Zakali

Ná-Sɛʋɛi

Sɛʋɛi lɔɔzei ʋelei

Nu a la zo Zakali ná-sɛʋɛi laasei pɛɛ ga kito sɛʋɛi. Toɠa dɛɛzu ɠɛzɛɠɛzɛ ʋelegi Izelayɛle nuɓusɛiti ta-ɠitogi laazeelini la wɔlɔwɔlɔi zu. Sɛʋɛi nii ɠaaɠwɛɛʋɛsu ga seizu felegɔ niiti ti la ɓɔni.

Ma mɔungi é zo gaaɠwɛsu 1 ma é zeeli gaaɠwɛsu 8 ma, naati sɛʋɛʋɛ é lɔɔzei kona undɔɔlugɔ puufelegɔ (520) ma, é yei undɔɔlugɔ puugɔ maazu lɔsaʋai (518) ma, aisa Yesu ʋa zɔlɔɔ. Ti ɠɛni botii ɠɛɛzu ʋɔɔma yeeɠɛɠala ɠila su ta GALA goo wo nui Azee. Naama ƓALA gooiti ta ga kulakɛlɛmaiti. Izelayɛle ná-kito mɔungi ɠɛni ga naazu GALA sei ʋɛlɛ wolai lo fai, ta Zeeluzalɛme ʋilɛ fai tosu ɠiteɠitegi zu, kundiɠii Zɔlɔɓaɓɛle, ta zalaɠa ɠula nui Zozuwe ɠa ti ɠɛni naama vaiti untuɠɔ.

Felesiɛi ɠɛni ga yeeɠɛɠalai maaɓɔun fai, siɛgi zu GALA ge ʋaazu masadai ɠɛɛzu la zooi ɠa ná pɛ.

Zakali ná-sɛʋɛi ɠaaɓelazu ʋelei, é zo gaaɠwɛsu 9 ma é zeeli 14 ma, ti zɛʋɛai zɔiti poluma lago poun, naati ta laaɓakpasu gola faa wola mɔun felegɔi naati ma.

1 Masagi Daliyuse ná-masadai ma ɠonagi velesiɛi, ma alu dɔsaʋasiɛi ma, Ɠɔoɠɔ GALAGI ɓɔɛni GALA goo wo nui Zakali ʋɔ, Ɓeeleekia ná-doun zunui, Ido ná-doun zunui ɓalaa ɠɛni de, é ɠɛ ma: 2 Ɠɔoɠɔ GALAGI wola yiiɠaawanani wo-mɛmɛwolani ma. 3 Ɠɛ ti ma: «Ɠɔoɠɔ GALAGI Fai-Pɛ-Maliɠii wooi ɠaa: À ɠale ma wo ʋa pɔ̀, Ɠɔoɠɔ GALAGI Fai-Pɛ-Maliɠii wooi ɠana. Nà ɓalaa nà ɠale ma wo ʋɔ. Ɠɔoɠɔ GALAGI Fai-Pɛ-Maliɠii ɠa é boga. 4 À mina ɠɛ ga wo-mɛmɛwolani kɛʋele, niiti GALA goo wo nu mɔungiti ti ɠɛni ɠɛɛzu ti ma: ‹Ɠɔoɠɔ GALAGI Fai-Pɛ-Maliɠii wooi ɠa é ga nii: À zeɠe wo ziɛ ʋele ɲɔiti ta wo-zɔ ɲɔiti polu.› Kɛlɛ ti la ɠɛni kɛɛni, ti ʋa woilo gòo ma, ti la gòo zoni, Ɠɔoɠɔ GALAGI Fai-Pɛ-Maliɠii wooi ɠana. 5 Mini ɠa za wo-mɛmɛwolani ti ná? GALA goo wo nuiti ɓalaa ti yɛgɛ vulua eyɛsu ɠɔ ɓaa? 6 Kɛlɛ tama, dàawooiti, ta nà-deveiti gè ti veeni nà-botiɠɛ nuiti, GALA goo wo nuiti zea, naati ti wo-mɛmɛwolani kɔɠɔzumɛɛnni. Ti ti ziɛ ʋelei maavaliboni, ti ɠɛ ma: ‹Ɠɔoɠɔ GALAGI Fai-Pɛ-Maliɠii gi zogɛ ʋelei é deveni la, é zoloo gi ziɛ ʋeleiti ta gi-zɔgiti ma.› »

