠulazu,
yaava ɠaanɛɛnɛi ɠa ti bosu.
Naa ɠa é kɛa nuɓusɛiti ti lia poun maanɔɠɔi zu,
eɠɛ baala kpulugiti makɛ nu la ti ʋɛ.
Kula zou ʋa niinɛi
3 «Baala makɛ nuiti ka zìiɠaawanaai ti ma,
boli zinɛiti ka gè ti loɠazu.
Mazɔlɔɔ Ɠɔoɠɔ GALAGI Fai-Pɛ-Maliɠii ɠa ɠaaɓaazu tɔ ɓɔɠɔi ná-baala kpulugi ma,
nii é ga Zuda ʋɛlɛyeɠei.
Toɠa ti ɠɛɛzu ga ná-lɛbiya zooi,
é liizu la kɔɔɠɔzuʋɛ.
4 Tɔ ɠa kundiɠi ma zii pɛ ka ɠula su,
ti ɠɛai eɠɛ kɔtu ɓiingi,
eɠɛ seɠe ɠotai ma zuzo kɔluti,
eɠɛ kɔɔɠɔ ɠilɛgi.
5 Ta ɠɛ eɠɛ kɔɔɠuluɓaiti, ta kɔɔi ɠɔ,
ti ɗa koi yɔɠɔzu ʋalaʋalai ɠaayɔ ga ɠɔɠɔi,
mazɔlɔɔ Ɠɔoɠɔ GALAGI ɠa ɠɛɛzu ti ʋa.
Unfegi ɠa yei ga ti zili nuiti, ti sooiti kɔma.
6 Nà Zuda ʋɛlɛyeɠei zɛbɛlɔ,
gè Zozɛfe ná-pɛlɛyeɠei ɠizo.
Nà ti zei ʋele ɓɛtɛ ʋolu ga niinɛ,
tɔɔzei nà ti maawɔinɠa,
eɠɛ vɔlɔ kaipa gè la ɠɛni ɠɛlɛni ti ʋa.
Mazɔlɔɔ nà ɠa gè ga Ɠɔoɠɔ GALAGI, ta-ƓALAGI,
nà ta-maanɛɛnɛ wooiti gaaʋote.
7 Zɛbɛi ɠa ɠɛ Efelayime nuiti ba eɠɛ kɔɔɠuluɓaiti,
ti laa ɠa ve ga koozunɛɛi, eɠɛ ta dɔɔ ɓɔle.
Siɛgi zu ti-lointi ta miná ɠaa la, ti ɠoozu ɠa nɛ,
ti ɠoozu ɠa nɛ ga Ɠɔoɠɔ GALAGI maaʋele.
8 Nà ti loli ga foe wooi ti ɠaalɛ ba,
mazɔlɔɔ gè ti unmɔɔga.
Ta mɔin ga mɔungi ɠɛʋele.
9 Gè ti zuvazagɛ zɔɔma ziiti saama,
zooiti su ti maaɠoozaai,
ti-ɠi ka loo sù miná,
ta yɛ ná ta ti-lointi,
naa ʋoluma ti ɠale ma, ti ʋa.
10 Nà ti ɠula Ezipete yooi zu, ta Asiili yooi zu,
gè ʋa ga tiye Galaade, ta Liɓan yooi zu,
kɛlɛ miná ɓalaa ge la kula ɠɛa ti ʋa.
11 Izelayɛle nuiti ta kidaaʋili kpoloɗɛi ɓudɛ,
Ɠɔoɠɔ GALAGI ɠa kpoloɗɛi ma lakpatakpagi loɠa,
ziɛ wolai Nile ɠa vɔ, é zeeli kpoma.
Asiili ná-wasogi zu ɠa ɠale,
Ezipete ná-masa tukpɔi ɠa ɠula zea.
12 Nà ɓɔɠɔi, Ɠɔoɠɔ GALAGI,
nà zɛbɛi ve Izelayɛle nuiti bɛ,
ti ziɛ ga zìimai.»