1 Deɠɛmu niizu, peelala vaa nɔpɛ ge la mɔ naati ba, niiti ti ɠiliai Yesu Kilista ʋa. 2 Mazɔlɔɔ Zɛnvu Ɲadegai ná-tɔgi, nii é zɛnvui veezu nui ya, a ɠili Yesu Kilista ʋa, naa è viega,[a] é è ɠula kotoi ta saai ta-lɔgi ya. 3 Mazɔlɔɔ nii Moize ná-tɔgi la ɓena zoo é ʋa kɛ, tɔɔzei kpusɛi kɛɛni ga zɛbɛsulala ani, GALA ge naa ɠɛɛni. GALA ge kotoi ʋeelalani kpusɛi zu, ná-Doun Zunui leʋe fai zu, é ɠula ga kotoba ɓusɛi ɠɛʋelei, é kotoi zeɠe ná. 4 GALA ge naa ɠɛɛni ga tɔgi ma lelebodai laazeeli ade ʋɛ, dɛiti de la mɔ ziɛzu ga kpusɛi yiimai, kɛlɛ kɛni Zɛnvu Ɲadegai yiimai.

5 Tɔɔzei niiti ti ziɛzu ga ti-ɓusɛi yiimai, naati ta ɗa ɠaaɓa kpusɛi yiimaiti nɔ ma, kɛlɛ niiti ti ziɛzu ga Zɛnvu Ɲadegai yiimai, naati ta ɗa ɠaaɓa naa nɔ ma, nii Zɛnvui bosu ti ma. 6 Ni ɗa ɠaaɓaana è-ɓusɛi yiimaiti nɔ ma, naa ɠaaɠaaɓela ga saai, kɛlɛ ni ɗa ɠaaɓaana Zɛnvu Ɲadegai yiimai ma, naa ɠa é ga zɛnvui ta ziilɛigi. 7 Mazɔlɔɔ kpusɛi yiimaiti ta GALA daalɔɠɔma, tɔɔzei kpusɛi la ɠoloa GALA ná-tɔgi ʋɛ, é la vɔlɔ ziaa naa wu pɛ. 8 Tama niiti ti ɠiliai ti-ɓusɛi yiimaiti ba, naati ti la zooga ti ʋa GALA ɛnɛkɛ.

9 Kɛlɛ wɔun, wo la mɔ eteai ziɛzu ga wo-ɓusɛi yiimaiti, wa niina eteai ziɛzu ga Zɛnvu Ɲadegai yiimai, tɔɔzei GALA Zɛnvui ɠa zeini wo-yiimaʋɛ. Zɔi nɔpɛ Kilista ná-zɛnvui la zea, naa la ga tɔun nɔnɔ. 10 Tama ni Kilista ɠa wo-yiimaʋɛ, naazu anɛɛ ni deveʋɛ ga wo-ɓusɛi za kotoi maaʋele ma, kɛlɛ Zɛnvu Ɲadegai ɠa zɛnvui wo wo-yiimaʋɛ, tɔɔzei wo ɠɛa ga telebo nuiti GALA gaazu. 11 GALA, nii é Yesu wuzeɠeni, é kula saai ya, ni naa ná-Zɛnvui ɠa zeini wo-yiimaʋɛ, naazu zɔi é Yesu Kilista wuzeɠeni, é kula saai ya, naa ɠa zɛnvui ve ɓalaa wo-ɓusɛiti zea, ti ga saa gelei, ná-Zɛnvui zaalai zu, nii é zeini wo-yiimaʋɛ.

12 Naa ɠa é ba, kɛ̀ɛleaiti, kuye ɠa ade ma, kɛlɛ kpusɛi letema laade, de ʋa eteai ziɛ mɔnɔ ga kpusɛi yiimaiti kɛʋelei. 13 Ni wa eteai ziɛna kpusɛi yiimai zu, wa za. Kɛlɛ ni wa wo-ɓusɛi ná-kɛɛwotiiti paana, Zɛnvu Ɲadegai zɛbɛi zu, wa zɛnvui wo. 14 Mazɔlɔɔ zɔiti kpein GALA Zɛnvui losu ti luɠɔ, naati ta ga GALA dointi. 15 Mazɔlɔɔ Zɛnvui wo sɔlɔɔgai, é la ga zɛnvui é wo ɠɛɛzu ga duɔiti, wo ʋa ɠɛ dɛ dualuagi zu, kɛlɛ Zɛnvu Ɲadegai ʋe, é wo ɠɛɛzu ga GALA dointi, é ma zobogi ve de ʋɛ, de ɗa wooɠula GALA ma ga: «Aɓa!», naa ɠa ga «Kɛ̀ɛ!» 16 GALA Zɛnvui ɓɔɠɔi ɠa kolezu de-yɛnvui ʋɛ ga da ga GALA dointi. 17 Tɔɔzei da ga ná-dointi, da ɓalaa ga pogani zeɠe nuiti, GALA ná-pogani zeɠe nuiti, ada Kilista ade ɠɛa ga pogani zeɠe nuiti ʋɔɔma, ni da ʋɔɔpɛɛna ná-kpɔlɔi ʋa, da ʋɔɔpɛɛ ɓalaa ná-lɛbiyai ʋa.