7 Masagi Daliyuse ná-konagi velesiɛi ma, alu puugɔ maazu ɠilasiɛi (11) daa ga Seeɓate, naa ná-folo ʋuufele maazu naanigɔi (24) ma, Ɠɔoɠɔ GALAGI ɓɔɛni GALA goo wo nui Zakali ʋɔ, Ɓeeleekia ná-doun zunui, é ga Ido ná-doun zunui ɓalaa: 8 Naama ɓidii gè kulakɛlɛmai ta ɠaani. Gè zunu ɠila kaani zeini soo maaɓɔikpɔigi ɠɔma, é ɠɛni loni milɛte guluiti saama pɛtu kpomaʋɛ. Soo maaɓɔikpɔigiti, ta soo maalɛitɛigiti, ta soo ɠolegiti ti ɠɛni loni polu ʋelei. 9 Gè gaazaɠani, gè ɠɛ ma: «Màliɠii, lee ma zoo ɠa ga niiti?» Geezuɠeelai nii é ɠɛni ɓɔɛzu pɔ̀, naa ɠɛni mà: «Nà ʋaazu ti-ʋaaɠulabai lɛɛzu ga ɗe.» 10 Zunui nii é ɠɛni loni milɛtegiti saama, naa ɠɛ ma: «Niiti ka Ɠɔoɠɔ GALAGI ti leʋegai ga ti eteai zuɓizɛ.» 11 Sooɓizɛ nuiti ti ʋoluvaawoni Ɠɔoɠɔ GALAGI ná-geezuɠeelai ma, é ɠɛni loni milɛtegiti saama, ti ɠɛ ma: «Gi ɓega ga eteai zuɓizɛ, gi kaaʋɛ ga ziilɛigi, ta dooɠogi ɠa ná.»

12 Ɠɔoɠɔ GALAGI ná-geezuɠeelai ɠɛ ma: «Ɠɔoɠɔ GALAGI Fai-Pɛ-Maliɠii, wɛlɛ, é ɠɛa ga kona ʋuulɔfela (70), è yiiɠaawanai Zeeluzalɛme, ta Zuda laa wolaiti ma. Kɛni yeelɛ è ʋa ti maawɔinɠa?» 13 Ɠɔoɠɔ GALAGI iɲɔdɔɔ ɓɔɛiti ta gaanɛɛnɛ ɓɔɛiti boni naazu geezuɠeelai ma, nii é ɠɛni ɓɔɛzu pɔ̀.

14 Geezuɠeelai nii é ɠɛni ɓɔɛzu pɔ̀, naa devei veeni zèa ga gè niima ɠeela wooi laazeeli ga: «Ɠɔoɠɔ GALAGI Fai-Pɛ-Maliɠii wooi ɠaa: ‹Zìimaʋɛ laavegɛ ga nɛɛbɛi, Zeeluzalɛme ta Siyɔn gizei ta-vaa zu. 15 Kɛlɛ gola yiiɠaawanaʋɛ zooi naati ma, ti zei ʋele ɓɛtɛai ga pagɔ. Mazɔlɔɔ gè lago yiiɠaawanaʋɛ nɔ nà-nuɓusɛiti ma, kɛlɛ tiya mu ti ta ɓɔga naati ta-maanɔɠɔi ʋa.› 16 Naa ɠa é ba, Ɠɔoɠɔ GALAGI wooi ɠaa: ‹Nà ɠalesu ma, gè Zeeluzalɛme ɠaazumaawɔinɠa, nà-pɛlɛi ɠa lo ná ʋolu, pɛlɛ lo nui ná-kɔɠɔ galui ɠa la Zeeluzalɛme ma.› Ɠɔoɠɔ GALAGI Fai-Pɛ-Maliɠii wooi ɠana.»

17 Geezuɠeelai ɠɛni mà: «Nii wo ʋolu, è ɠɛ ma: ‹Ɠɔoɠɔ GALAGI Fai-Pɛ-Maliɠii wooi ɠaa: Nà-taa wolaiti ta ta-ɠulagaanɛɛzui zɔlɔɔ ʋolu, nà Siyɔn ɠaanɛɛnɛ, gè yiimazeɠe ʋolu ga Zeeluzalɛme.› »

Zakali 2 ->