Wɔlɔme 11

GALA ge la ɠɛlɛni Izilayɛle ʋa

1 Nà gaazaɠa bosu: GALA kɛlɛʋɛ nɛi ná-nuɓusɛiti ba ɓaa? Ɓa-o, naa li poun! Mazɔlɔɔ nà ɓɔɠɔi nà ga Izilayɛle nui, Abalaame mavofodai, gè ɠɛ ga Ɓɛnzamɛn ná-bolodai zu nui ta. 2 GALA ge la ɠɛlɛni ná-nuɓusɛiti ba, é yiimazeɠeni ga tiye ná luɠɔ. Wo naa ɠwɛɛ kɛlɛ, nii GALA Sɛʋɛi bogai, ʋɛ Eli ɠɛni ɓalasu ná GALA goi zu ga Izilayɛle ná-faa ga: 3 «Màliɠii, ti è-laawoo wo nuiti paa, ti ɗa-zalaɠa ɠulazuʋɛti koloɠolo, nà ɠila ka niina zɛ̀gai ʋoluzu, nà ɓalaagi ta pɔ ga ti pàa.»[a] 4 Kɛlɛ GALA ge gooɠaaʋoteni ɠale? É ɠɛni ma: «Gè nu waadɔfela (7.000) makɛgɛ ʋɛ, niiti ti la ʋilɛni ɲiibiɠa Ɓaale ʋɛ.»[b] 5 Zekana é la niima yeeɠɛɠalai zu, nui mɔta goiti ta ná, GALA ge yiimazeɠeai ga tiye ga ná-zaalai maaʋele. 6 É yiimazeɠeni ga tiye ga ná-zaalai maaʋele, ta-ɠɛɛwotiiti maaʋele laade, ni naa laade, GALA ná-zaalai la levea ga zaala ɠiteɠite.

7 Leeni ɠa a wo naazu? Izilayɛle nuɓusɛiti ti la naa zɔlɔɔni, nii ti ɠɛni gaiziɛzu. Kɛlɛ zɔiti GALA ge yiimazeɠeni ga tiye, naati ti sɔlɔɔni. Mɔtaiti kigi ɓaani ti ɠoozu, 8 eɠɛʋelei GALA Sɛʋɛi bosu la, é ɠɛ ma:

«GALA ge faaɠaaɠalala yɛnvui vea ti ya,

ta wozaɠaalala ɠaazuʋɛ, ta faa mɛnitala woiyeɠei,

eyɛsu zaaɠaza.»[c]

9 Davide ɓalaagi ɠɛni ma:

«Ta-laami maaɓɔgi ɠɛ ti ʋɛ ga balii, ta ti zo tumɔi,

é ɠɛ ti ʋɛ ga ti loo zaɓui, ta ti-zalai!

10 Ti-ɠaazuʋɛ ɓidi, ti mina wozaɠa,

è ti-zaamaʋɛ ɓili eyɛsu ɠɔ!»[d]

11 Nà gaazaɠa bosu: Siɛgi zu Izilayɛle nuiti ti ɓunɛga la, ti loa ɠana ná bu mɛtu ɓaa? Ɓa-o, naa li poun! Kɛlɛ ta-vaaɠaazagi maaʋele ma, zii ɠiligi zɔiti ti kizogi zɔlɔɔga, naa toloi wuzeɠea Zuifuiti ziimaʋɛ ti laalɔɠɔma. 12 Ni ta-vaaɠaazagi ɠɛa ga kpɛtɛ zaɓui eteai pɛ bɛ, ta ta-loobui ɠɛ ga kpɛtɛ vaa zii ɠiligiti bɛ, kulanuma wola lielegɔ ɠa a zɔlɔɔ, siɛgi zu ti pɛ ti ɠaavɔnisu la?

Zii ɠiligiti ta-ɠizo fai

13 Zii ɠiligiti, wa ɠa gè ɓɔɛzu wo ʋɔ, nɛ̀i gè ga zii ɠiligiti wa-ɠeelai, nà nà-botii maamusɛzu. 14 Ni ma zobo ka ná, nà pɔ gè kɛ ʋele-o-ʋele, gè toloi lɔ naati kigi zu, gá niiti gi ga zii ɠilagi, nii a kɛ tanigaani ti kizogi zɔlɔɔ ti zaama. 15 Tama siɛgi zu ti likpini da, naa ɠɛa ga zɔɠɔzuɓɛtɛi eteai ta GALA ti yɔɠɔzu, siɛgi zu zeezeibui wosu la ga tiye, leeni ɠa a ɠɛ naazu? Toɠa ɠɛ ga zɛnvui naati bɛ, niiti ti zaani!