18 Nà ɠisiɛzu ga, maa la nɛɛni kpɔlɔi de sɔlɔɔsu niizuʋɛ, de ʋa naa ʋokɔɠɔ lɛbiyai ma, é ʋaazu ɠulazu kɛlɛma ade ʋɛ. 19 Mazɔlɔɔ kpɛtɛanii pɛ ka maaɓɔungi wosu kitogi zu ga GALA dointi ta-ɠula kɛlɛma yeei zeelina. 20 Mazɔlɔɔ kpɛtɛaniiti ziima la ɠɛni ɠɛɛni ga ti lɔɔ vai wafuun fai zu, kɛlɛ kɛni naa yiimai maaʋele ma, nii é ti lɔɔni naa zu. Kɛlɛ kitogi ɠa ná, 21 ga kpɛtɛanii naati ɓɔɠɔi ta unmɔɔgi zɔlɔɔ, ti ɠula duula vai ma luɔlai zu, ti tɔnɔ zɔlɔɔ GALA dointi ta-wɔɔlɔyai ta ta-lɛbiyai zu. 22 Tama de suɠwɛɛ ga kpɛtɛanii pɛ ka ɓalasu eɠɛ ta ɠɛ doun zɔlɔɔ taɓai zu, é zeeli za ma. 23 Kɛlɛ kpɛtɛaniiti gila nɔ laade, dɛi de Zɛnvu Ɲadegai zɔlɔɔgai na ga GALA ná-vebɛaniiti ma mɔungi, da ɓalasu ɠoozu da ɓɔɠɔi, de ɗa naa maaɓɔun ga GALA ge ʋa ade ɠɛ ga ná-doun zunuiti, é de-ɓusɛi unmɔɔ. 24 Tɔɔzei ade ɠizogɛ ga kitogi maaʋele. Kɛlɛ kitogi nii nu kaazu, kito ge la mɔ ga naa, mazɔlɔɔ nii nu kaazu, ɗa ɠito naa ʋa ɠale mɔnɔ? 25 Kɛlɛ ni da ɠitosu naa ʋa, nii de la dɛ kaani, da maaɓɔunsu ziilɔɔi zu.

26 Zenɔ ɠana ɓalaa é la, Zɛnvu Ɲadegai ɠa ɗa ʋa, é ɓɔ de ʋa, da-zɛbɛsulalai zu. Mazɔlɔɔ de la naa ɠwɛɛ, nii soloogai ga de fali da-ƓALA falii zu. Kɛlɛ Zɛnvui ɓɔɠɔi ɠa maanɛɛnɛi wosu ade ʋɛ, é ɗa kpalagi wo, nii nu la zooga a ʋa ti pɛ suɠula. 27 GALA é nu yiimaʋɛ ʋɛtɛsu, é naa ɠwɛɛ, nii Zɛnvu Ɲadegai pɔ é fali, mazɔlɔɔ Zɛnvui ɠa maanɛɛnɛi wosu GALA ná-nuiti ta-vaa zu, eɠɛʋelei GALA ziimai la.

28 De kwɛni de ɠɛ, GALA ka botii ɠɛɛzu fai pɛ su, é ɠɛ ga faa ʋagɔ naati bɛ, niiti ti nɛa ʋɛ,[b] ti loligai eɠɛʋelei ná-devei la. 29 Mazɔlɔɔ niiti GALA ge yiimazeɠeni ga tiye ná luɠɔ,[c] é deveni ná luɠɔ ga é ti ɠula ga ná-Doun Zunui, naa ɠa a kɛ ná-Doun Zunui ɠɛ ga doun mɔungi ɠɛɛɠɛloun mɔinmɔin saama. 30 Niiti GALA ge naama levei woni ta-vaa zu ná luɠɔ, é naati tolini. Niiti é ti lolini, é naati kɛɛni ɠaazu ga telebo nuiti. Niiti é ti ɠɛɛni ga telebo nuiti, é tɔnɔ veeni ɓalaa ná-lɛbiyai zu.

31 Lee ɠa da bo mu niima vaiti su? Ni GALA ka de ʋɛ, ɓɛ ɠa a ɠɛ de laalɔɠɔma? 32 Tɛigi é la ɠɛni ɓaani ná-Doun Zunui maazu, kɛlɛ é feeni ade pɛ da-vaa zu, é la anii pɛ kpɔga naa ʋa, é ʋa fe ade ʋɛ ga faanɛɛ ɓaa? 33 Nuiti GALA ge yiimazeɠeai ga tiye, ɓɛ ɠa é naati peelalazu? GALA ɓɔɠɔi ɠa é ti ɠɛa ga telebo nuiti! 34 Ɓɛ ɠa a ti ʋeelala? Nu nɔpɛ! Mazɔlɔɔ Yesu Kilista nii é zaani, é wuzeɠe, é ɠula saai ya, toɠa GALA zeezazuʋɛ, é ɗa de maavaawo. 35 Ɓɛ ɠa a zoo é de ɓeteʋe Kilista ná-nɛɛbɛi ʋa? Kpɔlɔi ɓaa, ɓaa kidaaʋiligi, ɓaa wɔinzeɠemai, ɓaa pului, ɓaa baladai, ɓaa faaɓaagi, ɓaa boɠa zɔkpɔi? 36 Sɛʋɛʋɛ GALA Sɛʋɛi zu ga: