Link to home pageLanguagesLink to all Bible versions on this site
4
Abalaame ná-kidaaleʋei
1 Lee ɠa da bo mu naazu, Abalaame ná-faa zu, nii é ga gi-mɛmɛwola kpusɛi letemazu? Leeni ɠa é sɔlɔɔni? 2 Ni Abalaame ɠɛni ga telebo nu GALA gaazu ga ná-kɛɛwotiiti maaʋele, é ti ɠɛɛni, a la zoo wasosu. Kɛlɛ é la zooga wasosu GALA gaazu. 3 Mazɔlɔɔ lee ɠa GALA Sɛʋɛi bosu?
«Abalaame laani GALA da, naa leveni bɛ ga telebodai.»[a]

4 Mazɔlɔɔ nui é botii ɠɛɛzu, naa zalai la ɗa ga leve bɛ ga faanɛɛ ʋe, kɛni kuyei. 5 Kɛlɛ zɔi é la botii ɠɛɛzu, kɛni nɔ é ɠidaaleʋe GALA ma, nii é telebodai veezu GALA gaazuluabalala nui ya, naa ná-kidaaleʋei ɠa leve bɛ ga telebodai. 6 Zekana Davide naama nui ná-undaanɛ vai wosu la, zɔi GALA ge telebodai levezu bɛ, é la ɠitoni ná-kɛɛwotiiti ba.

7 «Undaanɛ nu ɠa ga naati, niiti ta-lɔ koloɠologiti maavaayɛgai,
ta-ɠotoiti suvaayɛgai!
8 Undaanɛ nu ɠa ga naama nui,
zɔi Maliɠii la ná-kotoi laazu unma.»[b]

9 Naama undaanɛɛi ɠa naati nɔ ʋɛ ɓaa, niiti ti ga Zuifuiti ti latigai pɛlɛʋolu? Ɓaa toɠa naati ɓalaa bɛ, niiti ti la ga Zuifua? De bogɛ ga: «GALA ge Abalaame ná-kidaaleʋei leveni ga telebodai.» 10 Siɛgi ɓɛgele zu ɠa naa leveni la bɛ? Siɛgi zu é la ɠɛni dɛ latini la pɛlɛʋolu, ɓaa siɛgi zu é latini da pɛlɛʋolu? Ɓa-o, é la ɠɛni ga tatiga ʋoluma pɛlɛʋolu, kɛlɛ aisa é ʋa lati pɛlɛʋolu. 11 Abalaame tatipɛlɛʋolui zɔlɔɔni naa ʋoluma ga poogi, zeeʋozɛbai ɠana, GALA ge dɛɛ ga telebo nu ná-kidaaleʋei maaʋele ma, aisa é ʋa lati pɛlɛʋolu. Naa ma, Abalaame ɠɛɛʋɛ ga naati ti-ɠɛɛ, niiti kpein ti ɠidaaleʋezu GALA ma, anɛɛ ni ti la latini pɛlɛʋolu, GALA ge ti leve ga telebo nuiti. 12 Toɠa ɓalaa ga Zuifuiti ti-ɠɛɛ, niiti ti la yeelaani tatipɛlɛʋolu vai letelegi nɔ ma, kɛlɛ ti ziɛzu ga naama ɠidaaleʋei ʋogi, nii é ɠɛni ade-ɠɛɛ Abalaame ya, siɛgi zu é la ɠɛni dɛ latini la pɛlɛʋolu.

GALA ná-minazeɠegi é zɔlɔɔsu ga kidaaleʋei maaʋele
13 Mazɔlɔɔ eteai zɔlɔɔ fai ga tɔnɔ, GALA ge ma minazeɠegi woni Abalaame ta mavofodaiti bɛ. Naa la ɠɛni woni Abalaame ʋɛ, tɔɔ ʋa zei koloi ʋa, é ɠɛni bosu tɔgi ʋɛ, kɛlɛ tɔɔzei é leveni GALA gaazu ga telebo nui, ga ná-kidaaleʋei maaʋele. 14 Mazɔlɔɔ ni tɔgi zo nuiti nɔ ɠa, ta ɠɛ ga pogani zeɠe nuiti, kidaaleʋei ɠɛa ga wafuun faa, GALA ná-minazeɠegi la mɔ ɓena faa nɔpɛ paa. 15 Mazɔlɔɔ tɔgi ɠa GALA ná-ziiɠaawanai wuzeɠezu. Kɛlɛ ʋɛ tɔ ge la ná, tɔ koloɠolo ge la miná.

16 Naa ɠa é ba, kidaaleʋei maaʋele ɠa poganii zɔlɔɔsu da, nii ma minazeɠegi wogai, naa ɠa a kɛ, é ɠɛ ga GALA ná-faanɛɛi, é ɠɛ ga Abalaame mavofodaiti pɛ tɔnɔ. É la nɔ ga naati nɔ, niiti ti tɔgi zosu, kɛlɛ naati ɓalaa, niiti ti ɠidaaleʋeai, eɠɛʋelei Abalaame ɠidaaleʋeni la. Toɠa ga ade pɛ de-ɠɛɛ, 17 eɠɛʋelei sɛʋɛai la GALA Sɛʋɛi zu, é ɠɛ ma: «Gè è ɠɛa ga zii mɔinmɔingaa ti-ɠɛɛ.» Tɔ ɠa é ga de-ɠɛɛ GALA gaazu, nii é ɠidaaleʋeni, GALA nii é zɛnvui veezu gɔvɛiti zea, é aniiti kula kɛlɛma, niiti ti la ɠɛni ná. 18 Abalaame ɠitoni naa ʋa, nii nu la ɠitoga ba, é ɠidaaleʋeni. Naa maaʋele ma, é ɠɛni ga «zii mɔinmɔingaa ti-ɠɛɛ»,[c] eɠɛʋelei GALA ge boni ma la ga: «Zekana è-mavofodaiti tiegɔi a ɠɛ la.»[d] 19 Iɲɔ ge la ɠɛni leʋeni kidaaleʋei zu, é la ɠɛni ɠaazuloni ná-kɛwola wɔlɔlai ʋa, mazɔlɔɔ é maaɓuɠani niina kona ungilagi (100) ʋa, doun zɔlɔɔ fai ɓalaa ɠɛni niina leʋeni anzai Sala ʋa. 20 É la ɠɛni ʋalani kidaaleʋei ma, é ʋa inɛinɛ GALA ná-minazeɠegi ʋa, kɛlɛ tɔun ná-kidaaleʋei sɛbɛlɔɔni, é lɛbiyai ve GALA bɛ. 21 É laani da kpezekele ga zobo ka GALA bɛ, minazeɠegi é bogai, é daazeeli. 22 Naa ɠa é ba, naa leveni bɛ ga telebodai.[e] 23 Kɛlɛ wooi nii é ga: «É leveni bɛ ga telebodai», naa la nɔ zɛʋɛni GALA Sɛʋɛi zu tɔ ɠila bɛ. 24 Sɛʋɛʋɛ ada ɓalaagi ade ʋɛ, dɛiti de ɠidaaleʋea naa ma, nii é zɛnvui ʋuuni de-Maliɠii Yesu zu, é buzeɠe, é kula saai ya. 25 É saai zɔlɔɔni ada-vaaɠaazagiti faa zu, é wuzeɠe, é ɠula saai ya, é de ɠɛ ga telebo nu GALA gaazu.

<- Wɔlɔme 3Wɔlɔme 5 ->