16 Ni ɓului ma mɔungiti kulaʋɛ GALA bɛ, mɔtai pɛ ka ga nɔnɔ ɓalaa, ni ma zapei ɠa ga GALA nɔnɔ, ma ɓekegiti pɛ ta ɠɛ ɠana nɔ ɓalaa. 17 Kɛlɛ ni ma ɓekegi tanigaani ti vologa ba, ni ɗɛi è ga dɔɓɔzu wolive wului ma ʋɔnɔgi, è loga ma lɔkulugi ʋa ti-ʋotogi zu, wo ɓɔga ma zapei ma ta su ɗɛi, 18 mina waso ma ɓekegi zɔiti ma, ti vologai ba. Ni ɗa wasona, kwɛɛ è ɠɛ ma, ma zapei lɛi é ʋa ɠɛ loni è ʋa, kɛlɛ ɗɔun ka è loni ma zapei ʋa, é ɗa è zeɠe. 19 Ɗa ɠɛ ma naazu: «Ma ɓekegiti ti voloni ba, nii a kɛ gè lo ba ti-ʋotogi zu.» 20 Naa ɠa ga gaama. Ti voloni ba ta-ɠidaaleʋelalai maaʋele ma, ɗɔun è tosuʋɛ tɔna sɔlɔɔga kidaaleʋei maaʋele ma. Dama, è mina waso, kɛni è lua. 21 Mazɔlɔɔ ni GALA ge la ma ɓeke kiteiti gaazumaawɔinɠaani, é ʋa ti yɛ ná, é la è ɠaazumaawɔinɠaa, é ʋa è yɛ ná. 22 GALA ná-nuɓɔɠɔlai ta ná-gaazumaavɔi ʋɛtɛ, gaazumaavɔi naati tetema, niiti ti looni, ná-nuɓɔɠɔlai è letema, ni ɗa yɛna nuɓɔɠɔlai naa zu. Ni naa laade, ɗa ɓalaagi ɗa leʋezu ga. 23 Tiya ɓalaagi, ni ti la yɛni ta-ɠidaaleʋelalai zu, ʋɛ ti ɠɛni loni ná, ta lo miná ʋolu, mazɔlɔɔ zobogi ɠa GALA bɛ, é ti lo ná ʋolu. 24 Ni è leʋeʋɛ ga, è ɠula dɔɓɔzu wolive wului ʋa, è lo wolive wulu ɠitei ʋa, nii siingai, kula kazemazui ɠana. Tiya ma, tago pa ge la ɓaani ga ti ʋa nɔ, ti lo ti ɓɔɠɔ wolive wului ʋa, é ga ti-ma lɔkulu pɔlɔmai.

Izilayɛle nuɓusɛiti kizo fai

25 Kɛ̀ɛleaiti, gè pɔ ga gè GALA ná-faazeikpasui ma lɔɔɠuzu vai lɛ ga woye, nii a kɛ wo mina ɓɔɠɔ leve ga ɠima nu wolaiti. Izilayɛle ɠilazuʋɛ ɠa yɛsu kikpaai zu, eyɛsu zii ɠiligiti tiegɔi ɠaavɔni GALA ná-nuɓusɛiti saama. 26 Naa ɠa é ba, Izilayɛle pɛ ka ɠizo, eɠɛʋelei sɛʋɛai la GALA Sɛʋɛi zu, é ɠɛ ma:

«Unmɔɔ nu ɠa ʋaazu, é zeɠe Siyɔn,

toɠa kololala vai pɛ kula Zakɔɓe mavofodaiti zea.

27 Minai ɠa nà seɠe ti ʋɛ,[e]

siɛgi zu gè ta-ɠotoiti suvaayɛsu da.»[f]

28 Woo Niinɛ Ʋagɔi letemazu, ta ga GALA sili nuiti wa-vaa zu, kɛlɛ GALA ná-ziimazeɠegi letemazu, ta ga naati GALA ge ti nɛai ʋɛ, ti-mɛmɛwolani maaʋele ma. 29 Mazɔlɔɔ GALA ná-vebɛaniiti ta ná-toligiti maa la valiboga. 30 Mɔungi zu, wa ɓalaagi wo kololalai ɠɛɛni GALA daawooi ʋɛ, kɛlɛ niizu wo GALA ná-maawɔinɠai zɔlɔɔga, tɔɔzei Zuifuiti ta-ɠololalai ʋa. 31 Zekana nɔ, ti kololalai ɠɛa niizuʋɛ, nii a kɛ wo GALA ná-gaazumaawɔinɠai zɔlɔɔ, kɛlɛ naa ɠa a kɛ, tiya ɓalaagi ti zoo ti gaazumaawɔinɠaa ɠilagi naa ɓɔɠɔi zɔlɔɔ. 32 Mazɔlɔɔ GALA ge ɛsɛ pɛ devea ga woozotala nuiti, naa ɠa a kɛ, ɛsɛ pɛ ge ná-gaazumaawɔinɠai zɔlɔɔ.

GALA ná-lɛbiyai wɔɔlɔ ʋelei

33 Ee, GALA ná-kpɛtɛi zuwɔɔlɔʋɛ, ta ná-ɠimalai, ta ná-faaɠwɛgi! Nu la zooga a ʋa ná-tukpɔɠaaleʋe vaiti gaaɠa, nu la ná-faazeikpasuiti gaaɠaa! 34 Sɛʋɛʋɛ ɠani GALA Sɛʋɛi zu:

«Ɓɛ ɠa é Maliɠii ná-kisiɛi ɠwɛɛ?

Ɓɛ ɠa a zoo é ɠɛ ga tɛnɛ nui?»[g]

35 «Ɓɛ ɠa é ani vea tɔun bɛ,

ga naa ʋa potogi zala ma?»[h]

36 Anii pɛ ka zeɠezu pɔ bɛ, ti pɛ ta tɔun saalai nɔ zu, ti pɛ ta ná tɔnɔ ʋɛ. Lɛbiyai ɠɛ tɔun bɛ, eyɛsu ɠɔ. Amina!

<- Wɔlɔme 10 Wɔlɔme 12 ->