1 Gè geezuɠeelai taɠili kaani suɓaai, é ɗa yei, é zeɠe geezuʋɛ, maaɠilini ga tonaɓiingi. Kpazamanamanagi latigai nɔungi ma, gaazuʋɛ ɠɛai eɠɛ foloi, kɔɠɔiti ti ɠɛ eɠɛ abuzogi, ti ɠɛ eɠɛ kpɛdɛgiti. 2 Sɛʋɛ ɓili koi ɠɛni zoni zea, daalaogai. É zeezazu ʋele ɠɔɠɔi loni kpoloɗɛi ɠa, é kɔʋɛzu ʋele gelei lo zooi ma. 3 É kpeei looni, é wooɠula la gola, eɠɛ zalai é zikɔzu. Siɛgi zu é kpeei looni la, tona kpunɛ tu dɔfelaiti ti wooɠulani. 4 Tona kpunɛ tu dɔfelaiti kpegai ma ga ɓɔɛ, gè ɠɛnina ɠɛɛzu gè ti-wooi zɛʋɛ. Kɛlɛ gè wooi ta mɛnini, é zeɠe geezuʋɛ, é ɠɛ mà: «Wooiti tona kpunɛ tu dɔfelaiti ti ti wogai, ti makɛ ga dɔɔɠuzu vaa, mina ti zɛʋɛ.»

5 Geezuɠeelai gè kaani loni, kɔɠɔi gilagi kpoloɗɛi ɠa, gilagi zooi ma, naa yeezai lɛɛni geezu, 6 naa ʋoluma é ɠonani GALA ma, nii é vulua ɠɔoɠɔ, nii é geeɠɔlɔgi ɓɛtɛa ta su aniiti, ta zooi ta gaa aniiti, ta kpoloɗɛi ta bu aniiti, é ɠɛ ma: «Ku la mɔ ba! 7 Kɛlɛ voloi geezuɠeelai lɔfelasiɛi puʋugi vɛɛzu la, naazu GALA ná-faazeikpasui ma lɔɔɠuzu vai laa ɠa zeeli niina, eɠɛʋelei é boni la ná-botiɠɛ nuiti ma, GALA goo wo nuiti.»

8 Naa ʋoluma wooi nii gè mɛnini, é zeɠe geezuʋɛ, naa ɓɔɛni pɔ̀ mɔnɔ, é ɠɛ mà: «Li, è sɛʋɛ ɓili koi zeɠe, daalaogai, é zoni geezuɠeelai ya, nii é loni, kɔɠɔi gilagi kpoloɗɛi ɠa, gilagi loni zooi ma.» 9 Gè liini geezuɠeelai ʋɔ bɛ, gè bo ma ga é sɛʋɛ ɓili koi ve zèa. É ɠɛni mà: «Seɠe, è mi, toɠa wana è-ɠoozuʋɛ, kɛlɛ toɠa ɲɛmi è-laaʋɛ, eɠɛ kɔin gulɔi.»

10 Gè sɛʋɛ ɓili koi zoni, é ɠɛni geezuɠeelai ya, gè mi. É nɛɛni dà eɠɛ kɔin gulɔi, kɛlɛ gè miai ma, é wanani kòozuʋɛ. 11 Ti ɠɛni mà: «Kɛni dɛ mɔnɔ è GALA goo wo, é ʋilɛ nuɓusɛ mɔinmɔin, ta ziiti ba, naa ʋɛɛ zii wooiti ta masagiti ba.»

<- Kulakɛlɛmai 9Kulakɛlɛmai 11 ->